သျှမ်းပြည်မြောက်ပိုင်း ကျောက်မဲမြို့နယ် အတွင်း ယနေ့ (ဒီဇင်ဘာ ၂၅)ရက် မနက် ၅နာရီမှ စတင်ကာ သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော်( RCSS/SSA) နှင့် တအာင်း(ပလောင်) အမျိုးသားလွတ်မြောက်ရေးတပ်မတော်(TNLA)တို့ တိုက်ပွဲ ဖြစ်ပွားခဲ့ကြောင်း စုံစမ်းသိရသည်။
အဆိုပါဖြစ်ပွားသည့် တိုက်ပွဲသည် ကျောက်မဲမြို့နယ် လွယ်အံကျေးရွာအုပ်စု ပန်မခံကျေးရွာအနီးတွင် ယနေ့ မနက် ၅နာရီမှ နေ့လည် ၁၁နာရီထိဖြစ်ပွားခဲ့ကြောင်း၊ လူထိခိုက်မှု ဒဏ်ရာရရှိမှုမရှိကြောင်းလည်း RCSS/SSA ပြောရေးဆိုခွင့်ရှိသူ ဒုဗိုလ်မှူးကြီး အုမ်ခေး က သျှမ်းသံတော်ဆင့်ကို ပြောသည်။
“ တိုက်ပွဲကတော့ မနက် ၅နာရီကနေ စဖြစ်တာ နေ့လည် ၁၁နာရီထိဖြစ်တယ်။ လူထိခိုက်မှုတော့မဖြစ်ဘူး။လက်ရှိ အချိန်ထိတော့ စစ်ရေးတင်းမာနေဆဲပါ” ဟု ဒုဗိုလ်မှူးကြီး အုမ်ခေး က ဆိုသည်။
ယနေ့ တိုက်ပွဲဖြစ်ပွားသည့်နေရာသည် ကျောက်မဲမြို့နှင့် မိုင် ၂၀ခန့်ဝေးကွာသည့်နေရာဖြစ်ပြီး၊ ကျေးရွာနှင့်ဝေးကွာသည့်နေရာဖြစ်ကြောင်း လည်း ဒုဗိုလ်မှူးကြီး အုမ်ခေး က ပြောသည်။
“ ဒီနေ့ တိုက်ပွဲက လက်နက်ကြီး၊ လက်နက်ငယ်သံတွေ တော်တော်ကျယ်တယ်။ မနက် ၄နာရီလောက်ကဖြစ်တာ နေ့လည်ထိ အသံကြားနေရတယ်” ဟု ပန်မခံကျေးရွာ မှဒေသခံ တဦးက သျှမ်းသံတော်ဆင့်ကို ပြောသည်။
TNLA မှ RCSS/SSA တပ်ရှိသည့်နေရာကို လာရောက်တိုက်ခိုက်သဖြင့် တိုက်ပွဲဖြစ်ပွားရခြင်းဖြစ်ကြောင်း နှင့် လူသွားလမ်းတလျောက်တွင် မိုင်းများကိုတွေ့ရှိရသဖြင့် မိုင်းရှင်းလင်းမှုကိုလည်း RCSS/SSAမှ ပြုလုပ်ခဲ့ရကြောင်း ဒုဗိုလ်မှူးကြီး အုမ်ခေး က ပြောသည်။
“ ကျနော်တို့ TNLA တပ်ဘက်က ပစ္စည်းတွေ သိမ်းရမိတယ်။ သူတို့ (TNLA)က ထောင်ထားတဲ့မိုင်းကိုလည်း ရှင်းပေးခဲ့ရတယ်” ဟု ဒုဗိုလ်မှူးကြီး အုမ်ခေး ကပြောသည်။
အဆိုပါတိုက်ပွဲနှင့် ပတ်သက်ပြီး TNLA မှပြောရေးဆိုခွင့်ရှိသူ ဗိုလ်မှူး တားအိုက်ကျော်ကို သျှမ်းသံတော်ဆင့်မှ ဆက်သွယ်မေးမြန်းရာ တိုက်ပွဲအခြေအနေကို အသေးစိတ်မသိရသေးကြောင်း ပြောဆိုခဲ့သည်။
ယခုလ အတွင်း TNLA နှင့် RCSS/SSAတို့သည် သျှမ်းပြည်မြောက်ပိုင်းနမ္မတူမြို့နယ်အတွင်း မကြာခဏထိတွေ့မှုဖြစ်ပွားကာ အရပ်သား (၄)ဦးကျည်ထိမှန်ခဲ့ရကြောင်း သိရသည်။
Leave a Comments