သျှမ်းပြည်တောင်ပိုင်း တောင်ကြီးမြို့နယ်တွင် ကိုဗစ်-၁၉ ပိုမိုများပြားလာပါက ကျန်းမာရေး ဝန်ထမ်းအင်အား လုံလောက်မှု မရှိနိုင်ကြောင်း မြို့နယ် ပြည်သူ့ကျန်းမာရေး ဦးစီးဌာနမှူး ကပြောသည်။

ဒီဇင်ဘာ (၁၅) ရက်ထိ တောင်ကြီးမြို့နယ်တွင် ကိုဗစ်-၁၉ ကူးစက်သူ စုစုပေါင်း (၁၃၁) ဦးရှိကြောင်း သိရသည်။

“ကိုဗစ်က ဒီထက်များလာလို့ရှိရင် ကျနော်တို့ဝန်ထမ်းတွေ အနေနဲ့ ပိုပြီးတော့မှ လိုအပ်မှု ရှိလာမှာပေါ့နော်။ ကျန်းမာရေး စောင့်ရှောက်မှုဆိုရင်တော့ ဝန်ထမ်းအင်အားက လုံလောက်မှု အနေအထားပေါ့။ သို့သော်လည်း ကိုဗစ်ကို ရင်ဆိုင်ရတဲ့အချိန်မှာ ကျနော်တို့က မလုံလောက်နိုင်ဘူးပေါ့။” ဟု မြို့နယ် ပြည်သူ့ကျန်းမာရေး ဦးစီးဌာနမှူး ဒေါက်တာ မိုးထွန်း က သျှမ်းသံတော်ဆင့် ကိုပြောသည်။

တောင်ကြီးမြို့ပေါ်တွင် Quarantine Center စုစုပေါင်း (၁၃) ခု ဖွင့်လှစ်ထားပြီး ပိုးတွေ့ လူနာ ပိုမိုများပြားလာပါက တိုးချဲ့ရန် လိုအပ်ကြောင်း၊ ဝန်ထမ်း အင်အားအနေဖြင့်လည်း လုံလောက်မှု ရှိနိုင်မည် မဟုတ်ကြောင်း ဒေါက်တာ မိုးထွန်း ကပြောသည်။

“Quarantine Center တွေကတော့ လိုအပ်လို့ရှိရင်တော့ တိုးချဲ့မှာပေါ့နော်။ ဒါပေမယ့် ဝန်ထမ်းအင်အား အနေနဲ့ကတော့ လုံလောက်မှု ရှိနိုင်မှာမဟုတ်တော့ဘူး။ ပိုးတွေ့တဲ့ လူနာ များလာမယ်ဆိုရင် ပိုးတွေ့လူနာ တစ်ယောက် နောက်မှာက သူ့ရဲ့ အိမ်မှာ Quarantine ဝင်ရမှာက ၅ ယောက်လောက်ရှိမယ်ဆိုလို့ရှိရင် Quarantine ဝင်ဖို့က တစ်ဖြေးဖြေး ပိုများလာမှာပေါ့နော်။” ဟု ဒေါက်တာ မိုးထွန်း ကဆိုသည်။

Quarantine ဝင်သူများ၏ ဓါတ်ခွဲနမူနာကို ၃ ရက်မြောက်နေ့တွင် ၁ ကြိမ် နှင့် ၁၁ ရက်မြောက်နေ့တွင် ၁ ကြိမ် စုစုပေါင်း ၂ ကြိမ် စစ်ဆေးရမည်ဖြစ် သဖြင့် ၂ ဆ ပိုမို အလုပ်လုပ်သွားရမည်ဖြစ်ကြောင်း ဒေါက်တာမိုးထွန်း ကပြောသည်။

“လူနာက အစတုန်းက (၁၀၀) မကျော်သေးဘူးပေါ့နော်။ အခုက ၁၃၁ ဖြစ်သွားပြီဆိုတော့ သူတို့ Positive ဖြစ်တာနဲ့အမျှ နောက်မှာပဲ သူတို့နဲ့ ထိတွေ့ခဲ့တဲ့သူတွေက ၅ ယောက်လောက်တွေ့ရင် ကျနော်တို့က ၆၅၀ ကျော်လောက်ဖြစ်မှာပေါေ့နာ်။ Quarantine Center မြို့ပေါ် ၁၃ ခုရှိတယ်။ အဲ့ ၁၃ ခုမှာ လူတွေက ပြည့်နေပြီပေါ့နော်။ ဟိုနေ့ဆိုရင် swab ယူတာ ၅၀၀ ကျော်လောက်ရှိတာပေါ့နော်။
ကျနော်တို့ ကျန်းမာရေး အနေနဲ့ တစ်ယောက်တည်းယူရင် လူ (၅၀၀) ဘယ်လို လုပ်ပြီး ယူနိုင်မှာတုနး် လူအင်အားကို ၈ ယောက်ထားပြီးတော့မှ ၂ နေရာကို တစ်ယောက်နှုန်းနဲ့ သွားယူရတဲ့ အနေအထားဖြစ်သွားတာပေါ့။ ဝန်ထမ်းအင်အားနဲ့ဆိုရင် အခက်အခဲက အများကြီးဖြစ်နေပြီ။” ဒေါက်တာမိုးထွန်း ကပြောသည်။

သျှမ်းပြည်တောင်ပိုင်း ပြည်သူ့ကျန်းမာရေး ဓါတ်ခွဲမှု ဌာနဆိုင်ရာ (တောင်ကြီး) ထုတ်ပြန်ချက်အရ သျှမ်းပြည်နယ်တွင် ကိုဗစ်-၁၉ ကူးစက်သူ စုစုပေါင်း (၇၀၃) ဦး ရှိပြီး၊ သျှမ်းပြည်တောင်ပိုင်း (၄၃၇) ဦး၊ သျှမ်းပြည်မြောက်ပိုင်း (၁၄၁) ဦး နှင့် သျှမ်းပြည်အရှေ့ပိုင်း ( ၁၂၅) ဦး တို့ဖြစ်ကြောင်း ထုတ်ပြန်ချက်အရ သိရသည်။