စစ်အာဏာရှင်ကို ဆန့်ကျင်ရေးလှုပ်ရှားမှု (CDM) တွင် ပါဝင်သည့် သျှမ်းတောင် မိုင်းပန်မြို့နယ် ဆေးရုံမှ ဝန်ထမ်း တဦးကို တပ်မှ လာရောက်ဖမ်းဆီးသွားကြောင်း သတင်းရရှိသည်။

ယနေ့ (ဖေဖော်ဝါရီ ၁၁)ရက်တွင် စစ်အာဏာရှင် ဆန့်ကျင်ရေးလှုပ်ရှားမှုတွင်ဦးဆောင်သူခေါင်းစဉ်ဖြင့် မိုင်းပန်ဆေးရုံဝန်ထမ်း (၁)ဦးကို ညနေ၃နာရီဝန်းကျင်တွင်လာရောက်ဖမ်းဆီးပြီး၊ နောက် တဦးထပ်ဖမ်းရန်လည်းတပ်က ကြိုးစားခဲ့ကြောင်းသိရသည်။

“ ကျနော်တို့ ဝန်ထမ်းတွေ ဆန္ဒပြတာကို ဦးဆောင်တယ်ဆိုတဲ့ခေါင်းစဉ်တပ်တယ်။ လောဆယ်တော့ ကျနော်တို့ဆီက ဆေးမှတ်တမ်း တယောက်ရယ်၊ ကြီးကြပ်(၂)တယောက်ရယ် နာမည်တပ်ပြီး လာတာ။ ဆေးမှတ်တမ်း တယောက်ကပါသွားပြီ။ စကခ(၁၇)ကဖမ်းမိန့်ပေးပြီး မြို့နယ်ရဲတပ်ဖွဲ့ကလာဖမ်းတာပါ” ဟု မိုင်းပန်မြို့နယ် ဆေးရုံ မှ လက်ထောက်ဆရာဝန် ဒေါက်တာ စိုင်းစောထွန်းအောင် က ပြောသည်။

လက်ရှိ လာရာက်ဖမ်းဆီးသည့် အကြောင်းရင်းမှာ သေချာမသိကြောင်း၊ သဘာဝဘေးအန္တရာယ် ပုဒ်မဖြင့် အမှုဖွင့်ကာ ဖမ်းဆီးကြောင်းသိရသည်။

“ ကျနော်ဘာကြောင့်ဖမ်းလဲမေးတော့ သေချာမဖြေဘူး။ သဘာဝဘေးအန္တရာယ်နဲ့ ဖမ်းတယ်လို့ပြောတယ်။ ရဲရော တပ်ရော အများကြီးလာတယ်” ဟု ဒေါက်တာ စိုင်းစောထွန်းအောင်က ပြောသည်။

မိုင်းပန် ဆေးရုံမှ ဝန်ထမ်းများကို လာရောက်ဖမ်းဆီးချိန်တွင် ကျန်းမာရေးဝန်ထမ်းများသည် OPT ဆေးကုသဆောင်ထဲတွင် ရှိနေကြပြီး၊ တပ်သို့လိုက်ရန်ခေါ်သော်လည်း တဦးတယောက်မှ မလိုက်သွားကြောင်း သိရသည်။

ထို့ပြင် မိုင်းပန် ဆေးရုံမှ ကျန်းမာရေးဝန်ထမ်းများသည် တပ်မှ လာရောက်ခေါ်သည့်အချိန်တွင် လူမှုကွန်ရက် ဖေ့ဘွတ် တွင်အစမှ အဆုံးအထိ LIVE လွှင့်ထားသဖြင့် မိုင်းပန် ပြည်သူများကလည်း ဆေးရုံသို့ လာရောက်ဝန်းရံခဲ့ကြကြောင်းသိရသည်။

“ ကျမတို့ ဆေးရုံက ဝန်ထမ်းတယောက်ကို ခေါ်သွားတယ်။ ဒါက မဖြစ်သင့်ဘူး။ ဆန္ဒပြတာဟာ တဦးတယောက်တည်းပြတာမဟုတ်ဘူး။ ပြည်သူတွေ အများကြီး ပြတာပဲ။ ဖမ်းရင်အားလုံးဖမ်းရမှာလေ။ ဒါက တမင်ကြောက်အောင်ခြောက်နေတာ” ဟု သူနာပြု ဆရာမက ပြောသည်။

မိုင်းပန်ဆေးရုံရှိ ကျန်းမာရေးဝန်ထမ်း အားလုံး CDMပါဝင်ထားခြင်းမဟုတ်ကြောင်း၊ တချို့သာပါဝင်ကြောင်း၊ ထိုပါဝင်သောသူများလည်း မိမိသဘောဆန္ဒအရ ပါဝင်ကြခြင်းဖြစ်ကြောင်း သူနာပြု ဆရာမက ပြောပြသည်။

ဆက်လက်ပြီး လက်ထောက်ဆရာဝန် ဒေါက်တာ စိုင်းစောထွန်းအောင် က “ လူတယောက်ကို ပုဒ်မ တွေ ရေရာမရှိဘဲ ဖမ်းချင်သလို ဖမ်းတာ မကြိုက်ဘူး ကျနော်တို့ နယ်မြို့ဆိုရင် အရင်က အကြောက်တရားနဲ့ နေရတယ်” ဟု ထပ်လောင်းပြောသည်။

အထက်အမိန့်အရ အဖြစ် ဖမ်းဆီးနေသည့် ကိစ္စသည် မဖြစ်သင့်တော့ကြောင်း၊ ထိုအကြောင်းအရာကို ကာကွယ်သွားရမည်ဖြစ်ကြောင်း လည်း ဒေါက်တာ စိုင်းစောထွန်းအောင်က ဖြည့်စွက်ပြောသည်။

ထိုနည်းတူ သျှမ်းပြည်တောင်ပိုင်း မိုင်းရှူးမြို့ ဆေးရုံတွင်လည်း ဆရာဝန်ကြီးအား မေးမြန်းရန်ရှိသဖြင့်ဟုဝင်ရောက်ဖမ်းဆီးရာတွင် ဆေးရုံဝန်ထမ်းများ ဒေသခံပြည်သူများနှင့် ပဋိပက္ခ အော်ဟစ်ပြောဆိုမှုများရှိသည့် ဖေ့စ်ဘု Live များ လိုင်းပေါ်တွင်တွေ့ရသည်။ ထိုနောက်ပိုင်း ဆရာဝန်အားဖမ်းဆီးခေါ်ဆောင်သွားခဲ့သည်ဟု သတင်းများထွက်လာပါသည်။ သို့သော်သျှမ်းသံတော်ဆင့်အနေဖြင့် သီးခြားအတည်ပြုချက်မရခဲ့ပေ။