သျှမ်းပြည်တောင်ပိုင်းတွင် ယခု ၂၀၂၀ ခုနှစ်အတွင်း ကိုဗစ်ကူးစက်မှုကြောင့် တားမြစ်ချက်များ ထုတ်ပြန်ထားသော်လည်း ယာဉ်တိုက်မှုပိုမိုဖြစ်ပွါးကာ သေဆုံးမှုပိုမိုများပြားနေကြောင်း စုံစမ်း သိရှိရသည်။
ယခုနှစ် ဧပြီလ သျှမ်းပြည်အတွင်း ကိုဗစ် ၁၉ စတင်ကူးစက်လာသည့်စအချိန်ကစပြီး သျှမ်းပြည်နယ်အစိုးရကမြို့အ၀င်အထွက် Lockdown ချခြင်း ညမထွက်ရမိန့်များထုတ်ပြန်ခြင်းများစဉ်ဆက်မပြတ်လုပ်ထားသော်လည်း ယာဉ်တိုက်မှုကြောင့် သေဆုံးမှုနှုန်းမှာ ယမာန်နှစ်ကထက်ပိုမိုများပြားနေကြောင်းသိရသည်။
“ ကိုဗစ် ပထမလှိုင်းတုန်းကတော့ ယာဉ်တိုက်မှုနည်းတယ်။ ဒီနောက်ပိုင်းမှာတော့ ပြန်တော့ တက်လာတယ်။ အများအားဖြင့် တိုက်တာက ဆိုင်ကယ်နဲ့ ကားနဲတိုက်တာ များတယ်” ဟု အမှတ် ၁၈ ဒုယာဉ်ထိန်းရဲသျှမ်းတောင် ဦးအောင်မိုးက ပြောသည်။
သျှမ်းတောင်တွင် (၁၀) လပိုင်း ၁၁ လ ပိုင်းအထိ ယာဉ်တိုက်မှုပေါင်း ၈၀ မှုထိရှိကြောင်း နှင့် သေဆုံးသူ ၃၂ ဦးထိရှိကြောင်းသိရသည်။
“ ၁၀ လပိုင်းတုန်းကတော့ ယာဉ်တိုက်မှူပေါင်းက ၄၃ မှုရှိတယ်။ ၁၁ ပိုင်းမှာတော့ ၃၇ မှုရှိတယ်။ ၁၀ လပိုင်းမှာက ၁၃ ဦးရှိတယ်။ နိုဝင်ဘာ မှာကတော့ ၁၉ ဦးရှိတယ်။ ဒါကတော့ သေဆုံးမှုတွေပေါ့။ သေဆုံးတော့များတယ်။ အမှုတော့နည်းတယ်”ဟု ဉီးအောင်မိုး ကပြောသည်။
အဆိုပါ ယာဉ်တိုက်မှုများပြားပြီး သေဆုံးသူများသောကြောင့် ပြည်သူများအနေဖြင့် ယာဉ်စည်းကမ်း၊ လမ်းစည်းကမ်းကို ပိုမိုလိုက်နာ စေလိုကြောင်း ဦးအောင်မိုးကပြောသည်။
“ မနက်မိုးလင်းတာနဲ့ စားဝတ်နေရေးအတွက် လူတိုင်းက အပြင်သွားအလုပ်လုပ်ကြရတယ်။ အဲတာကို ကိုယ်သွားတဲ့လမ်းပေါ်မှုတည်ပြီးတော့ စည်းကမ်းတွေလိုက်နာပါ” ဟု ဉီးအောင်မိုး က ထပ်လောင်းပြောသည်။
၂၀၁၉ ခုနှစ်က သျှမ်းပြည်တောင်ပိုင်းတွင်ယာဉ်တိုက်မှုအကြိမ်ရေ ၅၁၃ မှုရှိပြီး ဒဏ်ရာရရှိသူ ၇၉၄ ဉီးရှိကြောင်း သေဆုံးသူ ၂၆၇ ဉီးရှိကြောင်း မော်တော်ယာဉ်ထိန်းသိမ်းရေးဌာနက ထုတ်ပြန်ထားသည်။
ယခုနှစ်တွင် ယာဉ်တိုက်မှုအကြိမ်ရေ စုစုပေါင်းမသိရသေးသော်လည်း လက်ရှိအခြေအနေအထိ ယမန်နှစ်ကထက်ပိုများနိုင်ကြောင်းလည်း မော်တော်ယာဉ်ထိန်းသိမ်းရေးက ပြောဆိုပါသည်။
တဖက်တွင်လည်း သျှမ်းပြည်တွင်ယာဉ်တိုက်မှု ဖြစ်ပွါးရသည့်အဓိကအကြောင်းရင်းမှာ အရှိန်ပြင်းစွာ မောင်းနှင်ခြင်း၊ အရက်သေစာသောင်စားမူးယစ်ပြီးမောင်းနှင်ခြင်း၊ ယာဉ်မောင်းနေစဉ် လက်ကိုင်ဖုန်းအသုံးပြုခြင်းတို့ဖြစ်ကြောင်း လည်း မော်တော်ယာဉ်ထိန်းသိမ်းရေးဌာနက ဖော်ပြထားသည်။
Leave a Comments