နိုဝင်ဘာ (၈)ရက်တွင် ကျင်းပခဲ့သည့် အထွေထွေ ရွေးကောက်ပွဲ သည် လွတ်လပ်ပြီး၊တရားမျှတမှု မရှိကြောင်း နိုင်ငံရေး အသိုင်းအဝန်းက ပြောဆိုလိုက်သည်။

သျှမ်းပြည်တဝှမ်း နိုဝင်ဘာ (၈) ရက်က ကျင်းပခဲ့သည့် ရွေးကောက်ပွဲတွင် နိုင်ငံရေး စစ်ရေး နှင့် ကိုဗစ်စိန်ခေါ်မှုများကြားမှ ကျင်းပပြီးစီးခဲ့သော်လည်း လွတ်လပ်ပြီး တရားမျှသည့် ရွေးကောက်ပွဲ မဖြစ်ကြောင်း၊ လက်နက်ကိုင် အဖွဲ့အစည်းများ၏ ခြိမ်းခြောက်မှု နှင့် လူစားထိုး မဲပေးမှုများစွာ ရှိခဲ့ကြောင်းလည်း သိရသည်။

“ ရွေးကောက်ပွဲက တရားမျှတမှု လွတ်လပ်မှုကတော့ အပြည့်ဝမရှိဘူး။ မဲဆန္ဒရှင်တွေက တစ်ချို့ဒေသတွေမှာ လွတ်လွတ်လပ်လပ် မဲပေးခွင့်မရှိတာလဲရှိတယ်။ လက်နက်ကိုင်အဖွဲ့တွေက ဒီပါတီကို မဲပေးပါဆိုပြီး ချိန်းခြောက်တာ လဲရှိတယ်” ဟု ရှမ်းတိုင်းရင်းသားများဒီမိုကရေစီ အဖွဲ့ချုပ် (SNLD )အထွေထွေအတွင်းရေးမှူး စိုင်းလိတ် ကပြောသည်။

တချို့ သျှမ်းပြည်ဒေသတွင် အသက်မပြည့်သေးသည့် လူငယ်များသည် လူစားထိုးမဲပေးမှုနှင့် လက်နက်ကိုင်တပ်ဖွဲ့ မှ ခြိမ်းခြောက်ကာ မဲပေးခဲ့ရသည့် ဖြစ်စဉ်များလည်း ရှိကြောင်း စိုင်းလိတ်က ပြောသည်။

အလားတူ ရှမ်းတိုင်းရင်းသားများဒီမိုကရက်တစ်ပါတီ SNDP ကလည်း ယခုတခေါက်ရွေးကောက်ပွဲသည် တရားမျှတသည့် ရွေးကောက်ပွဲ မဖြစ်ကြောင်းနှင့် UEC ၏ ဆုံးဖြတ်ချက်အတိုင်းဖြစ်သဖြင့် ငြင်းဆန်၍မရကြောင်း SNDP အတွင်းရေးမှူး စိုင်းဖိုးအောင် ကပြောသည်။

ရွေကောက်ပွဲသည် တရားမျှတမှုမရှိသဖြင့် ပြည်ထောင်စု ရွေးကောက်ပွဲ ကော်မရှင်(UEC)အနေဖြင့် တပ်မတော်နှင့် ပူးပေါင်းပြီး “ဘက်လိုက်မှုကင်းပြီး စည်းကမ်းကျနသည့် ရွေးကောက်ပွဲ နောက်တကြိမ်ကျင်းပရန် ” ပြည်ထောင်စု ကြံ့ခိုင်ရေး နှင့် ဖွံ့ဖြိုးရေးပါတီ (USDP)က နိုဝင်ဘာ ၁၁ရက် တွင် ပြုလုပ်သည့်သတင်းစာရှင်းလင်းပွဲ ၌ ပြောသည်။

ထိုရွေးကောက်ပွဲတွင် အာဏာရပါတီများက အခွင့်ရေးပိုရနေကြောင်း မဲဆွယ်စည်းရုံရေးဆင်းရာတွင် စည်းကမ်းလိုက်နာမှု မတူညီကြောင်း USDP ဗဟိုပါတီ ကော်မတီဝင်၊ သျှမ်းပြည် တောင်ပိုင်း ပြည်နယ်ကော်မတီဝင် ဦးစိုင်းဇော်ဇော် က သျှမ်းသံတော်ဆင့် ကို ပြောသည်။

“ ကျနော်တို့က နည်းနည်းလေးတော့ပြောစရာရှိတယ်။ မတရားဘူးလို့လဲမဆိုလိုပါဘူး။ အာဏာရပါတီက အခွင့်ရေးပိုရသလိုဘဲပေါ့။ မဲဆွယ်စည်းရုံးတဲ့ကန့်သတ်တဲ့စည်းကမ်းလေး တွေကော ကျနော်တို့ပါတီငယ်လေးတွေနဲ့ စည်းကမ်းလိုက်နာတဲ့နေရာမှာ မတူညီကြဘူး” ဟု ဦးစိုင်းဇော်ဇော် ကပြောသည်။

သို့ရာတွင် ရွေးကောက်ပွဲတွင် UEC ၏‌ အားနည်းများရှိသော်လည်း ရွေးကောက်ပွဲရလဒ်များသည် တရားမျှတမှုရှိကြောင်း နိုင်ငံရေးလေ့လားသုံသပ်သူ ဦးမောင်မာင်စိုးက ပြောသည်။
“ UEC ရဲ့ရွေးကောက်ပွဲကော်မရှင်မှာ အားနည်းချက်ရှိသော်လည်း ကျနော့်အမြင်ကတော့ ရွေးကောက်ပွဲ ရလဒ်တွေ ကတော့ မျှတတယ်လို့ထင်တယ်။ ရွေးကောက်ပွဲ ရလဒ်တွေကတော့ ဒီအတိုင်းဘဲထွက်လိမ့်မယ်လို့ ထင်ပါတယ်” ဟု ဦမောင်မောင်စိုးကပြောသည်။

ထိုသို့ရွေးကောက်ပွဲအပြီးတွင် ရန်ကုန်မြို့သတင်းစာရှင်းလင်းပွဲ ၌ ပြည်ထောင်စုကြံ့ခိုင်းရေးနှင့် ဖွံ့ဖြိုးပါတီ USDP က ရွေးကောက်ပွဲ အသစ်တစ်ခုပြန်လည် ပြုလုပ်ပေးဖို့တောင်းဆိုသည့် အပေါ်တွင် အကျိုးကြောင်းမဆီလျော်ကြောင်း နှင့် ဖြစ်လာနိုင်ဖို့ မရှိကြောင်းလည်း နိုင်ငံရေး လေ့လာသုံးသပ်သူတချို့ ကပြောသည်။