သျှမ်းပြည်တောင်ပိုင်း လင်းခေးခရိုင် မောက်မယ်မြို့နယ်တွင် ယာလုပ်ငန်းခွင်အတွင်းအလုပ်လုပ်နေသည့် ရွာသား ၃ ဦးအား အစိုးရတပ်မတော်ကဖမ်းဆီးရိုက်နှက်ကာ စစ်ကြောင်းနှင့်အတူခေါ်ဆောင်သွားကြောင်းသိရသည် ။

သျှမ်းတပ်ဖွဲ့ RCSS/SSA ၏အမာခံလူဟုဆိုကာ ရွာသား ၃ ဦးအား မေလ ၉ ရက်နေ့က တောင်ယာလုပ်ငန်းခွင်မှ ဖမ်းဆီးပြီး ၄င်းတို့စစ်ကြောင်းနှင့်အတူ ခေါ်ဆောင်သွားကြောင်း၊ မေလ ၁၁ ရက်ပြန်လည်လွှတ်ပေးချိန်အထိ စစ်ကြောင်းနှင့်အတူ သွားရသည့်လမ်းတလျှောက် ရိုက်နှက်ခံရကြောင်း ပြန်လည်လွှတ်မြောက်လာသည့်ရွာသားများပြောပြချက်အရသိရသည်။

ခမရ ၄၃၀ ကစစ်ကြောင်းက ကန်တူးလုံအုပ်စုနားဟီးရွာကနေ ပုံစုတ်ရွာဘက်ကိုတက်သွားစဉ် ယာလုပ်ငန်းခွင်မှ ကွန်းလုံးရွာသား စိုင်းလှစိန် အသက် ၃၅ နှစ် ၊ ၀မ်မိုက်ဆားရွာသား စိုင်းလွယ် အသက် ၃၇ နှစ် ပုံစုတ်ရွာသား စိုင်းနိုင် အသက် ၃၅ နှစ်တို့ကိုပါဖမ်းဆီး ခေါ်ဆောင်သွားခဲ့ခြင်းဖြစ်သည်ဟု မောက်မယ်ဒေသခံက ပြောသည်။

စစ်ကြောင်းမှူးက ဗိုလ်ကြီးမိုင်း တဲ့။ ရွာသား ၃ ယောက်ကိုဖမ်းပြီးတော့ သျှမ်းစစ်သားအကြောင်းမေးတယ်။ ရွာသား ၃ ယောက်က မသိဘူးလို့ဖြေတော့ သျှမ်းသူပုန်ရဲ့အမာခံတွေဆိုပြီးဖမ်းဆီးသွားတယ်။ မျက်နှာကိုရိုက်နှက်ကန်ကျောက် တယ်။ ခေါင်းကိုသေနတ်ဒင်နဲ့ထုတယ်။ တယောက်ကျတော့ နားရွက် ဓါးလှီးခံရတယ်။ – ဟု အဖမ်းခံရသူနှင့်အမျိုးတော်စပ်သူ စိုင်းစိုင်းကပြောသည်။

ဖမ်းဆီးရိုက်နှက်ခံရသည့်ရွာသားများမှာနေရပ်သို့ပြန်ရောက်ပြီးနောက်ပိုင်း နေအိမ်တွင်မနေရဲကြသေးဘဲ ဆွေမျိုးများအိမ်တွင်ခိုလှုံနေကြကြောင်း၊ ဒဏ်ရာပြင်းထန်သည့်စိုင်းလွယ်မှာ ဆေးကုသမှုခံယူနေရဆဲဖြစ်ကြောင်း ဆိုပါသည်။

မောက်မယ်မြို့နယ်သည် လင်းခေးခရိုင်လင်းခေးမြို့အနောက်တောင်ဘက် မိုင် ၃၀ ခန့်အကွာတွင်တည်ရှိပါသည်။ ကန်တူးလုံအုပ်စုသည် မောက်မယ်မြို့၏ တောင်ဘက်တွင်တည်ရှိပြီးအဆိုပါဒေသတွင် အစိုးရတပ်မတော်အပြင် ပအို၀်း ၊ သျှမ်း လက်နက်ကိုင်တပ်ဖွဲ့တို့လှုပ်ရှားပါသည်။