သျှမ်းပြည် အမှတ်(၁) အမျိုးသားလွှတ်တော် အမတ် မဲရေတွက်မှု ပြီးစီးသော်လည်း သေချာမှု မရှိသဖြင့် SNLD အမတ် မှ ပုံစံ(၁၉ )ကို ယနေ့ထိ မထိုးရသေးကြောင်း စုံစမ်းသိရသည်။
သျှမ်းပြည် အမှတ်(၁) အမျိုးသားလွှတ်တော်သည် ကျောက်မဲ၊ သီပေါ၊ နောင်ချို၊ နမ္မတူ၊ မိုးမိတ် နှင့် မဘိမ်း ဒေသတို့ပါဝင်ကြောင်း သိရသည်။
“ မဲရေတွက်မှုတွေက မနေ့ကနဲ့ ဒီနေ့မတူဘူး။ နောက် မဲရေတွက်တာ ကျနော်သိပ်ပြီးတော့ မယုံကြည်ဘူး။ ရေတွက်မှုပြီးပေမယ့် ကျနော် ပုံစံ(၁၉ ) မထိုးပေးသေးဘူး” ဟု SNLD မှ အမှတ်(၁) အမျိုးသားလွှတ်တော် ကိုယ်စားလှယ်လောင်း စိုင်းမြထွန်းဆွယ်ဟိန်း က သျှမ်းသံတော်ဆင့်ကို ပြောသည်။
အမျိုးသားလွှတ်တော် မဲအတွက် ကျောက်မဲ၊ သီပေါ၊ နောင်ချို၊နမ္မတူဘက် တွင် မဲရေတွက်ရာတွင် ပြဿနာမရှိကြောင်း၊ လက်ရှိမှာ မိုးမိတ်နှင့် မဘိမ်းမဲရေတွက်မှုကို ပြန်စစ်ဆေးသွားမည် ဖြစ်ကြောင်း လည်း စိုင်းမြထွန်းဆွယ်ဟိန်း က ပြောသည်။
“ လက်ရှိ မှာ ကျနော်မဲ က NLD ထက် ၅၄မဲ ရှုံးနေတယ်။ မိုးမိတ်နဲ့ မဘိမ်းဘက် မဲရုံမှူးတွေမရှိတော့ အဲ့ဘက်ကို ပြန်စစ်အုံးမယ်။ ဒါ့ကြောင့် ကျနော်လက်မှတ်မထိုးသေးတာပါ” ဟု စိုင်းမြထွန်းဆွယ်ဟိန်း က ဆိုသည်။
သျှမ်းပြည်မြောက်ပိုင်း ကွတ်ခိုင်မြို့နယ်တွင်လည်း ရွေးကောက်ပွဲ တရားမျှတမှုမရှိသဖြင့် အမှတ်(၅) အမျိုးသားလွှတ်တော် အမတ်လောင်း မော်ထွန်းအောင်ကလည်း လက်မှတ်မထိုးသေးဘဲ တရားမျှတမှုရအောင်ဆက်လက်ဆောင်ရွက်သွားမည် ဟု သိရသည်
Leave a Comments