တောင်ကြီးမြို့ ၊ သစ်တောရပ်ကွက် တွင် ဆန္ဒမဲထည့်ရန် လူဦးရေ တစ်ထောင်ကျော် ကျန်ရှိနေသေးသည့် အတွက် ရပ်ကွက်အတွင်း ကားများဖြင့် လည့်လည်ဆော်ဪ နေကြောင်းသိရသည် ။
“ မနက် ၅ နာရီကတည်းက ပြည်သူလူထုတွေက စိတ်ဝင်တစားနဲ့ မဲပေးဖို့ မဲရုံမှာ လာ စောင့် နေကြပါတယ်။ လက်ရှိ အချိန်အထိ တစ်ထောင်ကျော်ကျန်တယ် ” ဟု ရပ်ကျေးကော်မရှင်အဖွဲ့ခွဲ မှ အ.ထ.က (၁) မဲရုံအတွင်းတာဝန်ရှိသူ ဦးနှင်းထွေးအောင်ကပြောသည် ။
သစ်တောရပ်ကွက်အနေဖြင့် မဲပေးပိုင်ခွင့်ရှိသည့် မဲဆန္ဒရှင်စာရင်း အရ လူဦးရေ ငါးထောင်ကျော်ရှိပြီး ကြိုတင်မဲ ၂ ထောင်ကျော်ပေးပြီးကာ နိုဝင်ဘာ(၈) ရက်နေ့ မနက်ပိုင်းတွင် နှစ်ထောင်ကျော် မဲပေးပြီးဖြစ်၍မွန်းလွဲ ၃ နာရီအထိလူတစ်ထောင် ကျော်ကျန်ရှိနေသည်ဟု သိရသည် ။
ညနေ ၄ နာရီမတိုင်ခင် ကျန်ရှိနေသည့် လူဦးရေ အရ ဆက်လက်မဲပေးနိုင်ရန် အချိန်လုံလောက် ကြောင်းနှင့် ၄ နာရီထိုးပါက ဝန်းတံခါးကိုသာ ပိတ်ထားမည်ဖြစ်ပြီး မဲရုံထဲ ရှိ ပြည်သူများအနေနှင့် ဆက်လက် ဆန္ဒမဲ ထည့် နိုင်ကြောင်း ဦးနှင်းထွေးအောင်က ကပြောသည် ။
သစ်တောရပ်ကွက်အတွင်းရှိပြည်သူများအနေနှင့် အ.ထ.က (၁) အခြေခံပညာ အထက်တန်းကျောင်းတွင် မဲရုံ (၃) ရုံထားရှိ၍ ဆန္ဒမဲပေးရမည်ဖြစ်သည် ။