သျှမ်းပြည်မြောက်ပိုင်း နမ္မတူမြို့နယ်အတွင်း RCSS/SSA နှင့်မဟာမိတ် တပ်ပေါင်းစုတို့အကြား တိုက်ပွဲကြောင့် စစ်ရှောင် (၂၅၀) ကျော် ရှိလာကြောင်း စုံစမ်းသိရှိရသည်။

ဒီဇင်ဘာ (၉) ရက် မနက်ပိုင်း နမ္မတူမြို့နယ် အတွင်း မြောက်ပိုင်းမဟာမိတ်တပ်ဖွဲ့နှင့် RCSS/SSA တို့အကြား မန်စံကျေးရွာအုပ်စု နားကျဲကျေးရွာ၊ ကွန်ကျောင်းကျေးရွာ၊ နားကျိုင်းကျေးရွာ နှင့် ပိန်းလုံ ကျေးရွာ တို့မှ စုစုပေါင်း လူဦးရေ (၂၅၀) ဦး နှင့် အိမ်ထောင်စုပေါင်း (၈၄) စု တို့ ထွက်ပြေးတိမ်းရှောင်ရကြောင်း သိရသည်။

“တိုက်ပွဲသံတော့ ဒီနေ့ မကြားရသေးဘူး။ အသံမကြားရတော့ တစ်ချို့လည်း ပြန်သွားတဲ့သူ ရှိတယ်။ ဒီနေ့ ဘာမှ မကြားရင်တော့ ပြန်ဖို့ ပြင်ဆင်နေတယ်။ ဘာလို့လဲဆိုတော့ ကောက်ရိတ်ချိန် ပြောင်းချိုးချိန်ဖြစ်နေတော့” ဟု စစ်ဘေးရှောင် သွားရောက်ကူညီသည့် လုံးစိုင်းဘဉာဏ် က သျှမ်းသံတော်ဆင့် ကိုပြောသည်။

ယနေ့ လက်ရှိအခြေနေသည် မြောက်ပိုင်းမဟာမိတ်တပ်များ စစ်အင်အားဖြည့်ထားခြင်း၊ အစိုးရတပ်မတော်မှ တိုက်ပွဲဖြစ်သည့် နေရာများကို ကွင်းဆင်းစစ်ဆေးနေကြာင်း နမ္မတူဒေသခံများ ပြောပြချက်အရ သိရသည်။

“ဒီနေ့အခြေနေတော့ တပ်ပေါင်းစုတွေ စစ်အင်အားဖြည့်နေတုန်းပါ။ မနေ့က တိုက်ပွဲဖြစ်တဲ့နေရာမှာ အစိုးရတပ်မတော်ဘက်က ကွင်းဆင်းစစ်ဆေးနေပါတယ်။ နှစ်ဖက် စစ်ရေးတင်းမာတဲ့ အခြေနေရှိသေးတော့ စိုးရိမ်နေရပါသေးတယ်။” ဟု နမ္မတူ ဒေသခံ တစ်ဦး ကပြောသည်။

ယမန်နေ့က RCSS နှင့် မြောက်ပိုင်းမဟာမိတ်တို့ တိုက်ပွဲဖြစ်ပြီး နားကျဲကျေးရွာရှိ ဒေသခံ နေအိမ်အတွင်း လက်နက်ကြီးကျရောက်ပေမယ့် ပေါက်ကွဲမှု မရှိကြောင်း သိရသည်။

ဒီဇင်ဘာ (၅) ရက်နေ့ မနက်ပိုင်းတွင်လည်း ကာလအတန်ကြာ စစ်ရေးတင်းမာကြပြီးနောက် သျှမ်းပြည်မြောက်ပိုင်းသီပေါမြို့နယ်အတွင်း RCSS နှင့် SSPP ထိတွေ့မှု တိုက်ပွဲဖြစ်ပွားခဲ့သည်။