သျှမ်းပြည်မြောက်ပိုင်း ကျောက်မဲမြို့နယ် တော့ဆန်ရွာမ တွင် ယနေ့ (ဇန်နဝါရီ ၄)ရက် မနက် (၆)နာရီတွင် RCSS နှင့် TNLA တို့ တိုက်ပွဲ ပြင်းထန်နေကြောင်း စုံစမ်းသိရသည်။

သျှမ်းပြည် ပြန်လည် ထူထောင်ရေး ကောင်စီ၊ သျှမ်းပြည်တပ်မတော်(RCSS/SSA) နှင့် တအာင်း(ပလောင်) အမျိုးသားလွတ်မြောက်ရေးတပ်မတော် ( TNLA)တို့သည် ယနေ့မနက် (၆)နာရီ မှစတင်ကာ ကျောက်မဲမြို့ တော့ဆန်ရွာမ တွင် တိုက်ပွဲပြင်းထန်နေကြောင်း RCSS/SSAပြောရေးဆိုခွင့်ရှိသူ ဗိုလ်မှူး ခမ်းစံ က သျှမ်းသံတော်ဆင့်ကို ပြောသည်။

ဒီနေ့ တိုက်ပွဲဖြစ်ပွားတာ ပြင်းထန်တယ်။ လက်ရှိချိန်ထိ စစ်ရေးတင်းမာနေပြီး နှစ်ဖက် စစ်အင်အားတွေ ဖြည့်နေသေးတယ်။ ဒီလထဲ TNLA နဲ့ တိုက်ပွဲဖြစ်တာ ၅ ကြိမ်လောက်ရှိသွားပါပြီ” ဟု ဗိုလ်မှူးခမ်းစံ က ဆိုသည်။

RCSS/SSA အနေဖြင့် ယနေ့ဖြစ်ပွားသည့် တိုက်ပွဲ အခြေအနေကို အသေးစိတ်ကို မသိရှိရသေးပေ။

RCSS/SSA နှင့် TNLA တို့သည် ယနေ့ မနက်(၆)နာရီမှစတင်ကာ လက်ရှိအချိန်ထိ စစ်ရေးပြင်းထန်နေကြောင်း၊ တိုက်ပွဲကြောင့် ဒေသခံ ပြည်သူများ နေအိမ်တွင်း ပုန်းခိုနေရကြောင်း လည်း မြေပြင်ဒေသခံ အမျိုးသားတဦး ပြောပြချက် အရသိရသည်။

လက်ရှိတိုက်ပွဲ မှာ မြေပြင်သတင်းအရ နှစ်ဖက် ထိခိုက်ဒဏ်ရာရရှိကြောင်း မြေပြင် ဒေသခံအမျိုးသားတဦး က ပြောသည်။

“နှစ်ဖက် ထိခိုက်ဒဏ်ရာ ရတဲ့သူတွေတော့ ရှိတယ်လို့ကြားတယ်။ ရွာသားတွေကတော့ အိမ်ထဲကနေ အိမ်ပြင်ကို မထွက်ရဲကြသေးဘူး။” ဟု ၎င်း အမျိုးသား က ဆိုသည်။

အဆိုပါ တိုက်ပွဲဖြစ်ပွားမှု နှင့် ပတ်သက်ပြီး TNLA မှ ပြောရေးဆိုခွင့်ကို သျှမ်းသံတော်ဆင့်မှ ဆက်သွယ်မေးမြန်းရာ ဖြေဆိုခြင်း မရှိခဲ့ပေ။

PSL/TNLA ၏ သတင်းထုတ်ပြန်ချက်အရ ဇန်နဝါရီ (၃ ) ရက်တွင် RCSS နှင့် TNLA တို့သည် ၃နေရာ တိုက်ပွဲဖြစ်ပွားခဲ့ကြောင်းသိရသည်။

RCSS/SSA နှင့်TNLA တို့သည် ၂၀၂၀ ခုနစ် ဒီဇင်ဘာ ၂၅ရက်မှ စတင်ကာ ယနေ့ချိန်ထိ တိုက်ပွဲဖြစ်ပွားနေပြီး၊ ထိုတိုက်ပွဲ ကြောင့် စစ်ရှောင် ၁၀၀၀ နီးပါး ထွက်ပြေးတိမ်းရှောင်နေရကြောင်းသိရသည်။