အမျိုးသား ဒီမိုကရေစီ အဖွဲ့ချုပ် (NLD) ပါတီ ဗဟိုအလုပ်အမှုဆောင် ကော်မတီဝင်များ နှင့် တအာင်း (ပလောင်) အမျိုးသားပါတီ တို့တွေ့ဆုံမှုတွင် (TNP) ဖက်မှ အချက်(၁၅) ချက်တင်ပြထားကြောင်း ဆွေးနွေးပွဲ အပြီးတွင် (TNP) ပါတီ၏ အထွေထွေ အတွင်းရေးမှူးကပြောကြားခဲ့သည် ။

“ ဒီတွေ့ဆုံမှုကသဘောတူညီချက်တော့ မဟုတ်ပါဘူ။း ကျနော်တို့တင်ပြချင်တာလေး ကို တင်ပြပေးလိုက်တယ်။ သူတို့ကနေပြီး ဗဟိုကို ပြန်တင်ပြပေးမှာပေါ့။ တင်ပြစရာ ရှိတာတော့ တင်ပြပြီးပြီ NLD က တိုင်းရင်းသားတွေအပေါ်ဘယ်လိုသဘော ထားတယ် ဆိုတဲ့ မူဝါဒအပေါ် ဆွေးနွေးတယ် ၊ ဖယ်ဒရယ်ပြည်ထောင်စုအရေးပေါ့ ၊ ဘယ်လိုပူးပေါင်း ဆောင်ရွက် မလဲ ဘယ်လိုညှိနှိုင်းဆောင်ရွက်မလဲဆိုတာကို ဆွေးနွေးတယ် ” ဟု တအာန်း(ပလောင်) အမျိုးသား ပါတီမှ အထွေထွေအတွင်းရေးမှူး ဦးမိုင်းအုဏ်းခိုင် ကပြောသည် ။

အဆိုပါဆွေးနွေးပွဲတွင် ယေဘုယျအားဖြင့်ဒီမိုကရေစီနှင့် ဖယ်ဒရယ် ပြည်ထောင်စု အရေး ကိစ္စများတွင် တိုင်းရင်းသားပါတီ များ အနေနှင့် မည်သို့ပူးပေါင်းဆောင်ရွက် သွားရန် စသည့် အရေးကိစ္စများ အဓိကထားဆွေးနွေးဖြစ်ကြောင်းနှင့် အလားတူဆွေး နွေးပွဲမျိုးထံမံဆွေးနွေးနိုင်ရန်မျှော်လင့်ပြီး ဆွေးနွေးပွဲ အောင်မြင်လိမ့်မည် ဟု ဦးမိုင်းအုဏ်းခိုင် ကဆက်လက် ပြောကြားသွားခဲ့သည် ။

NLD ပါတီ ၏ဗဟို အလုပ်အမှုဆောင် ကော်မတီဝင် (၃) ဦးမှာ မကွေးတိုင်း ဝန်ကြီးချုပ် ဒေါက်တာ အောင်မိုးညို၊ ကရင်ပြည်နယ် ဝန်ကြီးချုပ် ဒေါ်နန်းခင်ထွေးမြင့်၊ ကချင်ပြည်နယ် အမျိုးသား လွှတ်တော် ကိုယ်စားလှယ် ဦးအင်တုံခါးနော်စံ တို့ဖြစ်သည်။

ထိုသူ (၃)ဦးသည် သျှမ်းပြည်နယ် အတွင်းရှိ တိုင်းရင်းသားပါတီများနှင့် တွေ့ဆုံဆွေးနွေးရန် တောင်ကြီးမြို့သို့ ဇန်နဝါရီ(၁၃)ရက်နေ့ကရောက်ရှိပြီး ပထမနေ့ တွင် တအာင်း (ပလောင်) အမျိုးသား ပါတီ မှ ဒု ဥက္ကဌ ဦးညီစိန်၊ အထွေထွေအတွင်းရေးမှူး ဦးမိုင်းအုဏ်းခိုင် ၊ ပအိုဝ်း အမျိုးသား အဖွဲ့ချုပ် PNO ပါတီမှ ဥက္ကဌ ဦးခွန်စံလွင်၊ အထွေထွေ အတွင်းရေးမှူး ဦးခွန်သိန်းဖေ၊ ရုံးအဖွဲ့မှူး စောခွန်ကျော်ဝင်း တို့နှင့် တွေ့ဆုံ ဆွေးနွေးခဲ့ကြောင်းသိရှိရ သည်။