သျှမ်းပြည် မိုင်းပန်မြို့နှင့် မိုင်းတုံမြို့ကြား အသစ်တည်ဆောက် ပြီးစီးခဲ့သည့် သံလွင်မြစ်ကူးတံတား(တာဆန်း) ကို စစ်ခေါင်းဆောင် မင်းအောင်လှိုင် လာရောက်ဖွင့်လှစ်ပေးခဲ့ကြောင်း စုံစမ်းသိရသည်။

ယမန်နေ့ (ဇန်နဝါရီလ ၂၀ ရက်) နံနက် ၁၁ နာရီခွဲတွင် မိုင်းပန်မြို့နှင့် မိုင်းတုံမြို့ကြားရှိ သံလွင်မြစ်ပေါ်တွင် အသစ်တည်ဆောက် ပြီးစီးခဲ့သည့် သံလွင်မြစ်ကူးတံတား(တာဆန်း) ကို သျှမ်းပြည်အရှေ့ပိုင်းတွင် ရောက်ရှိနေသည့် စစ်ခေါင်းဆောင် မင်းအောင်လှိုင် ကိုယ်တိုင် လာရောက်ဖွင့်လှစ်ပေးခဲ့ကြောင်း ဒေသခံများက ပြောသည်။

“အဓိကတော့ မိုင်းတုံ၊ မိုင်းဆတ်၊ မိုင်းပန်၊ မိုးနဲ၊ လင်းခေး ဒီဘက်က ဌာနဆိုင်ရာ ဝန်ထမ်းတွေနဲ့ ပြည်သူတွေ ရာနဲ့ချီ လာကြတယ်။ နောက်ပြီး သျှမ်း၊ ဗမာ၊ လီဆူ၊ လားဟူ ရိုးရာအဖွဲ့တွေလည်း တွေ့တယ်၊ စစ်ခေါင်းဆောင်ကို ကြိုဆိုဖို့ အဲ့လိုပေါ့” ဟု တံတားသစ်ဖွင့်ပွဲသို့ သွားရောက်ခဲ့သူတစ်ဦးက သျှမ်းသံတော်ဆင့်ကို ပြောသည်။

စစ်ခေါင်းဆောင် မင်းအောင်လှိုင် လာရောက်ဖွင့်လှစ်ပေးခဲ့သည့် အသစ်တည်ဆောက်ထားသော သံလွင်တံတား(တာဆန်း) ကို နဂိုရှိရင်းစွဲ ကြိုးတံတားအောက်ဘက်၌ ပြီးခဲ့သည့် ၂၀၁၉ ခုနှစ် ဖေဖော်ဝါရီလ ၆ ရက်တွင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကိုယ်တိုင် ပန္နက်ရိုက် အုတ်မြစ်ချထားပေးခဲ့ကြောင်း သိရသည်။

မိုင်းပန်မြို့နယ် တာဆန်းကျေးရွာအုပ်စုသည် သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA) လှုပ်ရှားသွားလာသည့် နယ်မြေဖြစ်သော်လည်း သံလွင်တံတားသစ် ဖွင့်ပွဲသို့ ကိုယ်စားလှယ်တက်ရောက်လာခြင်း မတွေ့ရကြောင်း ဒေသခံများက ပြောသည်။

သံလွင်မြစ်ကူးတံတား(တာဆန်း) ကြိုးတံတားဟောင်းမှာ တံတားခံနိုင်ဝန် (၁၆) တန်သာ ရှိပြီး အသုံးပြုခဲ့သည်မှာ နှစ်(၂ဝ)ကျော် ကြာမြင့်ခဲ့ခြင်းကြောင့် သံလွင်တံတားသစ် (တာဆန်း)အား တံတားအဟောင်းနှင့်ကပ်လျက် ၂ဝ၁၉ ခုနှစ်တွင် စတင်ဆောက်လုပ်ခဲ့သည်။

အဆိုပါ တံတားသစ် တည်ဆောက်ရန် သြစတြီးယားနိုင်ငံ UniCredit Bank မှ အတိုးမဲ့ချေးငွေ ယူရို ၈ ဒသမ ၄ သန်း ချေးယူနိုင်ရန်အတွက် ၂ဝ၂ဝ ပြည့်နှစ် သြဂုတ်လ ၂၈ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးတွင် အတည်ပြုခဲ့သည်။

အသစ်တည်ဆောက် ပြီးစီးခဲ့သည့် သံလွင်တံတားသစ်(တာဆန်း) အနေဖြင့် တံတားခံနိုင်ဝန် (၆၀) တန်၊ တံတားအရှည် ၈၇၆ ပေ၊ တံတားအကျယ် ၃၃ ပေရှိသည့် သံမဏိသံပေါင် တံတားဖြစ်ပြီး သံလွင်မြစ်အရှေ့ခြမ်းတွင် တြိဂံဒေသ တိုင်းစစ်ဌာနချုပ် လက်အောက်ခံတပ်နှင့် သံလွင်မြစ်အနောက်ခြမ်းတွင် မိုင်းပန်အခြေစိုက် စကခ (၁၇) တပ်ရင်းများမှ လုံခြုံရေးယူထားကြောင်း သိရသည်။

သံလွင်တံတားသစ်(တာဆန်း)သည် သျှမ်းပြည်တောင်ပိုင်းနှင့် အရှေ့ပိုင်းကို ဆက်သွယ်ထားသည့် နမ့်စန်-မိုးနဲ-လင်းခေး-မိုင်းပန်-မိုင်းတုံ-မိုင်းဆတ် လမ်းမကြီးပေါ်တွင် တည်ရှိပြီး နယ်စပ်မြို့များကို အဓိက ဆက်သွယ် သွားလာနိုင်သည့်အတွက် မဟာဗျူဟာမြောက် အရေးပါသည့် တံတားတစ်စင်းလည်း ဖြစ်သည်။