သျှမ်းပြည် မြောက်ပိုင်း ကျောက်မဲမြို့နယ် အတွင်း တိုင်းရင်းသားလက်နက်ကိုင် တပ်ဖွဲ့(၂)ဖွဲ့ စစ်ရေး တင်းမာနေသေးသဖြင့် ဒေသခံ ပြည်သူများ ယနေ့ထိ ထွက်ပြေးတိမ်းရှောင်နေရဆဲ ဟု စစ်ရှောင်ကူညီပေးနေသည့် သူများက ပြောဆိုလိုက်သည်။
ကျောက်မဲမြို့နယ် လွယ်အံကျေးရွာ အုပ်စု အနီးတွင် ဒီဇင်ဘာ ၂၅ရက်မှစတင်ကာ သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော်(RCSS/SSA)နှင့် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA)တို့တိုက်ပွဲဖြစ်ပွားကာ ယနေ့ချိန်ထိ စစ်ရေးတင်းမာနေသဖြင့် ထိုအနီးတွင်နေထိုင်သည့် ပြည်သူများ ထွက်ပြေးတိမ်းရှောင်နေရဆဲ ဟု စစ်ဘေးရှောင်ကူညီနေသည့်သူများက ပြောဆိုလိုက်သည်။
“ စစ်ရေးကတော့ ၂ဖက် စလုံး တင်းမာနေတုန်းပါ။ သေနတ်သံတွေ ခဏခဏကြားနေရတော့ စစ်ရှောင်တွေကတော့ တဖွဲဖွဲ ထွက်ပြေးလာနေတုန်းပါ” ဟု စစ်ရှောင်များကို ကူညီနေသည့် အိုမ်တမာဝ် လူမှုကူညီရေးအသင်းမှ မိုင်းအဘမ်း က သျှမ်းသံတော်ဆင့်ကို ပြောသည်။
တိုက်ပွဲကြောင့် စစ်ဘေးရှောင်များသည် ကျောက်မဲမြို့ ပေါ်တွင် စစ်ရှောင်စခန်း (၄)ခုဖွင့်ထားပြီး၊ ဒီဇင်ဘာ ၃၁ရက် စာရင်းအရ စစ်ရှောင်ဦးရေ (၇၉၃)ဦးရှိကြောင်း၊ ထိုစစ်ရှောင်များအတွင်း စားဝတ်နေရေး အခက်အခဲ ဖြစ်နေကြောင်းလည်း မိုင်းအဘမ်း က ပြောသည်။
ထိုစစ်ဘေးရှောင်များတွင် သက်ကြီးရွယ်အို၊ အမျိုးသမီး နှင့် ကလေးငယ်များ၊မွေးကင်းစကလေးငယ်များပါဝင်နေကြောင်း သိရသည်။
“ သျှမ်းပြည် ဆောင်းက အရမ်းအေးတော့ စစ်ရှောင်တွေအတွက် အခင်းတွေ လိုတယ်။ စောင်တွေက ရှိပေမယ့် သူတို့ ကော်ဇောနဲ့ ပဲအိပ်ရတော့ ရေရှည် ပြဿနာရှိလာနိုင်တယ်။ စစ်ရှောင်တွေ အတွက် မွေ့ယာအပါးလေးရရင်တော့ ကောင်းတယ်” ဟု မိုင်းအဘမ်းက ဆက်လက်ပြောသည်။
ထို့အပြင် တဖက်တွင် ကိုဗစ်-၁၉ ကူးစက်မြန် ရောဂါကို နေ့စဉ်နှင့် အမျှတိုးနေချိန် တဖက်တွင် စစ်ရေး တင်းမာနေကာ စစ်ဘေးရှောင်များအတွက် ကျန်းမာရေးလည်း စိုးရိမ်နေရကြောင်း စစ်ဘေးရှောင်ကူညီသူများက ပြောသည်။
“ ကိုဗစ်-၁၉ ကာကွယ်ထိန်းချုပ်ကာလမှာ ကျန်းမာရေး ဌာနကတော့ ၆ပေ အကွာနေဖို့ ထုတ်ပြန်ခဲ့ပေမယ့် စစ်ရှောင်တွေအတွက်တော့ ၆ပေလည်း မကွာမနေနိုင်ဘူး။ ဒီတိုင်း ပဲ စုနေရတာပဲ။ ကျန်းမာရေးအတွက်လည်း စိုးရိမ်နေရတယ်” ဟု အဆိုပါ စစ်ဘေးရှောင်များကို ကူညီပေးနေသည့် အမျိုးသမီး တဦး ကပြောသည်။
ယနေ့ ဇန်နဝါရီ ၁ရက် တွင်လည်း ကျောက်မဲမြို့နယ် တော့ဆန်ကျေးရွာတွင် တိုင်းရင်းသားလက်နက်ကိုင်တပ်ဖွဲ့၂ဖွဲ့ တိုက်ပွဲ ဆက်လက်ဖြစ်ပွားခဲ့ပြီး လက်နက်ကြီး ၅လုံးခန့်ပစ်ခတ်မှုရှိသဖြင့် စစ်ဘေးရှောင်များ ထပ်မံထွက်ပြေးနေရကြောင်း သိရသည်။
တိုက်ပွဲဖြစ်ပွားနေသည့် ကျောက်မဲမြို့နယ် လွယ်အံတင်းနှင့် တော့ဆန် တကြောတွင် တိုင်းရင်းသား လက်နက်ကိုင် တပ်ဖွဲ့ ၂ဖွဲ့စလုံး စစ်အင်အားဖြည့်တင်းနေပြီး၊ စစ်ရေး ဆက်လက်ဖြစ်ပွားလာနိုင်ကြောင်းလည်း စစ်ရှောင်များ ကပြောဆိုလိုက်သည်။
ကိုဗစ်-၁၉ ထိန်းချုပ်သည့်ကာလ၊ အေးချမ်းသည့်ကာလအတွင်း တိုင်းရင်းသားလက်နက်ကိုင်များအနေဖြင့် စစ်ရေး ထပ်မံမဖြစ်ပွားကြရန်နှင့် နိုင်ငံရေး ကို စစ်ရေးဖြင့် မဖြေရှင်းကြဘဲ စကားဝိုင်းတွင်ဖြေရှင်းကြရန် စစ်ရှောင်ပြည်သူများ၏ မျက်နှာကို ထောက်ထားကြရန် လည်း စစ်ဘေးရှောင်များကို ကူညီသူများ ပြောဆိုလိုက်သည်။
ယနေ့ ကျောက်မဲမြို့နယ် အတွင်း ဖြစ်ပွားသည့် တိုက်ပွဲ အခြေအနေနှင့် ပတ်သက်ပြီး RCSS/SSAနှင့် TNLAမှ ပြောရေးဆိုခွင့်ရှိသူများကို သျှမ်းသံတော်ဆင့် မှ အကြိမ်ကြိမ်ဆက်သွယ်မေးမြန်းသော်လည်း ဖုန်းကိုင်ဖြေဆိုခြင်းမရှိခဲ့ပေ။
သျှမ်းပြည် မြောက်ပိုင်း အတွင်း RCSS/SSA နှင့် TNLA တို့သည် ဒီဇင်ဘာ လဆန်းပိုင်းက စတင်ကာ စစ်ရေး ဖြစ်ပွားခဲ့ကာ ထိုစစ်ရေးကြောင့် နမ္မတူမြို့နယ်တွင် အရပ်သားထိခိုက်ဒဏ်ရာရရှိခဲ့ကြောင်းသိရသည်။
