မိုးကုတ်မြို့နယ် အတွင်း တအာင်း(ပလောင်) တပ်မတော် TNLA နှင့် အစိုးရတပ်မတော်တို့ တိုက်ပွဲဖြစ်ပွားမှုကြောင့် ဒေသခံတချို့ မြို့ပေါ်သို့ ထွက်ပြေးနေရကြောင်း စုံစမ်းသိရသည်။
နိုဝင်ဘာ ၂၄ ရက် ယမန်နေ့ည ၈နာရီဝန်းကျင်က မိုးကုတ်မြို့ ကျောက်ဝါကျေးရွာအနီးတွင် TNLA နှင့် အစိုးရတပ်မတော်တို့ တိုက်ပွဲဖြစ်ပွားရာ ဒေသခံတချို့ မိုးကုတ်မြို့ပေါ်ရှိနီးစပ်ရာ ဆွေမျိုးများထံ တိမ်းရှောင်နေထိုင်နေရကြောင်း မိုးကုတ်ဒေသခံ စိုင်းလှမောင် က သျှမ်းသံတော်ဆင့်ကို ပြောသည်။
“ တိုက်ပွဲသံကြောင့် အဲ့ဒေသက လီဆူတွေနဲ့ရှမ်းတွေ မြို့ပေါ်ရောက်လာတယ်။ အများကြီးတော့မဟုတ်ဘူး။ စိုးရိမ်လို့ ထွက်ပြေးလာကြတာ” ဟု စိုင်းလှမောင် က ဆိုသည်။
ယမန်နေ့ဖြစ်ပွားသည့် တိုက်ပွဲသည် ခေတ္တသာ ဖြစ်ပွားခဲ့သော်လည်း တိုက်ပွဲထပ်မံဖြစ်ပွားမည်ကို ဒေသခံများစိုးရိမ်နေကြကြောင်း၊ ထိုနေရာတွင် TNLAနှင့် အစိုးရတပ်မတော် ထိတွေ့မှု မကြာခဏဖြစ်ပွားသည့်နေရာဖြစ်ကြောင်းလည်း စိုင်းလှမောင်က ပြောသည်။
“ မနေ့ကတိုက်ပွဲက ထိတွေ့မှုတိုက်ပွဲပါ။ အချိန်က ၁၅မိနစ်၊၂၀လောက်ပဲဖြစ်တာ။ အရမ်းကြီး စိုးရိမ်စရာ မလိုပါဘူး။ တပ်တွေက ဆုတ်သွားပါပြီ” ဟု TNLA ၏ ပြောရေးဆိုခွင့်ရှိသူ တားအိုက်ကျော် ကသျှမ်းသံတော်ဆင့်ကို ပြောသည်။
လွန်ခဲ့သည့် နိုဝင်ဘာ ၁၉ ရက်တွင်လည်း မိုးကုတ်မြို့တွင် TNLA နှင့် အစိုးရတပ်မတော် တိုက်ပွဲတကြိမ် ဖြစ်ခဲ့သေးကြောင်း၊ ထိတွေ့မှုသာဖြစ်ကြောင်း လည်း တားအိုက်ကျော်က ပြောပြသည်။
ထို့အပြင် ယမန်နေ့ ပစ်ခတ်သည့် လက်နက်နှင့် ပတ်သက်ပြီး ဒေသခံ တချို့ ပြောပြချက် အရ လက်နက်ကြီးများ ပါကြောင်း၊ မိုးကုတ်မြို့အနီးပစ်ခတ်မှုကြောင့် စိုးရိမ်မှုများရှိနေကြခြင်းဖြစ်ကြောင်း သျှမ်းသံတော်ဆင့်ကို ပြောသည်။
တိုက်ပွဲဖြစ်ပွားသည့်နေရာသည် ကျောက်တွင်းများရှိနေပြီး၊ အဆိုပါကျောက်တွင်းများမှာ သက်တမ်းကုန်နေသည့်ကျောက်တွင်းများဖြစ်သဖြင့် တူးဖော်မှုရပ်နားထားကြောင်း သိရသည်။
Leave a Comments