သျှမ်းပြည်မြောက်ပိုင်းမူဆယ်မြို့နယ် ခိုဝိန်းကျေးရွာတွင် ယမန်နေ့ (ဇန်နဝါရီ ၁)ရက်၌ အမျိုးသားတဦး သေနတ်ပစ်သတ်ခံရကြောင်း စုံစမ်းသိရသည်။
အဆိုပါ သေနတ်ပစ်ခံရသည့် အမျိုးသားသည် အသက် ၂၅နှစ်အရွယ်ရှိပြီး၊ ခိုဝိန်းကျေးရွာ နမ့်ပေါချောင်းဘေး နမ့်ပေါ့စက္ကူစက်ရုံအနီးတွင် သေနတ်ပစ်သတ်ခံရကြောင်း မူဆယ်မြို့ ဂရုဏာလူမှုကူညီရေးအသင်းမှ ဦးသောင်းထွန်းက သျှမ်းသံတော်ဆင့်ကို ပြောသည်။
“ သေနတ်ပစ်ခံရပြီး သေသွားသူက တရုတ်နိုင်ငံသားလို့ သိရပါတယ်။ ဘယ်ဘက်နားထင်ကျည်ဝင် ညာဘက် ခေါင်းကနေဖောက်ထွက် ဒဏ်ရာရထားတယ်။ နောက်ပြီး ခြေလက် ကို ကြိုးတုပ်နှောင်ထားတယ်” ဟု ဦးသောင်းထွန်း က ပြောပြသည်။
သေနတ်ပစ်ခံရသူ၏ ခြေလက်များကို နိုင်လွန်ကြိုးဖြင့် တုပ်နှောင်ထားပြီး၊ မျက်နှာ နှင့် ပါးစပ်ကို အဝတ်ဖြင့် ပတ်စည်းထားကာ ဘယ်ဘက်နားထင် မှ ညာဘက် ခေါင်း ကျည်ထွက် ဒဏ်ရာကို တွေ့ရကြောင်းလည်း ဦးသောင်းထွန်းက ဆိုသည်။
ထို့ပြင် သေဆုံးသူ၏ ရုပ်အလောင်းဘေးတွင် ၉ မမ ကျည်ဆံခွံ ၂ခုကို တွေ့ရကြောင်း၊ မည်သည့် အဖွဲ့အစည်းမှ လာရောက် ပစ်ခတ်သွားသည်ကို မူဆယ်မြို့မ ရဲစခန်းမှ စုံးစမ်းနေဆဲဟု သိရသည်။
“ ဒီနယ်မြေက လူစုံတဲ့နေရာ၊ လောင်းကစား၊ မူးယစ်ဆေး တွေပေါတဲ့နေရာဖြစ်သလို လက်နက်တွေလည်းပေါတယ်။ သေနတ်ပစ်သတ်ခံရတိုင်း တရားခံကတော့ မမိဖူးဘူး” ဟု မူဆယ်မြို့နေ စိုင်းအောင် က သျှမ်းသံတော်ဆင့်ကိုပြောသည်။
မူဆယ်မြို့သည် တရုတ်နယ်စပ်မြို့ဖြစ်ပြီး လက်နက်အလွယ်တကူ ဝယ်ယူနိုင်သည့်နေရာဖြစ်ကာ မူးယစ်ဆေးဝါး၊ လောင်းကစား ပေါများသည့် နေရာဒေသ လည်းဖြစ်သည်။
