သျှမ်းပြည်မြောက်ပိုင်း နမ္မတူမြို့နယ်တွင်းရှိ တိုက်ပွဲကြောင့် နှစ်ကျော့ပြန် ထွက်ပြေးတိမ်းရှောင်ခဲ့သည့် ဒေသခံများ မိမိနေရပ်သို့ စိုးရိမ်စိတ်ဖြင့်ပြန်သွားပြီဖြစ်ကြောင်း စုံစမ်းသိရှိရသည်။
သျှမ်းပြည်မြောက်ပိုင်း နမ္မတူမြို့နယ် အတွင်း တိုင်းရင်းသားလက်နက်ကိုင် အချင်းချင်းကြားဖြစ်ပွားသည့် တိုက်ပွဲကြောင့် မန်စံဘုန်းကြီးကျောင်းသို့ စစ်ဘေးရှောင်ပြည်သူ (၁၈၀) ခန့် ရောက်ရှိလာခဲ့ပြီး ယနေ့ (ဒီဇင်ဘာ ၂၃)ရက် မနက်ပိုင်းတွင် မိမိနေရပ်သို့ ပြန်သွားပြီဖြစ်ကြောင်း စစ်ရှောင်များကို ကူညီပေးနေသည့်သူများထံသိရသည်။
“ဒီနေ့ မနက် အကုန်ပြန်သွားပါပြီ။ ပန်ချင် ဘုန်းကြီးကျောင်းမှာ ရှိတဲ့ စစ်ဘေးရှောင်တွေကတော့ ပြီးခဲ့တဲ့ (၂) ရက်လောက်က ပြန်သွားကြပြီ” မန်စံဘုန်းကြီးကျောင်းမှာ ကူညီနေသည့် စေတနာ့ဝန်ထမ်း ပါ့ခမ်းမီး က သျှမ်းသံတော်ဆင့် ကိုပြောသည်။
နမ္မတူမြို့နယ်အတွင်း စစ်ဘေးရှောင်များ စခန်း(၂) နေရာ ထားရှိပြီး ထို ၂ နေရာသည် မန်စံ ရွှေစကားဝါကျောင်း နှင့် ပန်ချင်ဘုန်းကြီးကျောင်းတို့ဖြစ်ကြောင်း သိရသည်။
ဒီဇင်ဘာ (၁၇) ရက်နေ့လည်ပိုင်းက ပစ်ခတ်မှု ငြိမ်နေသဖြင့် စစ်ဘေးရှောင်များ နေရပ်သို့ ပြန်သွားကာ နာရီပိုင်းအကြာတွင် ရှမ်းပြည်ပြန်လည်ထူထောင်ရေးကောင်စီ၊ ရှမ်းပြည်တပ်မတော် (RCSS/SSA) နှင့် တအောင်း (ပလောင်) အမျိုးသားလွတ်မြောက်ရေးတပ်မတော် (TNLA) တို့ တိုက်ပွပြန်ဖြစ်ပွားမှုကြောင့် နှစ်ကျော့ပြန် စစ်ပြန်ရှောင်လာခဲ့ရသူများဖြစ်ကြောင်းသိရသည်။
RCSS/SSA နှင့် မြောက်ပိုင်းမဟာမိတ်တို့ တိုက်ပွဲဖြစ်ပွားခဲ့သဖြင့် ဒေသခံများ ဒီဇင်ဘာလ အတွင်း (၂) ကြိမ်ထွက်ပြေး တိမ်းရှောင်ခဲ့ရသည်။
လက်ရှိ အခြေအနေ အရ တိုက်ပွဲများ ငြိမ်သက်နေသော်လည်း ဒေသခံပြည်သူများ တိုက်ပွဲပြန်လည်ဖြစ်မည်ကို စိုးရိမ်ကြပြီး မိမိနေရပ်သို့ ပြန်သွားကြောင်း ဒေသခံများက ပြောဆိုကြသည်။
နမ္မတူမြို့နယ်အတွင်း ဒီဇင်ဘာ (၉) ရက်မှ စတင်ကာ တိုင်းရင်းသား လက်နက်ကိုင် အချင်းချင်း တိုက်ပွဲဖြစ်ပွားခဲ့ပြီး ကိုယ်ဝန်သည် အမျိုးသမီးတဦး အပါအဝင် အမျိုးသမီး ၃ ဦး နှင့် အမျိုးသား ၁ ဦး ကျည်ထိ မှန်ခဲ့ရကြောင်းသိရသည်။
