သျှမ်းပြည်မြောက်ပိုင်း ကျောက်မဲခရိုင်အတွင်း တိုင်းရင်းသာ လက်နက်ကိုင် အချင်းချင်းကြား တိုက်ပွဲဖြစ်ပွားမှုကြောင့် စစ်ဘေးရှောင် ၁၀၀၀ ခန့် ထွက်ပြေးတိမ်းရှောင်နေရကြောင်း စုံစမ်းသိရသည်။
ထိုစစ်ဘေးရှောင်များသည် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် တအာင်း(ပလောင်) အမျိုးသား လွတ်မြောက်ရေး တပ်မတော်(TNLA)တို့ ဒီဇင်ဘာ ၂၅ ရက်မှ စတင်ကာဖြစ်ပွားသည့် တိုက်ပွဲကြောင့် ထွက်ပြေးတိမ်းရှောင်လာသူများဖြစ်သည်။
“ ကျောက်မဲမြို့ပေါ်မှာ စစ်ဘေးရှောင် ၁၀၀၀ခန့်ရှိပြီ၊ ဒီနေ့ ဖြစ်ပွားတဲ့ တိုက်ပွဲမှာလည်းရွာသားတွေ ကျေးရွာအတွင်းမှာ ပိတ်မိနေသေးတယ်။ နှစ်ဖက်တပ်စစ်ရေးက တင်းမာနေသေးတယ်” ဟု ကျောက်မဲမြို့ စစ်ဘေးရှောင်များကို ကူညီပေးနေသည့် ဦးတင်မောင်သိန်း က သျှမ်းသံတော်ဆင့်ကို ပြောသည်။
RCSS/SSA နှင့် TNLA တို့ ယနေ့ချိန်ထိ စစ်ရေးတင်းမာမှုရှိနေကြပြီး ကျောက်မဲမြို့နယ်တွင် စစ်ရှောင်များ (၁၀၀၀) ခန့်ရှိပြီး နမ္မတူမြို့နယ် မန်စံကျေးရွာတွင် စစ်ရှောင် (၇၀) ကျော် ထွက်ပြေးတိမ်းရှောင်နေရကြောင်းသိရသည်။
“ဇန်နဝါရီ ၂ ရက်နေ့က ပန်ချင်ကျေးရွာမှာ တစ်ဖက်ပစ်အသံကြားရတဲ့အတွက် စစ်ရှောင် (၇၃) ဦး မန်စံဘုန်းကြီးကျောင်းမှာ ရောက်ရှိလာပါတယ်” ဟု နမ္မတူမြို့နယ် မန်စံကျေးရွာ စစ်ရှောင်များကို ကူညီပေးနေသည့် စေတနာ့ဝန်ထမ်း ပါ့ခမ်း က သျှမ်းသံတော်ဆင့်ကို ပြောသည်။
တိုင်းရင်းသားလက်နက်ကိုင် တပ်ဖွဲ့ ၂ဖွဲ့ သည် စစ်ရေး တင်းမာနေပြီး လက်ရှိမှာ ကျောက်မဲမြို့နယ် အတွင်း တိုက်ပွဲများပြင်းထန်နေဆဲဖြစ်သဖြင့် စစ်ရှောင်များထပ်မံရောက်လာနိုင်ကြောင်းလည်း စစ်ဘေးရှောင်များကို ကူညီပေးနေသည့်သူများက ပြောသည်။
“ တိုက်ပွဲက ဒီနေ့ထိ ဖြစ်နေသေးတယ်။ တချို့ ကျေးရွာတွေ ပိတ်မိနေသေးတယ်။ ဆင်းမလာသေး တာတွေရှိတယ်။ စစ်ရှောင်တွေထပ်တိုးလာဖို့ရှိတယ်” ဟု ဦးတင်မောင်းသိန်း က ထပ်လောင်းပြောသည်။
လက်ရှိမှာ စစ်ဘေးရှောင်များအတွက် အစားအသောက် အဆင်ပြေနေသေးသော်လည်း တိုက်ပွဲများ ဆက်လက်ပြင်းထန်ပါက စစ်ဘေးရှောင်များအတွက် စားဝတ်နေရေးခက်ခဲနိုင်ကြောင်းလည်း စစ်ဘေးရှောင်များကို ကူညီနေသူများက ပြောဆိုလိုက်သည်။
RCSS/SSAနှင့် TNLAတို့ ကြားဖြစ်ပွားသည့်တိုက်ပွဲကြောင့် အမျိုးသားတဦး ကျည်ထိမှန်သေဆုံးခဲ့ပြီးကိုယ်ဝန်သည် အမျိုးသမီး တဦး အပါအဝင် အမျိုးသမီး ၂ဦး နှင့် အမျိုးသားတဦး ကျည်ထိမှန်ခဲ့ကြောင်းသိရသည်။
ထို့ပြင် တိုက်ပွဲကြောင့် အရပ်သားနေအိမ်နှင့် ကျေးရွာ ဘုန်းကြီးကျောင်းလည်း ကျည်ထိမှန် ပျက်စီးခဲ့ကြောင်းသိရသည်။
Leave a Comments