တောင်ကြီမြို့ပြင် (၂) မိုင်တွင် ပန်းချယ်ရီအဆင့်မြင့် အိမ်ယာစီမံကိန်းအတွက်ခြံစည်းရိုးခတ်ရာတွင် နှစ်ပေါင်း ၃၀ ခန့်အကြာ ထိန်းသိမ်းထားသော ထင်းရှူးတောများ ပါ၀င်နေသည့်အတွက် သျှမ်းပြည်နယ်အစိုးရက ဆောက်ခွင့်မပြုဟု ပြောဆိုလိုက်သည်။
အဆိုပါကိစ္စနှင့် ပတ်သက်၍ သျှမ်းပြည်နယ်အစိုးရအဖွဲ့၏ပြောရေးဆိုခွင့်ရှိသူ စီမံကိန်းနှင့် စီးပွားရေးဝန်ကြီး ဦးစိုးညွှန့်လွင်အား သျှမ်းသံတော်ဆင့်မှ ဆက်သွယ်မေးမြန်းရာ – ပန်းချယ်ရီအိမ်ရာစီမံကိန်းသည်ယခင် အစိုးရလက်ထက်နှင့် အစိုးရအသစ် အကူးအပြောင်း ကာလတွင် (MOU) ထိုးထားသည့် စာချုပ်ဖြစ်ပြီး ၊ ၂၀၁၆ ခုနှစ်၊ ဇန်နဝါရီလ(၁၄) ရက်နေ့တွင် သဘောတူစာချုပ်ချုပ်ဆိုခဲ့သော်လည်း သစ်တောဧရိယာများ ပါ၀င် နေသောကြောင့် အစိုးရသစ်လက်ထက်တွင် ခေါ်ယူညှိနှိုင်းမှုများပြုလုပ်ခဲ့ဖူးကြောင်း- ပြောသည် ။
“သစ်တော ဧရိယာတွေမှာ အဆောက်အဦး ဆောက်လုပ် ခွင့်မပေးနိုင်ဘူး ဆိုပြီး ကျနော်တို့ ဒေသန္တရစီမံကိန်း ကော်မတီကနေ ခေါ်ယူဆွေးနွေးညှိ နှိုင်းထားပြီးဖြစ်ပါတယ် ။ ဒီသစ်တောကိုတော ့ကျနော်တို့အပျက်စီးမခံနိုင် ဘူးပေါ့ ၊အိမ်ယာစီမံကိန်းကလည်း အရေးကြီးသလို သစ်တောကလည်း အရေးကြီးတယ်။ သစ်တောရှိတဲ့မြေ နေရာတွေကိုတော့ အဆောက်အဦး ဆောက်လုပ်ခွင့် မပေးဘူး ” ဟု ၀န်ကြီး ဦးစိုးညွှန့်လွင်က ဆက်လက်ပြော သည် ။
ယင်းစီမံကိန်းကို သျှမ်းပြည်နယ် ဒေသန္တရ ဖွံ့ဖြိုးတိုးတက်ရေး စီမံကိန်း ကော်မတီနှင့်မောသျှမ်းဖွံ့ ဖြိုးတိုးတက်ရေး (အများနှင့်သက်ဆိုင် သော ကုမ္ပဏီလီမိတက်) မှ တောင်ကြီးမြို့တွင် ပန်းချယ်ရီအဆင့်မြင့် အိမ် ယာစီမံ ကိန်းတည်ဆောက်ရေး လုပ်ငန်းအတွက် အကျိုးတူပူးပေါင်း ဆောင်ရွက် ခြင်းဖြစ်ပြီး စီမံကိန်းဧရိယာအား ခြံစည်းရိုးကာရုံခြင်းလုပ်ငန်းကို ၂၀၁၈ ၊ မေလ (၂၂) ရက်နေ့တွင်စတင် ဆောင်ရွက်ခဲ့ကြောင်းသိရသည် ။
အဆိုပါစီမံကိန်းအား ဒေသခံလူထုမှလည်း ဆန့်ကျင်ကန့်ကွက်မှုမှုအနေဖြင့် သစ်ပင်သစ်တောစိုက်ပျိုးရေးအတွက်တိုက်တွန်းနိုးဆော်သည့် ဆိုင်းဘုတ်များထူခဲ့ကြကြောင်း သိရသည်။
“ ကျနော်တို့ကန့်ကွက်ရတာက ဒီထင်းရှူးတောကြီး မပျက်စီးဖို့ တောင်ကြီးမြို့အနီးတစ်ဝိုက်မှာက လာမယ့်အချိန်ကာလတွေအတွက် ရာသီဥတု ပူပြင်းမှု ၊ ခြောက်သွေ့မှု ၊ ရေခန်းခြောက်မှုတွေ ဖြစ်ပေါ်လာနိုင် တဲ့အတွက် တောင်ကြီးမြို့နဲ့ အနီးတစ်ဝိုက် (၁၁) မြို့နယ်ပူးပေါင်းပြီး ထိန်းသိမ်းတဲ့ သဘောပါ ” ဟု တောင်ကြီးမြို့ဒေသခံ ကိုအောင်မင်း ကပြောသည် ။
မောသျှမ်းဖွံ့ ဖြိုးတိုးတက်ရေး (အများနှင့်သက်ဆိုင် သော ကုမ္ပဏီ ) သည် သျှမ်းပြည်နယ်အစိုးရနှင့် အကျိုးတူလုပ်ငန်း အဖြစ်ဆောင်ရွက်ခြင်းဖြစ်ပြီး ရင်းနှီးမြုပ်နှံမှု ပမာဏ မှာ ကျပ်သန်းပေါင်း (၉၅၀၀) ၊ တည်ဆောက်ရေးကာ လမှာ (၃) နှစ်ဖြစ်ပြီး ၊ အသုံးပြုမည့် ဧရိယာ လမ်းဧရိယာမှာ ၁၉.၂၁ ဧက ၊ အများပြည်သူအသုံး ပြုမည့် ဧရိယာ မှာ ၁၁. ၄၄ ရိယာ ၊ အဆောက်အဦး ဧရိယာမှာ ၄၄.၃၅ ဧကရှိ ပြီး စုစုပေါင်း (၇၅) ဧကရှိကြောင်း စာချုပ်ပါ အချက်အလက်များအရ သိရှိရပါသည် ။
Leave a Comments