သျှမ်းပြည်ပြန်လည်ထူးထောင်ရေးကောင်စီ၊ သျှမ်းပြည်တပ်မတော် (RCSS/SSA )တပ်ဖွဲ့ဝင် ၄ဦး နှင့် အရပ်သား ၂ဦး ကို မြန်မာတပ်မတော် တပ်သား တဦး က တရားလို အဖြစ် တရား စွဲဆိုထားကြောင်းသိရသည်။

အဆိုပါ ၆ ဦးကို လက်နက်မှု ကိုင် နှင့် ဓားမြမှု ဖြင့် အရှေ့ပိုင်းတိုင်း စစ်ဌာနချုပ် မှ တရားလို ပြုကာ တရားစွဲဆိုထားကြောင်း သိရသည်။

ဖြစ်စဉ်မှာ ဒီဇင်ဘာ လကုန်ပိုင်းတွင် RCSS/SSA တပ်ဖွဲ့ဝင် ၄ဦး နှင့် အရပ်သား ၂ဦးသည် သျှမ်းပြည်နယ် တောင်ပိုင်း ရပ်စောက် နှင့် နောင်ချို ကားလမ်းပေါ်ရှိ တဲတွင် ညအိပ်ကာ မြန်မာတပ်မတော်မှ ဝင်ရောက် ဖမ်းဆီး ခဲ့ကြောင်း ဖမ်းဆီးခံရသူ ၆ ဦးအား ရှေ့နေလိုက်ပေးနေသည့် စဝ်မြဝတီ က သျှမ်းသံတော်ဆင့်ကို ပြောပြသည်။

“ အဖမ်းခံရတာတော့ ဒီဇင်ဘာ လကုန်လောက်ကပါ။ ဒါပေမယ့် တရားရုံးတင်ခဲ့တာကတော့ လွန်ခဲ့တဲ့ ၂ လ မှ။ အခု သူတို့ကို လက်နက်မှုနဲ့ဓားမြမှု တောင်ကြီး ခရိုင် တရားရုံးမှာ စွဲချက်တင်ဖို့ဆုံးဖြတ်လိုက်ပါတယ်။တောင်ကြီး ခရိုင်ရုံးက ဆုံးဖြတ်ချက် ချလိုက်တဲ့ စွဲချက်တင်ဖို့ကိစ္စကို ကျမ ကတော့ စွဲချက်ပြယ်ဖို့အတွက် သျှမ်းပြည် လွှတ်တော် ကို တက်မယ်” ဟု စဝ်မြဝတီက ဆိုသည်။

ဖမ်းဆီးခံထားရသည့် သူများထံတွင် သေနတ်များ၊ ကျည်များ၊ ဖုန်းများ၊ ကွန်ပျူတာနှင့် အလှူငွေကောက်ခံသည့် ပြေစာများ ပါတွေ့ရှိကြောင်းလည်း စဝ်မြဝတီက ပြောသည်။

ထို့အပြင် ဖမ်းခံရသည့် အရပ်သား၂ ဦးမှာ တဦးသည် မျက်မမြင်ဖြစ်ပြီး၊ နောက်တဦးမှာ စျေးသည်ဖြစ်ကြောင်း၊ စျေးသည်မှာ ဆိုင်ကယ်ဘီးပေါက်သဖြင့် တဲ ထဲသို့ဝင်ရောက် အိပ်ရာမှ အဖမ်းခံရခြင်းဖြစ်ကြောင်း သိရသည်။

လက်ရှိ အဖမ်းဆီးခံရသည့် RCSS/SSA တပ်သား ၄ ဦး နှင့် အရပ်သား ၂ ဦးကို တောင်ကြီးမြို့ အမှတ်(၂) ရဲစခန်းတွင် ထားရှိထားကြောင်းသိရသည်။

လက်နက်မှု အနေဖြင့် ထောင်ဒဏ် ရ နှစ် ထိ ချနိုင်ပြီး၊ ဓားမြမှု အနေဖြင့်ထောင်ဒဏ် ၁၀နှစ်မှ တသက်တကျွန်း ကျနိုင်ကြောင်းလည်း သိရသည်။

RCSS /SSA တပ်ဖွဲ့အနေနဲ့ တနိုင်ငံလုံး အပစ်ခတ်ရပ်စဲရေး သဘောတူညီ စာချုပ် ( NCA) လက်မှတ်ရေးထိုးထားသည့် အဖွဲ့ဝင် တခုဖြစ်ပြီး၊ နယ်မြေများတွင် လွတ်လပ်စွာ သွားလာခွင့်ရှိကြောင်း RCSS/SSA တောင်ကြီး မြို့ဆက်ဆံရေး ရုံး တာဝန်ခံ ဒုတိယ ဗိုလ်မှူးကြီး စိုင်းဦး က ပြောသည်။

“ တပ်ဖွဲ့ရှိတဲ့နေရာ သွားဝိုင်းတာ သွားဖမ်းတာတွေက NCA ချိုးဖောက်ရာ ရောက်ပါတယ်။ လက်ရှိ ရပ်စောက်မှာ အဖမ်းခံရတာ တပ်ဖွဲ့ဝင် ၄ဦး အရပ်သား ၂ဦးပါ။ ဒီတပ်သားတွေ ဖမ်းဆီးတဲ့ ကိစ္စကို JMC မှာ ဆက်ဆွေးနွေးဖို့ ရှိပါတယ်” ဟ ဒုထိယ ဗိုလ်မှူးကြီး စိုင်းဦး က ဆိုသည်။

တိုင်းရင်းသား လက်နက်ကိုင် တပ်ဖွဲ့များနှင့် မြန်မာ တပ်မတော် တို့ ယုံကြည်မှု တည်ဆောက်နေချိန်ကာလ တွင် ယခုကဲ့သို့ တိုင်းရင်းသားလက်နက်ကိုင် အဖွဲ့ဝင်တွေကို ဖမ်းဆီးမှု မပြုလုပ်သင့်ကြောင်း၊ ယုံကြည်မှုကို ပျက်ပြယ်စေနိုင်ကြောင်းလည်း စိုင်းဦးကပြောသည်။

ပြီးခဲ့သည့် ဖေဖော်ဝါရီ လတွင်လည်း သျှမ်းပြည် အရှေ့ပိုင်း ဟိုပုံးမြို့နယ် တွင် RCSS/SSA နှင့် ဆက်သွယ်သည့် အရပ်သား ၈ဦး ကိုလည်း ထောင်ဒဏ် တနှစ် မှ ၁၀ နှစ်ထိ ချလိုက်ကြောင်း သိရသည်။