သျှမ်းပြည်မြောက်ပိုင်း ကျောက်မဲခရိုင် နမ္မတူမြို့နယ်အတွင်း ယနေ့ မနက်ပိုင်းက RCSS/SSA နှင့် TNLA တို့ကြား တိုက်ပွဲ ဖြစ်ပွားခဲ့ကြောင်း သတင်းရရှိသည်။
ဒီဇင်ဘာလ ၇ ရက် ယနေ့မနက်ပိုင်း နမ္မတူမြို့နယ်ရှိ မန်စံကျေးရွာအုပ်စု ပန်တောင်းတံတား တွင် ( RCSS/SSA) နှင့် TNLA တို့ တိုက်ပွဲ ဖြစ်ပွားခဲ့ကြောင်း ဒေသခံများထံမှ စုံစမ်းသိရှိရသည်။
“တိုက်ပွဲက နာရီဝက်လောက်ဖြစ်တယ်။ အဲ့ဒီတိုက်ပွဲက ကျနော်တို့ ရွာနဲ့တော့ အလှမ်းဝေးပါတယ်။ RCSS/SSA နဲ့ မြောက်ပိုင်းမဟာမိတ် တပ်ဖွဲ့တွေ ဖြစ်တယ်။” ဟု နမ္မတူဒေသခံ တစ်ဦးက သျှမ်းသံတော်ဆင့် ကိုပြောသည်။
လက်ရှိချိန်ထိ နှစ်ဘက်တပ် စစ်ရေးတင်းမာနေပြီး တိုက်ပွဲဖြစ်ရသည့် အကြောင်းအရင်းများကို မသိရှိရသေးကြောင်း RCSS/SSA ၏ ပြောရေးဆိုခွင့်ရှိသူ ဗိုလ်မှူး ခမ်းစံ က သျှမ်းသံတော်ဆင့် ကိုပြောသည်။
“TNLA ဘက်က ကျနော်တို့ကို ဝင်တိုက်တယ်။ လက်ရှိချိန်ထိ စစ်ရေး တင်းမာနေပါတယ်။ တိုက်ပွဲဖြစ်ရတဲ့ အကြောင်းရင်းကို မစိစစ်ရသေးပါဘူး။ စစ်ရေးတင်းမာနေချိန်မလို့ပါ။လက်ရှိချိန်ထိ နှစ်ဘက် ထိခိုက် သေဆုံးတာတွေတော့ မသိရှိရသေးပါဘူး။” ဟု ဗိုလ်မှူး ခမ်းစံ က ပြောသည်။
RCSS ဘက်မှ TNLA တို့၏ လှုပ်ရှားရာနယ်မြေမှာ ဝင်ရောက်လာသည့်အတွက် တိုက်ပွဲဖြစ်ရခြင်း၊ ၂၀၁၈ ခုနှစ်တွင်လည်း ထိုနေရာတွင် နှစ်ဘက်တပ် တိုက်ပွဲဖြစ်ရခြင်းဖြစ်ကြောင်း TNLA သတင်းမှန် ပြန်ကြားရေးမှ ထုတ်ပြန်ထားသည်။
တိုက်ပွဲကြောင့် ယခုချိန်အထိ စစ်ရှောင်ရွာသားများ မရှိသေးကြောင်းသိရသကဲ့သို့ ထိခိုက်ဒဏ်ရာရမှုလည်းမသိရသေးပေ။
သျှမ်းပြည်မြောက်ပိုင်း သီပေါမြို့နယ်အတွင်းတွင် ဒီဇင်ဘာ (၅) ရက် မနက်ပိုင်း
RCSS/SSA နှင့် SSPP/SSA တို့ တိုက်ပွဲဖြစ်ပွားခဲ့သည်။
