ရန်ကုန်တိုင်းဒေသကြီး ကိုဗစ်-၁၉ ကာကွယ်ရေး လုပ်ငန်းများကို ကူညီရန် သွားရောက်သည့် တောင်ကြီး သူနာပြု (၆)ဦး ကိုဗစ်-၁၉ ပိုးတွေ့ရှိကြောင်း သျှမ်းပြည်ပြည်သူ့ ကျန်းမာရေး ဦးစီးဌာနထံ စုံစမ်းသိရသည်။
“ရန်ကုန်တိုင်းဒေသကြီးကို သွားရောက်တာဝန်ထမ်းဆောင်မည့် သူနာပြု ဆရာမတွေ ပိုးတွေ့တာဟုတ်ပါတယ်။ ဒီနေ့ မနက်မှာပဲ တွေ့တာ။ ရန်ကုန်မှာပဲ တွေ့တာပါ။ ရန်ကုန်မှာ စစ်ရင်း ပိုးတွေ့တာပါ။လက်ရှိ ရန်ကုန်မှာ ရှိနေပါတယ် ” ဟု သျှမ်းပြည် ပြည်သူ့ကျန်းမာရေး ဦးစီးဌာန ၏ ပြည်နယ် ဦးစီးမှူး ဒေါက်တာသူဇာချစ်တင် က သျှမ်းသံတော်ဆင့်ကို ပြောသည်။
တောင်ကြီးမှ ရန်ကုန်သို့ ဒီဇင်ဘာ (၃)ရက် ညပိုင်းထွက်ခွာခဲ့ပြီး၊ ရန်ကုန်ကို ယနေ့မနက် ပိုင်းရောက်သွားကာ၊ တာဝန်မထမ်းဆောင်ခင် ကိုဗစ်-၁၉ ရှိ၊မရှိ စစ်ဆေးရာ တောင်ကြီး သူနာပြု (၆)ဦး ပိုးတွေ့ရှိကြောင်း ဒေါက်တာ သူဇာချစ်တင် က ပြောသည်။
“သူတို့က ရန်ကုန်ကို စေတနာ့ကျန်းမာရေး ဝန်ထမ်းအဖြစ်သွားရောက် တာဝန်ထမ်းဆောင်တယ်။ ရန်ကုန်မှာ အလုပ်မလုပ်ခင် duty မဝင်ခင် စစ်လိုက်တော့ ပိုးတွေ့တာပါ။ မနေ့ညကပဲ သွားတာ ဒီမနက်မှ ရန်ကုန်ရောက်တယ်။သျှမ်းပြည်က သူတို့နဲ့ ထိတွေ့ ဆက်စပ်သူတွေကို ပြန်လိုက်ရှာနေပါတယ်။” ဟု ဒေါက်တာသူဇာချစ်တင် ကပြောသည်။
ရန်ကုန်သို့စေတနာ့ ကျန်းမာရေး ဝန်ထမ်းအဖြစ် သွားရောက်ကူညီမည့် သူနာပြု ဆရာမ စုစုပေါင်း (၁၄) ဦး အနက် (၆) ဦးသည် ပိုးတွေ့ခြင်း ဖြစ်ကြောင်း ၊ထိုထဲတွင် တောင်ကြီးမြို့ရှိ စဝ်စံထွန်းဆေးရုံမှ သူနာပြု ဆရာမ (၄) ဦး နှင့် မိခင်နှင့် ကလေးဆေးရုံမှ သူနာပြု (၂) ဦး တို့ဖြစ်ကြောင်း ဒေါက်တာ သူဇာချစ်တင်က ဆိုသည်။
ယမန်နေ့ ညတွင်လည်း ရန်ကုန်တိုင်းဒေသကြီးသို့ သွားရောက်တာဝန်ထမ်းဆောင်ပြီး ပြန်လည်ရောက်ရှိလာသည့် စေတနာ့ကျန်းမာရေးဝန်ထမ်း (၂၁) ဦး ပြန်လည် ရောက်ရှိလာသည်။
ဒီဇင်ဘာ (၃) ရက်နေ့ ည (၈) နာရီအချိန်ထိ သျှမ်းပြည်တောင်ပိုင်း ကိုဗစ်-၁၉ အတည်ပြု လူနာ (၁၂၅) ဦး ရှိကြောင်း ပြည်သူ့ကျန်းမာရေး ဦးစီးဌာနထံမှ စုံစမ်းသိရှိရသည်။
Leave a Comments