မိုင်းပန်မြို့နယ်တွင် RCSS/SSA နှင့် အစိုးရတပ် တိုက်ပွဲဖြစ်ပွား

0

သျှမ်းပြည်တောင်ပိုင်း မိုင်းပန်မြို့နယ်တွင် RCSS/SSAနှင့် အစိုးရတပ်မတော်တို့သည် ယနေ့( ၈နာရီ )ကျော်တွင် ထိတွေ့ တိုက်ပွဲဖြစ်ပွားခဲ့ကြောင်းသိရသည်။

ယနေ့ မနက် (၈)နာရီ ၂၀မိနစ်တွင် မိုင်းပန်မြို့နယ် နမ့်တိန်ကျေးရွာအုပ်စု မိုင်းဟောင်းကျေးရွာ အနီး၌ သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော်(RCSS/SSA) ရှိသည့်နေရာကို မိုင်းပန်မြိ့နယ်အခြေစိုက် အစိုးရတပ်မတော် ခြေမြန်တပ်ရင်း (ခမရ ၅၇၅) မှ လာရောက်ထိုးစစ်ဆင်သဖြင့် ထိတွေ့မှု ခေတ္တ အနည်းငယ်ဖြစ်ပွားခဲ့ကြောင်း သတင်းရရှိသည်။

“ တိုက်ပွဲဖြစ်တယ်လို့တော့ကြားတယ်။ ဘာကြောင့်လာပစ်လည်းတော့ အသေးစိတ်မသိရသေးဘူး။ တိုက်ပွဲက ခဏပဲဖြစ်သွားတာပါ ” ဟု RCSS/SSA ပြောရေးဆိုခွင့်ရှိသူ ဒုဗိုလ်မှူးကြီးအုမ်းခေး က ပြောသည်။

ယနေ့ဖြစ်ပွားသည့် RCSS/SSA နှင့် အစိုးရတပ်မတော် ထိတွေ့မှု ၁၀မိနစ်ခန့်သာဖြစ်ပွားခဲ့ပြီး၊ ထိတွေ့မှုသည် ကျေးရွာနီးဝေးကွာကြောင်း၊ လူထိခိုက်မှုမရှိကြောင်း ထိခိုက်မှု မရှိကြောင်း သိရသည်။

ထို့ပြင် လက်ရှိအချိန်ထိ RCSS/SSAနှင့် အစိုးရတပ်မတော်တို့ နှစ်ဖက်တပ် နောက်ဆုတ်သွားခြင်းမရှိသေးသဖြင့် စစ်ရေး တင်းမာနေဆဲဖြစ်ပြီးကြောင်း လည်း RCSS/SSA၏ သတင်းဌာနဖြစ်သည့် Tai Freedom သတင်းတွင်ရေးသားဖော်ပြထားသည်။

RCSS/SSAသည် တနိုင်ငံလုံးအပစ်ခတ်ရပ်စဲရေး သဘောတူညီစာချုပ်(NCA) လက်မှတ်ရေးထိုးထားသည့် အဖွဲ့ တခုဖြစ်ပြီး၊ ၂၀၂၀ အောက်တိုဘာလတွင်လည်း RCSS/SSAနှင့် အစိုးရတပ်မတော် တို့သည် သျှမ်းပြည် မြောက်ပိုင်း ကျောက်မဲမြို့နယ် တွင် တိုက်ပွဲဖြစ်ပွားကာ အရပ်သား ၁၀၀၀ ကျော် စစ်ဘေးရှောင်ခဲ့ရကြောင်းသိရသည်။

Leave a Comments