မိုးကုတ်မြို့နယ်အတွင်း တိုက်ပွဲများထပ်မံဖြစ်ပွားမည်ကို စိုးရိမ်သဖြင့် စစ်ရှောင်(၁၀၀၀) ကျော်ထွက်ပြေးတိမ်းရှောင် လာကြောင်း စုံစမ်းသိရသည်။
လွန်ခဲ့သည့်နိုဝင်ဘာ(၂၄)ရက်တွင် မိုးကုတ်မြို့နယ် အတွင်း တအာင်း(ပလောင်)တပ်မတော် TNLA နှင့် အစိုးရတပ်မတော် တို့ တိုက်ပွဲဖြစ်ပွားခဲ့ရာမှ စတင်ပြီး၊ ထိုတိုက်ပွဲဖြစ်ပွားသည့်ဒေသအနီးရှိ ဒေသခံ(၁၀၀၀)ကျော် မိုးကုတ်မြို့ပေါ်သို့ထွက်ပြး လာကြခြင်းဖြစ်ကြောင်း မန္တလေးတိုင်း လီဆူ စာပေနှင့် ယဉ်ကျေးမှု ဒုဥက္ကဌ ကိုအားလု က သျှမ်းသံတော်ဆင့်ကိုပြောသည်။
“စစ်ရှောင် စုစုပေါင်း ၁ထောင်ကျောက်ရှိပါတယ်။ တိုက်ပွဲဖြစ်ပွားပြီးနောက်ပိုင်းရက်မှ ထွက်ပြေးလာကြတာ။ တိုက်ပွဲထပ်မံဖြစ်မှာစိုးရိမ်လို့ ရှောင်လာကြတဲ့သဘောပါ” ဟု ကိုအားလု က ဆိုသည်။
အဆိုပါ စစ်ဘေးရှောင်များသည် မိုးကုတ်မြို့နယ် ကျောက်ဝါ၊ ရှမ်းကုန်းစံ၊ လီဆူကုန်းစံ၊ ချောင်းကြီး နှင့် လေဘာ ကျေးရွာတွင် နေထိုင်ကြသည့်ပြည်သူများဖြစ်ပြီး၊ လက်ရှိမှာတော့ မိုးကုတ်မြို့ပေါ်ရှိ လီဆူပတ္တမြားခန်းမ၊ ပိတ်ဆည်ဘုရားကျောင်း၊ အောက်မင်္ဂလာဓမ္မာရုံ၊ လီဆူဗုဒ္ဓဘာသာကျောင်း၊ ရွှေကူဓမ္မာရုံ နှင့် မိုးကုတ်မြို့ပေါ်ရှိ ဆွေမျိုးများနေအိမ်တွင် နာခိုးနေကြကြောင်းသိရသည်။
“စစ်ရှောင်တွေ အားလုံးအတွက်တော့ ကျနော်တို့မိုးကုတ်မြို့ပေါ်စေတနာရှင်လာကူညီပါတယ်။ အဆင်ပြေပါတယ်။ မနေ့ကလည်း အစိုးရအဖွဲ့တွေလာပြီးကြည့်ပါတယ်” ဟု ကိုအားလု က ပြောသည်။
လက်ရှိကာလသည် ကိုဗစ်-၁၉ ကာကွယ်ထိန်းချုပ်သည့် အချိန်ကာလလည်းဖြစ်နေသည့်အတွက် စစ်ရှောင်များကို အတွက် ကျန်းမာရေး စစ်ဆေးပေးခြင်း၊ လက်ဆေးရည်များလှူဒါန်းပေးခြင်း နှင့် Mask (နှာခေါင်းစည်း)များကိုပါ ပေးကြောင်း၊ ကိုအားလု က ထပ်လောင်းပြောသည်။
ထိုစစ်ရှောင်များသည် နိုဝင်ဘာ ၂၅ရက် မှစတင်ပြီး စစ်ရှောင်လာကြပြီး၊ အများစုမှာ ကလေးငယ်များ၊ အမျိုးသမီးများနှင့် အသက်ကြီးသူများဖြစ်ကြောင်း သိရသည်။
“ အခု ရက်ပိုင်းမှာ တိုက်ပွဲမဖြစ်ပေမယ့် တိုက်ပွဲဖြစ်မှာတော့ ဒေသခံတွေ ကြောက်နေတယ်။ ဖြစ်တဲ့နေရာကကလည်း မြို့နဲ့နီးတယ်လေ။ စစ်ကြောင်းတွေရှိနေသေးတော့ သူတို့လည်း မပြန်ကြသေးတာ” ဟု မိုးကုတ်ဒေသခံ စိုင်းလှမောင် ကပြောသည်။
TNLA နှင့် အစိုးရတပ်မတော်တို့သည် နိုဝင်ဘာ ၂၄ရက် ည ၈နာရီဝန်းကျင်တွင် တိုက်ပွဲထိတွေ့မှုဖြစ်ပွားခဲ့ပြီး ထို့နောက် တိုက်ပွဲမဖြစ်ပွားခဲ့တော့ကြောင်း TNLA ၏ပြောရေးဆိုခွင့်ရှိသူ တားအိုက်ကျော်က သျှမ်းသံတော်ဆင့်ကိုပြောသည်။
”တိုက်ပွဲက အဲ့နေ့ တကြိမ်ပဲဖြစ်တာပါ။ ၁၅မိနစ်ပဲဖြစ်တာ။ စိုးရိမ်စရာမရှိပါဘူး။ ထိတွေ့မှုပါပဲ” ဟု တားအိုက်ကျော် ကဆိုသည်။
သို့သော် မိုးကုတ်ဒေသခံများပြောပြချက်အရ နိုဝင်ဘာ ၂၄ရက် ညတွင်ဖြစ်ပွားသည်တိုက်ပွဲတွင် လက်နက်ကြီးများဖြင့် ပစ်ခတ်မှုရှိကြောင်း။ မိုးကုတ်မြို့ပေါ်ထိ လက်နက်ကြီးသံ၊သေနတ်သံများကြားနေရကြောင်း သျှမ်းသံတော်ဆင့်ကို ပြောသည်။
လွန်ခဲ့သည့် နိုဝင်ဘာ ၁၉ ရက်တွင်လည်း မိုးကုတ်မြို့ တွင် TNLA နှင့် အစိုးရတပ်မတော်တို့တိုက်ပွဲဖြစ်ပွားခဲ့သေးကြောင်း သိရသည်။
Leave a Comments