လားဟူတိုင်းရင်းသားရေးရာဝန်ကြီး ကို ပြည်ထောင်စုအဆင့်တွင်ထားပေးရန် အတွက် LNDP က အာဏာရပါတီ NLD ကို တောင်းဆိုလိုက်သည်။
ယနေ့ ဇန်နဝါရီ ၁၅ ရက် မနက်ပိုင်း အမျိုးသားဒီမိုကရေစီအဖွဲ့ချုပ် (NLD) ၏တောင်ကြီးမြို့ရှိ ရုံးတွင် ဗဟိုအလုပ်အမှုဆောင်အဖွဲ့ဝင် (၃)ဦးနှင့်တွေ့ဆုံစဉ် လားဟူအမျိုးသားဖွံ့ဖြိုးတိုးတက်ရေးပါတီ LNDP ကတောင်းဆိုခဲ့ခြင်းဖြစ်သည်။
“ ကျမတို့ လားဟူလူမျိုးတွေ က သျှမ်းအရှေ့မှာ ၂ သိန်းကျော်ရှိတယ်။ လားဟူ တိုင်းရင်းသားရေးရာဝန်ကြီး တဦးနဲ့ မလွှမ်းခြုံနိုင်ဘူးဆိုတော့ လားဟူဝန်ကြီးကို ပြည်ထောင်စုအဆင့်မှာထားနိုင်ဖို့အတွက် ဖန်တီးပေးဖို့ ပြောခဲ့ပါတယ်” LNDP မှ ဥက္ကဌ ဒေါ်အေးသီတာမြင့် က ယနေ့ မီဒီယာများကိုတွေ့ဆုံချိန်တွင် ပြောဆိုခဲ့သည်။
သျှမ်းပြည်တဝှမ်းတွင် လားဟူလူမျိုးစုစုပေါင်း ၃သိန်းကျော်ရှိသော်လည်း အခွင့်အရေး တန်းတူမရသည့်အတွက် ဒေသအခွင့်အရေး ရရှိရန် အုပ်ချုပ်ရေး အပိုင်းတွင် ကိုယ်စားပြု ပါဝင်ခွင့်ရရှိရန် ဆွေးနွေးခဲ့ကြောင်း သိရသည်။
ထို့အပြင် ပြည်နယ်နှင့် ပြည်ထောင်စု အဆင့် တွင် လားဟူ လူမျိုးစု ကိုယ်စားပြုခွင့်ရနိုင်ရန်၊ ဒေသဖွံ့ဖြိုးရေး၊ လယ်ယာဖွံ့ဖြိုးရေး ကိစ္စနှင့် လားဟူလူမျိုးအတွက် မှတ်ပုံတင်၊ အိမ်ထောင်စုစာရင်းများ အလွယ်တကူ ပြုလုပ်နိုင်ရန် တင်ပြတောင်းဆိုခဲ့ကြောင်း ဒေါ်အေးသီတာမြင့် ကပြောသည်။
ယနေ့ မနက်ပိုင်း NLD ဗဟိုအလုပ်အမှုဆောင် အဖွဲ့ဝင် အနေဖြင့် ရှမ်းတိုင်းရင်းသားများ ဒီမိုကရေစီ အဖွဲ့ချုပ်(SNLD)ပါတီ၊ ရှမ်းတိုင်းရင်းသားများ ဒီမိုကရက်တစ်ပါတီ(SNDP)၊ လားဟူအမျိုးသား ဖွံ့ဖြိုးတိုးတက်ရေး ပါတီ (LNDP)နှင့် “ဝ” အမျိုးသားပါတီတို့နှင့် တေ့ွဆုံခဲ့ကြောင်းသိရသည်။
NLD ဗဟိုအလုပ်အမှုဆောင်အဖွဲ့သည် ဇန်နဝါရီ (၁၃)ရက်ကတည်းကတောင်ကြီးသို့ရောက်ရှိကာ တအာင်းအမျိုးသားပါတီ(TNP)၊ ပအိုဝ်းအမျိုးသားအဖွဲ့ချုပ် ( PNO)နှင့်လည်းကောင်း ဇန်နဝါရီ (၁၄)ရက်တွင် ကယန်းအမျိုးသားပါတီနှင့် သျှမ်းပြည် အစိုးရ အဖွဲ့ဝင် ကချင်တိုင်းရင်းသားရေးရာ ဝန်ကြီး ဦးဇုတ်ဒေါင်( တသီးပုဂ္ဂလိက ကိုယ်စားလှယ်) တို့နှင့်လည်းကောင်း တွေ့ဆုံခဲ့သည်။
သျှမ်းပြည်ရှိ ဒေသခံတိုင်းရင်းသားပါတီများနှင့်တွေ့ဆုံရန် ရောက်ရှိနေသော
NLD ဗဟိုအလုပ်အမှုဆောင် ကော်မတီ အဖွဲ့ဝင်များမှာ မကွေးတိုင်း ဝန်ကြီးချုပ် ဒေါက်တာ အောင်မိုးညို၊ ကရင်ပြည်နယ် ဝန်ကြီးချုပ် ဒေါ်နန်းခင်ထွေးမြင့်နှင့် ကချင်ပြည်နယ် အမျိုးသားလွှတ်တော်ကိုယ်စားလှယ် ဦးအင်ထုံးခါးနော်ဆန် တို့ဖြစ်ကြောင်းသိရသည်။ ၎င်းတို့သည် ပြည်ထောင်စုအစိုးရဖွဲ့စည်းရန်အတွက် ၂၀၂၀ ရွေးကောက်ပွဲအနိုင်ရ ပါတီ ၄၈ ခုနှင့်တွေ့ဆုံသွားမည်ဟုလည်း နိုင်ငံရေးပါတီများအသိုင်းအဝိုင်းထံမှသိရသည်။
