သျှမ်းပြည် တောင်ပိုင်း ပင်လုံမြို့ မြို့လယ်ခေါင်ရှိ ဘုရားရေကန်ထဲသို့ အမှိုက်များ စည်းကမ်းမဲ့ စွန့်ပစ်မှုကြောင့် ငါးများသေဆုံးနေကြောင်း သတင်းရရှိသည်။

ပင်လုံ မြို့လယ်ခေါင်ရှိ ဘုရားရေကန် နှင့် အနီးပတ်ဝန်းကျင်တွင် မနက်တိုင်း အမှိုက်များပြည့်နှပ်နေကြောင်း၊ အမှိုက်များစနစ်တကျ မစွန့်ပစ်မှုကြောင့် ငါးများသေဆုံးနေကြောင်း ပင်လုံ ဒေသခံများသတင်းပေးပို့ချက်အရသိရသည်။

ထိုရေကန်ထဲနှင့် ဘေးပတ်ဝန်းကျင်တွင် အမှိုက်များပြည့်နေရသည့် အကြောင်းရင်းမှာ စည်ပင်သာယာရေးမှ ရပ်ကွက်အတွင်းသို့ အမှိုက်များလာရောက် သိမ်းဆည်းခြင်းမပြုသဖြင့် ဒေသခံ ပြည်သူများ က ထိုနေရာသို့ သွားရောက် စွန့်ပစ်ခြင်းဖြစ်ကြောင်းသိရသည်။

“ ဒါကတော့ ကျနော်တို့ ပြည်သူလူထုအနေနဲ့လည်းဆိုင်တယ်။ လူတွေကိုမေးတော့လဲ စည်ပင်တွေကအိမ်ထိလာပြီး အမှိုက်တွေလာမသိမ်းပေးလို့ပြောတယ်။ သူတို့ (စည်ပင်) က ဓာတ်ဆီမရှိဘူးလို့ဘဲပြောတယ်” ဟု ပင်လုံမြို့ဒေသခံ စိုင်းဦး က သျှမ်းသံတော်ဆင့်ကို ပြောသည်။

ထိုသို့ရေကန်ဘေးတွင် အမှိုက်များပြည့်နေသည့် အပေါ်တွင် စည်ပင်သာယာရေးကို ဆက်သွယ်မေးမြန်ရာတွင် ၎င်းတို့နှင့် မသက်ဆိုင်ကြောင်း၊ထိုနေရာတွင် ဂေါပက တို့သာတာဝန်ယူဖြေးရှင်းနေကြောင်း ပင်လုံမြို့ စည်ပင်သာယာရေး ဥက္ကဌ ဦးရဲလှိုင်းက သျှမ်းသံတော်ဆင့်ကို ပြောသည်။

“ ဒီနေရာကတော့ ကျနော်တို့နဲ့မဆိုင်ဘူး။ သူတို့ ဂေါပကနဲ့ပဲ ဆိုင်တယ်။ သူတို့က ဘုရားမြေပြင်ဆိုပြီး သိမ်းသွားလိုက်ပြီး။ ကျနော်တို့ စည်ပင်နဲက မသက်ဆိုင်ပါဘူး” ဟု ဦးရဲလှိုင်းကပြောသည်။

ဆက်လက်ပြီး ပင်လုံ ဒေသခံ စိုင်းဟွမ်စစ် က “ ကျနော်တို့ မနက်ထပြီးလမ်းလျှောက်တော့ ရေကန်တွေရဲ့ဘေးမှာက အမှိုက်တွေပြည့်နေတယ်လေ။ ပြီးတော့‌ရေထဲမှာလဲ အမှိုက်ကရှိနေသေးတယ်။ ရေကလည်း ရေဝင်ရေထွက်ပိတ်ထားလိုက်တော့ ရေမလည်းနိုင်တော့ဘူး။ ရေကလည်းနှံပြီးတော့ ငါးတွေကလဲသေနေတယ်” ဟု ပြောသည်။

ထိုရေကန်နံဘေးတွင် ညတိုင်း လူငယ်များ အရက်သေစားသောက်ပြီး မကြာခဏ ရန်ဖြစ်ပွားမှုများလည်း ရှိနေကြောင်း စိုင်းဟွမ်စစ်က ပြောသည်။

“ ဒါနေရာမှာက မီးလည်းမရှိဘူး။ ညဆိုရင် လူငယ်တွေက အရက်လာထိုင်သောက်ကြတယ်။ ပြီးတော့ မူးပြီးဆိုရင် ရန်တွေထဖြစ်ကြတယ်။ ပင်လုံမြို့ရဲတွေကလည်း အလုပ်မလုပ်ကြဘူး။ လုံခြုံရေးပိုင်း သိပ်မရှိထားကြဘူး” ဟု စိုင်းဟွမ်စစ်ကဆိုသည်။

ရေကန်ထဲနှင့် ရေကန်ပတ်ဝန်းကျင်တွင် စွန့်ပစ်ထားသည့် အမှိုက်များ လာရောက်သိမ်းဆည်ပေးရန် ပင်လုံဒေသခံပြည်သူများက စည်ပင်များနှင့် လွှတ်တော်ကိုယ်စားလှယ်များကို တောင်းဆိုခဲ့သော်လည်း လာရောက်ဖြေရှင်းပေးခြင်း မရှိကြောင်းသိရသည်။