ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/SSA) နှင့် တအာင်း(ပလောင်) အမျိုးသား လွှတ်မြောက်ရေး တပ်မတော် (TNLA) တို့တွေ့ဆုံဆွေးနွေးရန် အပြန်အလှန် အဆင်သင့် ဖြစ်နေကြောင်း သိရသည်။
ဇန်နဝါရီ (၁၈) ရက်တွင် (P.S.L.F/T.N.L.A ) ဗဟိုကော်မတီ နှစ်ပတ်လည် အစည်းအဝေး၏ သဘောထား ထုတ်ပြချက်အရ မြန်မာ့တပ်မတော်နှင့် RCSS/SSA အဖွဲ တို့ကို ဆွေးနွေးအဖြေရှာရေးအတွက် အမြဲတမ်း အဆင်သင့်ဖြစ်ကြောင်း ထုတ်ပြန်ခဲ့သည်။
“သူတို့ရဲ့ စိတ်ဆန္ဒသဘောထား အမှန်ဆိုရင်တော့ ဆွေးနွေးဖို့ အဆင်သင့်ပါပဲ။ ကျနော်တို့ဘက်ကတော့ အချိန်မရွေး ဆွေးနွေးဖို့ အဆင်သင့် တံခါးဖွင့်ထားတယ်။ တိုက်ပွဲကာလမှာတော့ ကျနော်တို့ ဆွေးနွေးညှိနှိုင်းတာ မရှိသေးဘူး” ဟု RCSS ၏ပြောရေးဆိုခွင့်ရှိသူ ဒုဗိုလ်မှူးကြီး အုမ်ခေး က သျှမ်းသံတော်ဆင့် ကိုပြောသည်။
ထိုတွေ့ဆုံမှု ကိစ္စနှင့် ပတ်သက်ပြီး TNLAမှ ပြောရေးဆိုခွင့်ရှိသူ တာအိုက်ကျော်ကို သျှမ်းသံတော်ဆင့်က အကြိမ်ကြိမ်ဆက်သွယ်ခဲ့သော်လည်း ဖုန်းကိုင်ဖြေကြားခြင်းမရှိခဲ့ပေ။
နိုင်ငံရေး ပြဿနာကို လက်နက်နှင့် မဖြေရှင်းသင့်ကြောင်း၊ နိုင်ငံရေး စကားဝိုင်းထဲ ဖြေရှင်းသင့်ကြောင်း၊ ယခုလို တွေ့ဆုံဆွေးနွေးညှိနှိုင်းခြင်းသည် ရလဒ်ကောင်းများ ထွက်လာနိုင်ကြောင်းလည်း အိုမ်တမာဝ် လူမှုကူညီရေးအသင်း မိုင်းအဘမ်း ကပြောသည်။
“တိုက်ပွဲ တခုကို လက်နက်နဲ့ ဖြေရှင်းတဲ့ ပဋိပက္ခတွေ နှစ်ပေါင်း (၆၀) (၇၀) ရှိပြီ။ ခုထက်ထိ အဆင်ပြေတာ မတွေ့ဘူး။ အဲ့ဒါကြောင့် လက်နက်နဲ့ မဖြေရှင်းပဲနဲ့ နိုင်ငံရေး စကားဝိုင်းထဲမှာပဲ ဖြေရှင်းတဲ့ဟာကို ပိုကောင်းမယ်။ ဆုံးဖြတ်ချက် ရလဒ်ကတော့ ထွက်လာမှာပါ” မိုင်းအဘမ်း က ဆိုသည်။
RCSS/SSA နှင့် TNLAတို့တွေ့ဆုံဆွေးနွေးမှု အတွက် အပြန်အလှန် အဆင်သင့်ဖြစ်ကြောင်းပြောဆိုနေသော်လည်း လက်တွေ့မှာ တွေ့ဆုံဆွေးနွေးမှု ကိစ္စအတွက် နှစ်ဦးနှစ်ဖက် ကမ်းလှမ်းထားခြင်းမရှိကြသေးပေ။
RCSS/SSA နှင့် TNLA တို့သည် ၂၀၂၀ ခုနှစ် ဒီဇင်ဘာ (၂၅) ရက်မှ စတင်ပြီး သျှမ်းမြောက် နမ္မတူမြို့နယ် နှင့် ကျောက်မဲမြို့နယ်အတွင်း တိုက်ပွဲဖြစ်ပွားကာ စစ်ဘေးရှောင် (၃၇၀၀)ကျော်ဖြစ်ထွက်ပြေးတိမ်းရှောင်ခဲ့ရပြီး၊ အရပ်သား ကျည်ထိမှန်၊ နေအိမ်ပျက်စီးမှုဖြစ်ပွားခဲ့ကြောင်းသိရသည်။
၂၀၂၀ ရွေးကောက်ပွဲ နောက်ပိုင်းတွင် မဟာမိတ်ဖြစ်သည့် ရခိုင်တပ်မတော် (ULA/AA)နှင့် မြန်မာ့တပ်မတော် ထိပ်သီးခေါင်းဆောင် အပြန်အလှန် ဆွေးနွေးမှုများစတင်နိုင်ခဲ့ပြီး ရခိုင်ပြည်တွင်တိုက်ပွဲများ၊ လက်တလောရပ်တန့်နိုင်ခြင်းသည့် အပစ်ခတ်ရပ်စဲရေး ဆွေးနွေးမှု၏ အရေးကြီး သည့် လုပ်ငန်းအစဖြစ်ကြောင်း ထုတ်ပြန်ချက်တွင်ရေးသားထားသည်။
ထို့အပြင် “၂၀၂၀ အလွန် ငြိမ်းချမ်းရေး ဖွဲ့စည်းတည်ဆောက်မှုအသစ်” ဖော်ဆောင်မည် ဟု ဒေါ်အောင်ဆန်းစုကြည် ၏ ၂၀၂၁ နှစ်သစ်နှုတ်ခွန်းဆက် စကားသည် ရှေ့ဆက်ရန် ခက်ခဲနေသည့် ငြိမ်းချမ်းရေး လုပ်ငန်းစဉ်များ ပြန်လည် အစပြုရန် အခြေအနေ ကောင်းများဖြစ်သည် ဟုလည်း TNLA၏ ထုတ်ပြန်ချက်တွင် ဖော်ပြထားသည်။
တိုက်ပွဲကြောင့် အရပ်သားများ ထိခိုက်ဒဏ်ရာ ရခြင်း သေဆုံးသည့် ဒေသခံများလည်း ရှိကြောင်း သိရသည်။
နှစ်ဖက် စစ်ရေးတင်းမာမှုကြောင့် ယနေ့ချိန်ထိ ကျောက်မဲမြို့ပေါ်ရှိ စစ်ရှောင်များ နေရပ်သို့ မပြန်နိုင်သေးပေ။
