သျှမ်းမြောက် သီပေါမြို့နယ် အတွင်း ယနေ့(ဒီဇင်ဘာ ၅)ရက် မနက်ပိုင်း သျှမ်းတပ် ၂တပ် ထိတွေ့မှု တိုက်ပွဲ ဖြစ်ပွားခဲ့ကြောင်း သတင်းရရှိသည်။

ဖြစ်စဉ်မှာ သီပေါမြို့နယ် အတွင်း ယနေ့ မနက်ပိုင်း ၇နာရီခွဲမှ ၈နာရီအထိ သျှမ်းပြည်တပ်မတော် ပြန်လည်ထူထောင်ရေး ကောင်စီ (RCSS/SSA)နှင့် သျှမ်းပြည် တိုးတက်ရေးပါတီ ( SSPP/SSA)တို့ ထိတွေ့မှု တိုက်ပွဲများဖြစ်ပွားခဲ့ကြောင်း နှစ်ဖက်တပ် ၏ ထုတ်ပြန်ချက် အရ သိရသည်။

“ ဒီနေ့ မနက် ကျနော်တို့ တပ်နဲ့ RCSS တပ် သီပေါမြို့နယ်ထဲမှာ ထိတွေ့မှု ဖြစ်ခဲ့တာဟုတ်ပါတယ်” SSPP/SSA မှ တပ်သား တဦးက သျှမ်းသံတော်ဆင့်ကို ပြောသည်။

အဆိုပါ တိုက်ပွဲသည် RCSS/SSA မှ သီပေါမြို့နယ် အတွင်း နယ်မြေရှင်းလင်းရေးပြုလုပ်ရာ SSPP/SSA တပ်နှင့် ထိပ်တိုက်ထိတွေ့မှုကြောင့် တိုက်ပွဲဖြစ်ပွားခဲ့ရကြောင်း RCSS/SSA၏ သတင်းဝက်ဆိုဒ် ဖြစ်သည့် Tai Freedom တွင်ရေးသားဖော်ပြထားသည်။

ယနေ့ဖြစ်ပွားသည့် သျှမ်းတပ် (၂)တပ် တိုက်ပွဲ ကိစ္စကို သျှမ်းတပ် (၂)တပ်၏ သတင်းထုတ်ပြန်ချက် စာမျက်နှာ အသီးသီးတွင် ထုတ်ပြန်ကြေညာခဲ့သည်။

သို့သော် သျှမ်းတပ် (၂)တပ် တိုက်ပွဲဖြစ်ပွားရသည့် အကြောင်းရင်းကို သျှမ်းသံတော်ဆင့် မှ တပ်(၂)တပ် ၏ သတင်းပြန်ကြားရေးကို ဆက်သွယ်မေးမြန်းရာ ဖုန်းကိုင်ဖြေဆိုခြင်းမရှိခဲ့ပေ။