သျှမ်းပြည် တောင်ပိုင်း လွိုင်လင်ခရိုင် မိုင်းကိုင်မြို့နယ်အတွင်း ကျောက်မီးသွေး တူးဖော်ရေး ကုမ္မဏီအား ဒေသခံလူထု ဆန့်ကျင်ကန့်ကွက်နေသည့်ကြားမှ သျှမ်းပြည်နယ်အစိုးရပေးထားသည့် သက်တမ်းကုန်သည့်အထိ ဆက်လက်တူးဖော်ရန် ပြည်ထောင်စု အစိုးရ က ခွင့်ပြုမိန့် ပေးလိုက်ကြောင်း သတင်းရရှိသည်။
မိုင်းကိုင် ကျောက်မီးသွေး တူးဖော်မည့် ကုမ္ပဏီ သည် ၂၀၂၀ ခုနစ်ထိ အစိုးရထံအခွန်ဆောင်ထားကြောင်း သိရသည်။
ယမန်နှစ် ဧပြီလတွင် ဘုန်းကြီးများ၊ ဒေသခံများ၊ သျှမ်းတိုင်းရင်းသားများ ဒီမိုကရေစီ အဖွဲ့ချုပ် (SNLD) လွှတ်တော်ကိုယ်စားလှယ်တို့ က မိုင်းကိုင်မြို့နယ် အတွင်း တူးဖော်နေသည့် ကျောက်မီးသွေး ကုမ္ပဏီကို စီမံကိန်းချက်ချင်းရပ်ဆိုင်းရန် ဆန္ဒပြမှုများ ပြုလုပ်ခဲ့သည်။
ထို ဆန္ဒပြမှုကြောင့် ကျောက်မီးသွေးတူးဖော်သည့် လုပ်ငန်းကို ယာယီရပ်ဆိုင်းခဲ့ရာ ယခုနှစ် မေလ ၃၀ ရက်စွဲဖြင့် သယံဇာတ နှင့် သဘာဝ ပတ်ဝန်းကျင် ထိန်းသိမ်းရေး ဝန်ကြီးဌာန မှ ကျောက်မီးသွေး တူးသည့် ကုမ္ပဏီ ကို ပြန်လည်တူးဖော်ခွင့်ပြုလိုက်ကြောင်း မိုင်းကိုင်မြို့နယ် ပြည်နယ်လွှတ်တော် အမတ် လုံစိုင်းလုံ က ပြောသည်။
“ အရင်က တူးဖော်မှုတွေ ယာယီရပ်ဆိုင်းထားတယ်။ ဒါပေမယ့် သျှမ်းပြည်နယ် အစိုးရ သဘောထား မှတ်ချက်ကို စောင့်ကြည့်ပြီး ခွင့်ပြုသင့်ရင်ခွင့်ပြုမယ်လို့တော့ ပြောခဲ့တယ်။ သျှမ်းပြည်နယ် အစိုးရ က ခွင့်ပြုသင့်ကြောင်း ပြည်ထောင်စု အစိုးရကိုတင်ပြလိုက်တော့ အခုပြန်ခွင့်ပြုလိုက်တာပါ” လို့ မိုင်းကိုင် မြို့နယ် ပြည်နယ် လွှတ်တော် အမတ် လုံစိုင်းလုံ က ဆိုသည်။
မိုင်းကိုင် ကျောက်မီးသွေး တူးဖော်လျှင် သဘာဝ ပတ်ဝန်းကျင် ထိခိုက်နိုင်ကြောင်းကိုလည်း သစ်တော ဦးစီးမှူး က ပြောခဲ့ပြီး၊ ကျန်းမာရေးထိခိုက်နိုင်သည်ကိုလည်း မြို့နယ်ဆရာဝန်ကြီးကလည်း ပြောဆိုခဲ့ကြောင်း နှင့် မြေဧက ၅၀၀ ကျော် ထိခိုက်မည်ကိုလည်း မြေစာရင် မှ ရှင်းပြခဲ့ပေမယ့် သျှမ်းပြည်နယ် အစိုးရ က လက်မခံကြောင်းလည်း လုံးစိုင်းလုံ က ထပ်လောင်းပြောသည်။
မိုင်းကိုင် ကျောက်မီးသွေး တူးဖော်မှု ရပ်ဆိုင်းရန် မိုင်းကိုင် မြို့နယ် ပြည်နယ် လွှတ်တော်ကိုယ်စားလှယ် လုံးစိုင်းလုံက “ လွှတ်တော်မှာလည်းတင်ပြတယ်။ လွှတ်တော်ဆိုတာ ဘာမှ အဓိပ္ပာယ်မရှိတော့ဘူး။ ပြည်သူ့အသံကို ဂရုမစိုက်ဘဲ ပြန်လုပ်နေကြတာ” ဟု ပြောသည်။
မိုင်းကိုင် မြို့နယ်အတွင်း ဟိန်း မေတ္တာ ကျောက်မီးသွေး တူးဖော်မှုများဆက်လက်လုပ်ကိုင်ရန်နှင့် လုပ်ငန်းလုပ်ကိုင် ဆောင်ရွက်နေစဉ် ဒေသခံ များနှင့် ပြေလည်အောင် ညှိနှိုင်းဆောင်ရွက်ပြီး မလိုလား အပ်သည့် ပြသာနာ ဖြစ်ပွားမှု မရှိအောင် အထူးဂရုပြု ဆောင်ရွက်သွားရန်လည်း သယံဇာတနှင့် သဘာဝ ပတ်ဝန်းကျင် ထိန်းသိမ်းရေး ဝန်ကြီးဌာန (သျှမ်းပြည်အစိုးရ) ၏ အသိပေး အကြောင်းကြားစာတွင် ရေးထားသည်။
မိုင်းကိုင်မြို့နယ်တွင် ပြည့်အောင်ဟိန်း နှင့် ဟိန်းမေတ္တာ ကျောက်မီးသွေး တူးဖော်ရေး ကုမ္ပဏီတို့က ၂၀၁၇ နှစ်ဦးပိုင်းမှစပြီး တူးဖေါ် ထုတ်ခဲ့ကြောင်း သိရသည်။
မိုင်းကိုင် ကျောက်မီးသွေး ကို ဆက်လက်တူးဖော်မည်ဆိုပါက လယ်သမားများ အားထားရသည့် သျှမ်းပြည် နယ် တောင်ပိုင်းရှိ နမ့်တိန်းချောင်းပျက်စီး နိုင်ကြောင်းလည်း သျှမ်းလူ့အခွင့်အရေး မဏ္ဍိုင် က ယမန်နှစ် ဧပြီလတွင် ထုတ်ပြန်သည့် ထုတ်ပြန်ချက်တွင်ရေးသားထားသည်။
လက်ရှိ မိုင်းကိုင် ကျောက်မီးတွေးတူးဖော်သည့်နေရာသည် နမ့်တိန်းချောင်းဖျား အနီးတွင်ဖြစ်ပြီး အဆိုပါမြစ်ချောင်းသည် မိုင်းကိုင်မြို့နယ် မှ လဲချား၊ နမ့်စန်၊ ကျိုင်းတောင်း၊ လင်းခေး မြို့နယ် တို့ကို ဖြတ်သန်းစီးဆင်း သွားပြီးသံလွင် မြစ်ထဲသို့ စီးဝင်ကြောင်းလည်း ယင်းထုတ်ပြန်ချက်တွင်ရေး သားထားသည်။
Leave a Comments