သျှမ်းပြည်တောင်ပိုင်းတွင် ကိုဗစ်-၁၉ အတည်ပြု လူနာ (၈) ဦး ထပ်မံတွေ့ရှိကြောင်း အားကစား နှင့် ကျန်းမာရေး ဝန်ကြီးဌာနက ယမန်နေ့ (ဒီဇင်ဘာ ၃) ရက် ည ၈ နာရီ က ထုတ်ပြန်လိုက်သည်။
သျှမ်းပြည်တောင်ပိုင်းရှိ ပြည်သူ့ကျန်းမာရေး ဓါတ်ခွဲမှုဆိုင်ရာ ဌာန (တောင်ကြီး)မှ ဓါတ်ခွဲနမူနာ စုစုပေါင်း ( ၇၄၂) ခု စစ်ဆေးခဲ့ရာ ကိုဗစ်-၁၉ အတည်ပြု လူနာသစ် (၈) ဦး တွေ့ရှိခဲ့ပြီး၊ ထိုသူများသည် အသွားအလာကန့်သတ်ထားသူများဖြစ်ကြောင်း ပြည်သူ့ကျန်းမာရေး ဓါတ်ခွဲနမူနာဆိုင်ရာ ဌာန (တောင်ကြီး) ထုတ်ပြန်ချက်အရ သိရသည်။
၎င်းတို့သည် ပင်းတယမြို့ (၂) ဦး၊ ဖယ်ခုံမြို့ (၁) ဦး၊ မိုးနဲမြို့ (၁) ဦး ၊ လဲချားမြို့ (၂) ဦး နှင့် အေးသာယာမြို့ (၂) ဦး တို့ဖြစ်သည်။
လက်ရှိတောင်ကြီးမြို့နယ်တွင် ကိုဗစ်-၁၉ အတည်ပြု လူနာ စုစုပေါင်း (၉၉ ) ဦးရှိသွားပြီဖြစ်ကြောင်း စုံစမ်းသိရှိရသည်။
ဒီဇင်ဘာ (၃) ရက်ထိ ကိုဗစ် အတည်ပြု လူနာ (၉၉) ဦးရှိပြီး ဆေးရုံဆင်းခွင့်ရှိသူ (၆၅) ဦး ရှိသွားပြီဖြစ်ကြောင်း တောင်ကြီးမြို့နယ် ပြည်သူ့ကျန်းမာရေးဦးစီးဌာနမှ ဆရာဝန်ကြီး ဒေါက်တာ မိုးထွန်း ထံမှ သိရသည်။
“မနေ့ကထိတော့ (၉၉) ယောက်ရှိသွားပြီ လက်ရှိ စဝ်စံထွန်းဆေးရုံမှာ (၃၄) ဦး ဆေးကုသမှု ခံယူနေပါတယ်။” ဒေါက်တာ မိုးထွန်း က သျှမ်းသံတော်ဆင့် ကိုပြောသည်။
ဒီဇင်ဘာ(၃) ရက် ည (၈) နာရီ အချိန်မှာ ပြည်ထောင်စု အားကစား နှင့် ကျန်းမာရေး ဝန်ကြီးဌာန ထုတ်ပြန်ချက်အရ ကိုဗစ်-၁၉ အတည်ပြု လူနာ အသစ်( ၁၄၁၈) ဦး၊ ဆေးရုံဆင်းခွင့်ရသူ ( ၁၁၄၇) ဦး၊ သေဆုံးလူနာ (၃၀) ဦး တို့ ဖြစ်ကြောင်း ထုတ်ပြန်ထားသည်။
Leave a Comments