သျှမ်းပြည်မြောက်ပိုင်း နမ္မတူမြို့နယ်အတွင်း တိုက်ပွဲများ ငြိမ်နေသော်လည်း စစ်ဘေးရှောင် ၂၀၀ ကျော် နေရပ် မပြန်နိုင်သေးကြောင်း စုံစမ်းသိရှိရသည်။
“ခုလောလောဆယ်တော့ တိုက်ပွဲက ငြိမ်နေတယ်။ ဘယ်ဘက်မှ စစ်အင်အားဖြည့်တာလည်းမရှိဘူး။ ရွာသားတချို့တော့ ပြန်နိုင်ကြပေမယ့်တချို့ကမပြန်နိုင်သေးဘူး” – ဟု RCSS/SSA မှပြောခွင့်ရှိသူ ဒု- ဗိုလ်မှူးကြီး အုမ်ခေး ကသျှမ်းသံတော်ဆင့်အားပြောသည်။
RCSS နှင့် မြောက်ပိုင်းမဟာမိတ်တပ်ဖွဲ့တို့ကြား၊ အစိုးရတပ်မတော်နှင့် TNLA တို့ကြားတိုက်ပွဲများကြောင့် ဒီဇင်ဘာ (၁၅) ရက်အထိ မန်စံဘုန်းကြီးကျောင်းတွင် စစ်ဘေးရှောင်ပြည်သူ စုစုပေါင်း (၂၁၂) ဦးရှိနေသေးသည်ဟု မြန်မာနိုင်ငံ လူမှုကယ်ဆယ်ရေးအဖွဲ့ (နမ္မတူ)မေတ္တာရှင် နာရေးလူမှု ကူညီ ရေးအသင်း ကိုချစ်မွှေး က ဆိုသည်။
“ကျနော်တို့ မနေ့က ပြန်လာတဲ့ လမ်းတစ်လျှောက် စစ်သားတွေကြီးပဲ။ အစိုးရ စစ်ကြောင်းတွေ။ မန်စံ နဲ့ နမ္မတူကြားမှာ။ စစ်ရှောင်တွေကတော့ မပြန်ရဲကြသေးဘူး။ ပြန်ရင်လည်း တိုက်ပွဲဖြစ်ရင် ပြန်ပြေးလာရမယ်ဆိုတော့ မထူးဘူးလေ။ အားလုံးတော့ မန်စံ ဘုန်းကြီးကျောင်းမှာပဲ။” ဟု ကိုချစ်မွှေး က သျှမ်းသံတော်ဆင့် ကိုပြောသည်။
ဒီဇင်ဘာ ၇ ရက်မှ ၁၀ ရက်နေ့ထိ သျှမ်းပြည်မြောက်ပိုင်း နမ္မတူမြို့နယ်တွင်း RCSS နှင့် TNLA တို့ကြား တိုက်ပွဲ (၃) ကြိမ်ခန့် ဖြစ်ပွားခဲ့ပြီး ဒေသခံ ပြည်သူများ မန်စံဘုန်းကြီးကျောင်းသို့ ရောက်ရှိ လာခဲ့သည်။
“စစ်ရေးတင်းမာနေဆဲ။ ဘယ်သူမှ မဆုတ်ခွာသေးဘူး။ သီပေါကနေသွားရင် မန်စံမရောက်ခင် အစိုးရ တပ်ရှိတယ်။ မန်စံကနေဆင်းရင် လားရှိုးအလာလမ်းမှာ တအောင်းတပ် ရှိတယ်။ စပါးရိတ်သိမ်းချိန် ဖြစ်လို့ စစ်ရှောင်တွေ အခက်တွေ့နေရပါတယ်။” စစ်ရှောင်ပြည်သူများကို သွားရောက်ကူညီသည့် ဒေသခံ တစ်ဦးက ပြောသည်။
ဒီဇင်ဘာ ၅ ရက်နေ့က စပြီး နမ္မတူမြို့နယ် နားကျဲရွာ ၊ ကွန်ကျောင်းရွာဘက်တွင် တိုက်ပွဲများဖြစ်ပွါးခဲ့ရာ ဒေသခံလူထု ရာနှင့်ချီစစ်ဘေးရှောင်ခဲ့ရသည်။ အဆိုပါတိုက်ပွဲများကြား အစိုးရတပ်မတော်မှလည်း ၀င်ရောက် နေရာယူလှုပ်ရှားသဖြင့် ဒေသခံလူထုတို့ နေရပ်တွင်မနေရဲကြတော့ဘဲနေရပ်စွန့်ခွါခဲ့ကြသည်။
“ဒီချိန်က စပါးသိမ်းချိန် ပြောင်းချိုးချိန်ဆိုတော့ ကျနော်တို့က ပြောင်းသွားချိုးရမှာ။ ခုအိမ်လည်းမပြန်နိုင်သေးတော့အရမ်းစိတ်ပူနေတယ် ”- ဟု စစ်ရှောင် လုံးစိုင်းက ပြောသည်။
အဆိုပါတိုက်ပွဲများကြောင့် ဒေသခံ ရွာသား (၄) ဦး ထိခိုက်ဒဏ်ရာရှိခဲ့ပြီး၊ ဒေသခံ (၂၀၀) ကျော် နေရပ်သို့စွန့်ခွာခဲ့ကာ ယနေ့ချိန်ထိ ဘုန်းကြီးကျောင်းတွင်ခိုလှုံနေကြရသည်။
