သျှမ်းပြည်တောင်ပိုင်း၊ ဟိုပုံးမြို့နယ်တွင် နေထိုင်သည့် ကျန်းမာရေးမကောင်းသူ စာရင်းများကို စစ်တပ်လက်အောက်ခံ ရဲနှင့် အုပ်ချုပ်ရေးမှူးများက စာရင်းလိုက်လံ ကောက်ယူနေပြီး ပြည်သူ့ ဆန္ဒမပါဘဲ ကိုယ်စားမဲထည့်မည်ကို စိုးရိမ်နေကြောင်း သတင်းရရှိသည်။
ယနေ့ (ဒီဇင်ဘာလ ၂၈ ရက်) တွင် စစ်ကော်မရှင် စတင်ကျင်းပနေသည့် ရွေးကောက်ပွဲ ပထမပိုင်းတွင် သျှမ်းပြည်တောင်ပိုင်းမှ တောင်ကြီး၊ ဟိုပုံး၊ ပင်းတယ၊ နမ့်စန်၊ လင်းခေးနှင့် လွိုင်လင် အပါအဝင် (၆) မြို့နယ်တွင် ပြုလုပ်နေသည်။
အဆိုပါ ရွေးကောက်ပွဲတွင် ဟိုပုံးမြို့ပေါ်ရှိ မဲရုံများ၌ မဲလာပေးသည့် ပြည်သူများ နည်းပါးပြီး ကျေးရွာများဘက်တွင် မဲမထည့်လျှင် ဖမ်းဆီးအရေးယူမည် ဆိုသောကြောင့် မဲသွားထည့်နေရသည်ဟု ဒေသခံများက ပြောသည်။
“မြို့ပေါ်က မဲထည့်တဲ့သူ သိပ်မတွေ့ဘူး။ ရွာဘက်မှာတော့ မဲမထည့်ရင် ဖမ်းမယ်ဆိုလို့ မဲသွားထည့်ကြတယ်။ မဲစာရင်းပါပြီး ကျန်းမာရေး မကောင်းတဲ့သူတွေ စာရင်းကို စစ်တပ်က ကောက်သွားတော့ ကိုယ့်ဆန္ဒမပါဘဲ သူတို့သဘောနဲ့ ကိုယ်စား မဲသွားထည့်လိုက်မှာကို စိုးရိမ်တယ်”ဟု ဟိုပုံးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုသို့ စစ်ကော်မရှင်လက်အောက်ခံ ရဲတပ်ဖွဲ့ဝင်နှင့် အုပ်ချုပ်ရေးမှူးများက ကျန်းမာရေးမကောင်းသူ စာရင်းများကို လိုက်လံကောက်ခံခဲ့ခြင်းကြောင့် ကာယကံရှင် ဆန္ဒမပါဘဲ ၎င်းတို့မှ ကိုယ်စား မဲထည့်လိုက်မည်ကို စိုးရိမ်နေရကြောင်း ဟိုပုံးဒေသခံများက ပြောသည်။
ယနေ့ ရွေးကောက်ပွဲနေ့တွင် ဟိုပုံးမြို့ပေါ်၌ စစ်ကော်မရှင်တပ်နှင့် ၎င်းလက်အောက်ခံ ပအိုဝ်းပြည်သူ့စစ် (PNO)တို့က လက်နက်နှင့် စစ်ဝတ်စုံ အပြည့်ဝတ်ဆင်ပြီး ကားများဖြင့် လှည့်လည်၍ လုံခြုံရေး တင်းကြပ်နေကြောင်း သိရသည်။
လက်ရှိ ဟိုပုံးမြို့နယ်တွင် မဲရုံပေါင်း (၇၈) ရုံရှိပြီး စစ်ကော်မရှင်၏ အတုအယောင် ရွေးကောက်ပွဲတွင် မဲထည့်ရန် စိတ်ဝင်စားသူ အနည်းငယ်သာရှိကြောင်း ဒေသခံများက ပြောသည်။
ယခုလက်ရှိ စစ်ကော်မရှင်တပ် ဦးဆောင်ကျင်းပနေသော ရွေးကောက်ပွဲ ပထမပိုင်းတွင် သျှမ်းပြည်မှ မြို့နယ် ၁၂ ခု ပါဝင်ပြီး လာမည့် ၂၀၂၆ ခုနှစ် ဇန်နဝါရီလအတွင်း ရွေးကောက်ပွဲ ဒုတိယပိုင်း (၁၇) မြို့နယ်နှင့် တတိယပိုင်း (၉) မြို့နယ်တို့တွင် အပြီးအစီး ကျင်းပမည်ဟု ကြေညာထားသည်။
23m
Leave a Comments