အိန္ဒိယနိုင်ငံမှ မြန်မာနိုင်ငံသို့ ယနေ့(ဇန်နဝါရီ ၂၂)ရက်ရောက်ရှိလာမည့် ကိုဗစ်-၁၉ ကာကွယ်ဆေးများကို ကျန်းမာရေးဝန်ထမ်းများနှင့် အစိုးရအဖွဲ့ဝင်များအား ဦးစားပေး ထိုးနှံပေးမည် ဖြစ်ကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် က ပြောဆိုလိုက်သည်။

ကိုဗစ် ကာကွယ်ဆေးကို ရှေ့တန်းရှိ ကျန်းမာရေး ဝန်ထမ်း၊ အဓိကကျသည့် အစိုးရအဖွဲ့ဝင်များနှင့် ပြည်ထောင်စု လွှတ်တော်ကိုယ်စားလှယ်များကို လာမည့် တပတ်အတွင်း စတင်ထိုးနံှမည်ဖြစ်ကြောင်း ဒေါ်အောင်ဆန်းစုကြည် က ပြောဆိုသည်။

အဆိုပါ ပြောကြားချက်သည် ကိုဗစ်-၁၉ ကာကွယ်၊ထိန်းချုပ် ကုသရေး အမျိုးသားအဆင့် ဗဟိုကော်မတီ ဥက္ကဌ ဒေါ်အောင်ဆန်းစုကြည် က ဇန်နဝါရီ ၂၁ရက် တွင် ပြည်သူသို့ အစီရင်ခံတင်ပြသည့် မိန့်ခွန်းတွင် ပြောဆိုခဲ့သည်။

“ ပထမဆုံးဦးစားပေးရမှာတော့ ရှေ့တန်းမှာ ဦးဆောင်နေတဲ့ ကျန်းမားရေးဝန်ထမ်းတွေ နဲ့ နိုင်ငံတော် အစိုးရဝန်းထမ်းထဲက အဓိကကျတဲ့ သူတွေကို အရင်ဆုံးထိုးနှံပေးသွားမယ်။ ကျန်းမာရေး ဝန်ထမ်းတွေထဲမှာ အခုဆိုရင် စေတနာ့ ဝန်ထမ်းတွေလည်း ထည့်တွက်ပါတယ်” ဟု ဒေါ်အောင်ဆန်းစုကြည်က ကိုဗစ်ကာကွယ်ဆေးထိုးမယ့် အစီစဉ် မှာပြောကြားသွားခဲ့သည်။

နိုင်ငံတော် ယန္တရားကြီးလည်ပတ်ဖို့ အတွက် ဗဟိုအစိုးရ နှင် တိုင်းနှင့် ပြည်နယ် အစိုးရများလည်း အလွန်အရေးကြီး ကြောင်း၊ ထို့ကြောင့် ပြည်ထောင်စု လွှတ်တော်ကိုယ်စားလှယ်များကိုလည်း ကိုဗစ်-၁၉ ကာကွယ်ဆေး ဦးစွာ ထိုးပေးမည့် ထဲတွင် ပါဝင်ကြောင်း ဒေါ်အောင်ဆန်းစုကြည် က ပြောသည်။

“ ပြည်ထောင်စု လွှတ်တော်က မကြာခင် ခေါ်တော့မှာ ဖြစ်ပါတယ်။ ပြည်ထောင်စုလွှတ်တော်ကို တက်ရောက်ဖို့လည်း ကျမတို့ရဲ့ ကိုယ်စားလှယ် အသီးသီး က တနိုင်ငံလုံး ကနေပြီးတော့ ရောက်ရှိလာကြမှာဖြစ်ပါတယ်။ အဲ့ဒီတော့ ရောက်ရှိလာတဲ့ အချိန် တစုတဝေးတည်း ရှိတဲ့အချိန်မှာ ကာကွယ်ဆေးထိုးပေးခြင်းဟာ လက်တွေ့လည်းကျပါတယ်” ဟု ဒေါ်အောင်ဆန်းစုကြည် က မိန့်ခွန်းတွင် ထည့်သွင်းပြောဆိုသည်။

ကိုဗစ် ကာကွယ်ဆေး ဒုတိယ ဦးစားပေး အုပ်စုသည် ရောဂါ ရရှိမှု လွယ်ကူသူ၊ ရောဂါ အခံအားနည်းသူများ၊ သက်ကြီးရွယ်အိုများကို ထိုးနှံပေးသွားမည် ဟုလည်း ပြောဆိုသွားသည်။

အိန္ဒိယ နိုင်ငံမှ ရောက်ရှိလာမည့် Covishiele ကိုဗစ်ကာကွယ်ဆေး ၁ဒသမ ၅ သန်း သည် ယနေ့(ဇန်နဝါရီ ၂၂ရက်)တွင်ရောက်ရှိလာပြီး လူတဦးလျှင် နှစ်ကြိမ်ထိုးနှံရပြီး၊ လက်ရှိမှာ ကာကွယ်ဆေး သည် လူဦးရေ ၇သိန်းခွဲ အတွက် ရောက်ရှိလာမည် ဖြစ်ကြောင်း သိရသည်။

“ကာကွယ်ဆေးရောက်တော့မယ်ဆိုပြီး မပေါ့ပါနဲ့၊ ဒါဟာ သိပ်အရေးကြီးပါတယ်။ ကျမတို့ ကျန်းမာရေးနဲ့ အားကစားဝန်ကြီးဌာန က သတ်မှတ်ထားတဲ့စည်းမျဉ်းစည်းကမ်းအတိုင်း ဆက်ပြီးတော့ နေပေးပါ” ဟု ဒေါ်အောင်ဆန်းစုကြည်က တိုက်တွန်း ပြောဆိုလိုက်သည်။

ကိုဗစ်ကာကွယ်ဆေး ဝယ်ယူရန် ရန်ပုံငွေထဲသို့ ပြည်သူများက ဝိုင်းဝန်း လှူဒါန်းပေးခဲ့ကြောင်း သိရသည်။