ထိုင်းအစိုးရ မှ ရွှေ့ပြောင်းအလုပ်သမားများထံ ကိုဗစ်-၁၉ ကျန်းမာရေး စစ်ဆေးခ(ဘတ် ၃၀၀၀) ကောက်ယူနေသည့် ကိစ္စ ကို အလုပ်သမားများ ကန့်ကွက်ကြောင်း စုံစမ်းသိရသည်။
ထိုင်းနိုင်ငံတွင် အလုပ်လုပ်နေသည့် ရွှေ့ပြောင်းအလုပ်သမားများ ဗီဇာသက်တမ်းတိုးရာတွင် ကိုဗစ်-၁၉ ကျန်းမာရေး စစ်ဆေးရမည်ကိစ္စ လုပ်ဆောင်ရမည်ဖြစ်ပြီး၊ ကိုဗစ်-၁၉ စစ်ဆေးရာတွင် ဘတ် ၃၀၀၀ ကောက်ယူမည်ဟု ထုတ်ပြန်ကြေညာခဲ့သည်။
ထိုထုတ်ပြန်ချက်တွင် ထိုင်းနိုင်ငံတွင် တရားမဝင်ထပ်မံရောက်ရှိလာသော ရွှေ့ပြောင်းအလုပ်သမားများအား တရားဝင်နေထိုင်ခွင့် အလုပ်လုပ်ခွင့်ပြုလုပ်ရန်အတွက်ထိုသို့ စစ်ဆေးပေးခြင်းဖြစ်ကြောင်း ၊ ထိုသို့စစ်ဆေးရာတွင် ဘတ် ၃၀၀၀ ကောက်ခံမည်ဖြစ်ကြောင်း ရေးသားထားသော်လည်း လက်တွေ့တွင် ယခင်ရှိရင်းစွဲ တရားဝင်နည်းလမ်းဖြင့် အလုပ်လုပ်နေသူများသက်တမ်းတိုးရာတွင်လည်း ထည့်သွင်းကောက်ခံသွားမည် ဟုဆိုသဖြင့် အလုပ်သမားများက ကန့်ကွက်ခြင်းဖြစ်ကြောင်း သိရသည်။
“ ဒီလ ၂၅ရက် ကနေစပြီး အလုပ်သမားကဒ်၊ ဗီဇာ သက်တမ်းတိုးမယ့် ရွှေ့ပြောင်းအလုပ်သမားတွေ ကိုဗစ်-၁၉ ကျန်းမာရေး ပါစစ်ဆေးရမယ်။ ကိုဗစ်- ၁၉ စစ်ဆေးခ ဘတ်(၃၀၀၀) ပေးရမယ်။ ဒါက အရမ်းကို များတဲ့အတွက် ကျမတို့ မပေးနိုင်ဘူး” ဟု ထိုင်းနိုင်ငံချင်းမိုင်တွင် အလုပ်လုပ်နေသည့် နန်းဆာ က ပြောသည်။
ကိုဗစ်-၁၉ ကူးစက်ရောဂါကြောင့် ထိုင်းရောက် ရွှေ့ပြောင်းအလုပ်သမားများ ၂၀၂၀ ခုနှစ်အတွင်း လစာလျှော့ချခံရသကဲ့သို့ အလုပ်လက်မဲ့ခြင်းများ ရင်ဆိုင်ကြုံနေရကြောင်း၊ ရွှေ့ပြောင်းအလုပ်သမားများကို ထိုင်းအစိုးရ အနေဖြင့် ကိုဗစ်-၁၉ ကျန်းမာရေး စစ်ဆေးခ လျှော့ချပေးစေချင်ကြောင်းလည်း နန်းဆာ က ပြောသည်။
“ အခု ထိုင်းအစိုးရ က တမျိုး၊ နောက်ပွဲစားကတမျိုးနဲ့မျိုးစုံ သတင်းထွက်နေတယ်။ တချို့ ကျတော့လည်း ကိုယ် စစ်တဲ့ ဆေးရုံနဲ့ ဆိုင်တယ်လို့ ပြောတယ်။ ဒီကာလ စုဆောင်းရတဲ့ငွေကလည်း ခက်တယ်လေ” ဟု မဝင်းအေး က ပြောသည်။
လက်ရှိမှာ ထိုင်းအစိုးရ မှ ရွှေ့ပြောင်းအလုပ်သမားများထံ ကိုဗစ်-၁၉ ကျန်းမာရေး စစ်ဆေးခ(ဘတ်၃၀၀၀) ကောက်ယူမည့် ကိစ္စနှင့် ပတ်သက်ပြီး ရွှေ့ပြောင်းအလုပ်သမားများနှင့် လုပ်ငန်းရှင်များ အားလုံးပူးပေါင်း ပါဝင်ကာ ကန့်ကွက်ပေးကြရန် ရွှေ့ပြောင်းအလုပ်သမားအရေး ဆောင်ရွက်သူများက ပြောဆိုလိုက်သည်။
“ ကျနော်တို့ ကိုဗစ်-၁၉ စစ်ဆေးခ ဘတ် ၃၀၀၀ ပေးရမယ့်ကိစ္စကို ကန့်ကွက်တဲ့အနေနဲ့ အလုပ်သမားတွေ ပါဝင်ပေးဖို့ ပြောချင်ပါတယ်။ အခု ကျနော်တို့ အွန်လိုင်းကနေတဆင့် ကောက်နေပါတယ်” ရွှေ့ပြောင်းအလုပ်သမားအရေး ဆောင်ရွက်နေသည့် HRDF မှ စိုင်းပိန်း ကသျှမ်းသံတော်ဆင့်ကို ပြောသည်။
အဆိုပါ ကန့်ကွက်စာများကို ထိုင်းနိုင်ငံချင်းမိုင် နှင့် သက်ဆိုင်ရာဌာနများထံ တင်ပြသွားမည်ဖြစ်ကြောင်း၊ ထို ကောက်ခံမှုကို ရွှေ့ပြောင်းအလုပ်သမားများနှင့် အလုပ်ရှင်များလည်း ပါဝင်ပေးရန် တိုက်တွန်းလိုကြောင်း စိုင်းပိန်း က ပြောသည်။
ထိုင်းနိုင်ငံတွင် မြန်မာနိုင်ငံသား ရွှေ့ပြောင်းအလုပ်သမားများ အလုပ်လုပ်နေသည့် ဆမွတ်ဆာခွန်း ခရိုင် ရှိ မဟာချိုင် (ပုဇွန်ဈေး)မှ ရောဂါ ကူးစက်မှုနှုန်းမြင့်မားလာပြီးနောက်ပိုင်း အလုပ်သမားများအပေါ်ထိုသို့ပိုမိုတင်းကြပ်မှုများပြုလုပ်လာခဲ့ခြင်းဖြစ်ကြောင်း သိရသည်။
Leave a Comments