သျှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/SSA) နှင့် တအောင်း(ပလောင်) လွတ်မြောက်ရေးတပ်မတော် (TNLA) တို့တိုက်ပွဲဖြစ်ပွားမှုကြောင့် စစ်ဘေးရှောင် (၂၀၀၀) နီးပါး ရှိပြီဖြစ်ကြောင်း စုံစမ်းသိရှိရသည်။
ဇန်နဝါရီ (၅) ရက် တိုင်းရင်းသားလက်နက်ကိုင်တပ်ဖွဲ့ (၂) ဖွဲ့ တိုက်ပွဲပြင်းထန်မှုကြောင့် သျှမ်းပြည်မြောက်ပိုင်း နမ္မတူမြို့ရှိ မန်စံဘုန်းကြီးကျောင်း နှင့် နားဆိုင်း စာသင်ကျောင်းမှာ စစ်ဘေးရှောင် (၈၀၀) ကျော်ရောက်ရှိနေပြီး စားနပ်ရိက္ခာ လိုအပ်နေကြောင်း စစ်ဘေးရှောင်ကူညီနေသည့်သူများက သျှမ်းသံတော်ဆင့် ကိုပြောသည်။
“စစ်ဘေးရှောင်တွေကို စားနပ်ရိက္ခာသွားကူညီပေးဖို့ ကျနော်တို့ ပြင်ဆင်နေပါပြီ။” မန်စံစစ်ဘေးရှောင်စခန်းမှာ သွားရောက်ကူညီမည့် လုံးဘဉာဏ် က သျှမ်းသံတော်ဆင့် ကိုပြောသည်။
အလားတူ သျှမ်းပြည်ပြည်မြောက်ပိုင်း ကျောက်မဲမြို့ပေါ်တွင်လည်း စစ်ဘေးရှောင် (၁၀၀၀)ကျော်ရှိပြီး ပစ်ခတ်သံ မကြားရပေမယ့် ဒေသခံများ နေရပ်သို့ မပြန်ဝံ့သေးကြောင်း ကျောက်မဲမြို့ လူမှုကူညီရေးအသင်း ဥက္ကဋ္ဌ ဦးတင်မောင်သိန်း က သျှမ်းသံတော်ဆင့် ကိုပြောသည်။
“တိုက်ပွဲအခြေနေက လောလောဆယ်တော့ အသံမကြားရဘူးဗျ။ သို့သော်လည်းပဲ တိုက်ပွဲဖြစ်နေတယ်ဆိုရင် သိရင်တော့ တမျိုးပေါ့လေ။ ဒါမယ့် နယ်မြေအေးချမ်းတယ်လို့တော့ ပြောလို့မရဘူး” ဟု ဦးတင်မောင်သိန်း က ပြောသည်။
နှစ်ဖက် တိုက်ပွဲကြာမြင့်လျှင် စားနပ်ရိက္ခာများလည်း ပြဿနာ ဖြစ်လာနိုင်ကြောင်းလည်း ၎င်းက ပြောဆိုသည်။
“ရက်ရှည်မယ်လို့ ယူဆပါတယ်။ အခြေနေအရ ကြည့်ရတာပေါ့လေ။ စစ်ရှောင်တွေကတော့ လျှင်လျှင်မြန်မြန်တော့ ပြန်သွားနိုင်မယ်မထင်ဘူးဗျ။ အဲ့တော့ နည်းနည်းလေးကြာမယ်ဆိုရင်တော့ ဒီမှာ ရိက္ခာပြဿနာတက်လာနိုင်တယ်။ လူတစ်ထောင်လောက် ကျွေးမွေးနေတဲ့ ရိက္ခာက မလွယ်ဘူးပေါ့ဗျာ။” ဟု ဦးတင်မောင်သိန်း က ပြောဆိုလိုက်သည်။
သျှမ်းပြည်မြောက်ပိုင်းတွင် RCSS/SSA နှင့် TNLA ကြားဖြစ်ပွားသည့် တိုက်ပွဲသည် ဒီဇင်ဘာ (၂၅) ရက်မှ စတင်ကာ ယနေ့ချိန်ထိ နှစ်ဘက်စစ်တပ် တင်းမာနေပြီး ကျောက်မဲမြို့တွင် စစ်ရှောင် (၁၀၀၀) ကျော်၊ နမ္မတူမြို့နယ်တွင် စစ်ရှောင် (၈၇၂)ဦး ထိရှိလာကြောင်း သိရသည်။
ဇန်နဝါရီ (၅) ရက် နမ္မတူမြို့နယ် ပန်ချင်အုပ်စုအတွင်း ညောင်ဆွယ်ကျေးရွာ နှင့် မိုင်းဟုန်းရွာကြား RCSS/SSA နှင့် TNLA တို့ တိုက်ပွဲဖြစ်ပွားရာ ဒေသခံ အမျိုးသား တဦးလက်နက်ထိမှန်သေဆုံးခဲ့ပြီး၊ အမျိုးသားတစ်ဦး ဒဏ်ရာရရှိကာ နေအိမ်တလုံး လက်နက်ကြီးထိမှန်ပြီး မီးလောင်ခဲ့သည်။
Leave a Comments