သျှမ်းပြည်တောင်ပိုင်း မိုင်းပန်မြို့တွင် ညသန်းခေါင်အချိန် နမ့်ပန်ချောင်းရေ ရုတ်တရက် တက်လာသောကြောင့် ညတွင်းချင်း ဘေးလွတ်ရာ ပြောင်းရွှေ့လိုက်ရကြောင်း စုံစမ်းသိရသည်။

ယမန်နေ့ (ဇူလိုင် ၁၆ ရက်)တွင် မိုင်းပန်မြို့တွင် မိုးသည်းထန်စွာ ရွာသွန်းမှုကြောင့် နမ့်ပန်ချောင်းရေ ရုတ်တရက် တက်လာပြီး ညသန်းခေါင်ယံအချိန်တွင် ရေများ နေအိမ်အတွင်းသို့ ဝင်ရောက်လာသည်။

ထိုသို့ နမ့်ပန်ချောင်းရေ မြင့်တက်မှုကြောင့် နေအိမ်နှင့် လယ်ထဲသို့ ရေဝင်သည့် ကျေးရွာများမှာ ပါခါးကျေးရွာ၊ ဟိုဖိုင်လုံကျေးရွာ၊ ဝမ်မိုင်ကျေးရွာတို့ဖြစ်ပြီး ရေရုတ်တရက် မြင့်တက်လာမှုကြောင့် ပြည်သူများဘေးလွတ်ရာသို့ ရွှေ့ပြောင်းနေရကြောင်း ဒေသခံများက သျှမ်းသံတော်ဆင့်ကို ပြောသည်။

“ဒီမနက် ရေက ရုတ်တရက်ကြီး တက်လာတယ်၊ အိမ်ထဲထိ ရေတွေဝင်လာတယ်။ ရေမတက်ခင်က ဖုန်းလိုင်းတွေ ပြတ်သွားတယ်။ ပစ္စည်းတွေကို အပေါ်ထပ် အမြန်ရွှေ့ရတယ်။ လယ်ကွင်းတွေထဲလည်း ရေတွေအပြည့်ပဲ။ ကားတွေ ဆိုင်ကယ်တွေကိုတော့ မြင့်တဲ့ နေရာတွေကို ရွှေ့ရတာ”ဟု မိုင်းပန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထို့အပြင် မိုင်းပန်မြို့တွင် မိုးအဆက်မပြတ် ရွာသွန်းလျှင် ရုတ်တရက်ရေကြီးလာမှုကို ကြုံနေရသဖြင့် ဒေသခံများအနေဖြင့် သတိဝိရိယထား သွားလာရန်လည်း ၎င်းက ဆက်ပြောသည်။

“မိုးအရမ်းမရွာလည်း ရေတက်တာက သံလွင်မြစ်တို့ နမ့်ပန်ချောင်းတို့ကနေ မြစ်ရေကြီးပြီး ရေလျှံတာမျိုးဖြစ်တယ်။ နှစ်တိုင်းတော့ ရေတက်တယ်၊ ဒီနှစ်ကတော့ အဆိုးဆုံးပဲ။ တစ်နှစ်ထက် တစ်နှစ် ပိုဆိုးလာမှာလည်း ကြောက်တယ်” ဟု မိုင်းပန်ဒေသခံ အမျိုးသမီးတစ်ဦး သျှမ်းသံတော်ဆင့်ကို ပြောသည်။

အလားတူ ယမန်နေ့ ဇူလိုင်လ (၁၆)ရက်တွင် ကျိုင်းတောင်းမြို့တွင်လည်း မိုးသည်းထန်စွာ ရွာသွန်းမှုကြောင့် နမ့်တိန်းချောင်းမှ ရေလျှံပြီး ကျိုင်းတောင်းမြို့အတွင်း ဝင်ရောက်လာခြင်းကြောင့် ဘေးလွတ်ရာ ရွှေ့ပြောင်းခဲ့ရကြောင်း ဒေသခံများထံမှ သိရသည်။

ဆက်လက်ပြီး သျှမ်းပြည်အရှေ့ပိုင်း မိုင်းဆတ်မြို့တွင်လည်း မိုးသည်းထန်စွာ ရွာသွန်းပြီး တောင်ကျချောင်းရေ တက်လာသောကြောင့် မိုင်းဆတ်-တာချီလိတ် သွားသည့် နမ့်ကျန်းတံတားကို ယာယီပိတ်ထားကြောင်း သိရသည်။

ပြီးခဲ့သည့် ၂၀၂၄ ခုနှစ် စက်တင်ဘာလတွင်လည်း သျှမ်းပြည်အပါအဝင် မြန်မာတစ်နိုင်ငံလုံး၌ ရေကြီးရေလျှံမှုများ ဖြစ်ပေါ်ခဲ့ပြီး ပျက်စီးဆုံးရှုံးမှု များခဲ့ကာ လူဦးရေထောင်နှင့်ချီ ရေဘေးသင့်ခဲ့ရသည်။