သျှမ်းပြည်နယ် မြောက်ပိုင်း မူစယ် နမ့်ခမ်းလမ်း ပိုင်းပျက်စီးမှုများဖြစ်ပွားသည့် အတွက် ဒေသခံများ၊ ခရီးသွား ပြည်သူများ သွားလာမှု ခက်ခဲနေကြောင်း သိရသည်။

မူစယ် နမ့်ခမ်း လမ်းပိုင်းသည် ၁၉ မိုင်သာ ရှိပြီး၊ လမ်းကောင်းမွန်ပါက ၄၅  မိနစ် သာ ကားမောင်းရကြောင်း၊ လက်ရှိမှာ ကားလမ်း ပျက်စီးမှု၊ ယာဉ်ကြောများ ပိတ်သဖြင့် ၂ နာရီ ကျော် မောင်းရကြောင်းလည်း မူစယ် ဒေသခံများက ပြောသည်။

“ အဓိကတော့ မူစယ် ကောင်မူးတုံ မြို့ပတ်လမ်းကနေ ပန်ခမ်း ကားလမ်းက အဆိုးဆုံးပဲ။ ချိုင့်ခွက်တွေနဲ့။ ကုန်တင်ကားတွေက မိန့်ဟော်ကူးတို့ဆိပ်ကို ပစ္စည်းပို့တာ။ ကုန်တင်ဝန်တွေကလည်း များတော့ လမး်က မခံနိုင်ဘူး။ ကားသေးတွေ သွားဖို့က မလွယ်ဘူး” ဟု မူစယ် မြို့ဒေသခံစိုင်းမြတ် က ပြောသည်။

ကားလမ်းပျက်စီးမှု၊ ကားပိတ်ဆို့သည်ကို မည်သည့် အာဏာပိုင်မှ လာရောက်ဖြေရှင်းမှု မရှိကြောင်း လမ်းပိုင်းအား တာဝန်ယူထားသည့် Oriental Highway ကုမ္ပဏီကလည်း ကားလမ်းကို သေချာ ပြုပြင်ခြင်းမရှိကြောင်းလည်း မူစယ် နမ့်ခမ်းဒေသခံများက ပြောဆိုသည်။

“ ဒီလမ်းကပျက်နေတာ ကြာပြီ။ ချိုင့်ခွက်နေရာကို သဲနဲ့တော့လာဖို့တယ်။ မိုးရွာရင် သဲတွေက ပါသွားပြီ။ နွေရောက်ရင် ဖုန်တွေ က ပြန်ထတယ်။ကတ္တရာလမ်းမှ မခင်းပေးတာ။ မူဆယ် နမ့်ခမ်းသွားဖို့ မလွယ်ဘူး။ ” လို့ နမ့်ခမ်းမြို့ သျှမ်းတိုင်းရင်းသားများ ဒီမိုက ရေစီ အဖွဲ့ချုပ် SNLD မှ တွဲဖက်အတွင်းရေးမှူး စိုင်းနောင့် ကပြောသည်။

မူစယ် နမ့်ခမ်း လမ်းပိုင်း ပျက်စီးမှု၊ လမ်းကြောင်းပိတ်ဆို့မှု သည် မကြာခဏ ဖြစ်ပွားသော်လည်း လမ်းကြောင်းကို သေချာ ပြုပြင်ခြင်းမရှိသည့်အတွက် ပျက်စီးရခြင်းဖြစ်ကြောင်း လည်း စိုင်းနောင့် က ပြောသည်။

“ နမ့်ခမ်း၊ စယ်လန့်ဆို သွားရမှာ ကြောက်တယ်။ လမ်းပိတ်တာကြာပြီး။ ကုန်ကားတွေလည်း နည်းတာမဟုတ်ဘူး။ နေ့တိုင်းဝင်၊ ထွက်သွားလာနေတာ။ လမ်းကြတော့ မပြင်ပေးဘူး။ ၂၂ ဘီးကားတွေလည်း သွားတော့ ပိုဆိုးတယ်” ဟု မူစယ် ဒေသခံ စိုင်းလျန်းဆိုင် က ပြောသည်။

ကားလမ်း ပျက်စီးမှု နှင့် လမ်းကြောပိတ်ဆို့မှု များ နှင့် ပတ်သတ်ပြီး သက်ဆိုင်ရာ တာဝန်ရှိသူများ သေချာ စိစစ်ပြုလုပ်ပေးသင့်ကြောင်း၊ ကုန်တင်ယာဉ်များ၊ ၂၂ဘီးကားများသွားလာရန်အတွက် မြို့ရှောင်လမ်း ဖောက်လုပ်ပေးသင့်ကြောင်း နှင့် လိုင်စင်မဲ့ကားများကိုလည်း စစ်ဆေးသင့်ကြောင်းလည်း မူစယ် နမ့်ခမ်း ဒေသခံများက တောင်းဆိုလိုက်သည်။