၂၀၂၀ ပြည့်နှစ်အထွေထွေရွေးကောက်ပွဲနေ့က မဲရုံအတွင်းဝင်ရန်နောက်ကျခဲ့ကြောင်း မဲဆန္ဒရှင်များ ပြောဆိုချက်နှင့်ပတ်သက်ပြီး အချိန်မှီမဲရုံဖွင့်လှစ်ပေးခဲ့သော်လည်း ကိုဗစ်ထိန်းချုပ်ကာကွယ်ရေးအတွက် အပူချိန်တိုင်းတာ စစ်ဆေးခြင်း ပြင်ဆင်မှုများကြောင့် ဖြစ်ကြောင်း မဲရုံမှူးကပြောဆိုသည်။
ယခုနှစ် ရွေးကောက်ပွဲကာလသည် ကိုဗစ်-၁၉ ကူးစက်ရောဂါဖြစ်ပွားနေသည့် အချိန်ကာလလည်းဖြစ်သည်။
သျှမ်းပြည် တောင်ပိုင်း တောင်ကြီးမြို့နယ် နောင်လေကျေးရွာအုပ်စု ရှိ မဲရုံတွင် နိုဝင်ဘာလ ၈ ရက်က နံနက် ၆ နာရီအချိန် စတင်မဲပေးနိုင်ကြောင်းကြေညာထားသော်လည်း ၆ နာရီခွဲမှ မဲရုံဖွင့်သည်ဟု အဆိုပါနေ့က မဲရုံရှေ့ရောက်နေသော မဲဆန္ဒရှင်များက သျှမ်းသံတော်ဆင်သတင်းဌာနမှ တိုက်ရိုက်ထုတ်လွှင့်နေစဉ် ပြောဆိုခဲ့သည်။
ထိုကိစ္စနှင့်ပတ်သက်ပြီး နောင်လေကျေးရွာအုပ်စုရှိ မဲရုံမှ မဲရုံမှူး ဒေါ်မြင့်မြင့်ဌေး က နံနက် ၆ နာရီမတိုင်ခင် မဲရုံဖွင့်လှစ်ခဲ့ပြီးဖြစ်ကြောင်း သျှမ်းသံတော်ဆင့်အား နိုဝင်ဘာလ ၁၂ ရက် ယနေ့မနက်ပိုင်းကပြောဆိုသည်။
“ကျမတို့မဲရုံက ၆ နာရီမှာ စဖွင့်ပါတယ်။ မဲရုံကို အချိန်နဲ့ တပြေးညီဖွင့်ခဲ့ပါတယ်။ ၆ နာရီခွဲဖွင့်တယ်ဆိုတာ မဟုတ်ပါဘူး။ လူစု၊ လူဝေးဖြစ်မှာစိုးလို့ ကျမတို့ အပူချိန်တိုင်းပြီးမှ အထဲကို အချိန်နဲ့ အသုတ်လိုက်ဝင်ခွင့်ပြု တာပါ။ ၆ နာရီမှာလည်း မဲလာပေးတဲ့သူတွေ အထဲမှာ ရှိနေပါပြီ ” ဟု သျှမ်းသံတော်ဆင့်ကို ပြောသည်။
ယခုကာလအတွင် မဲဆန္ဒရှင်များ လူစု၊လူဝေး မဖြစ်စေရန် နှင့် (Social Distancing ) ဖြစ်ရန် အတွက် ကျေးရွာ တရွာပြီးမှ တရွာ မဲရုံ ပရဝုဏ်ထဲသို့သွင်းခြင်းဖြစ်ကြောင်း၊ ထိုကဲ့သို့ ပြုလုပ်မည်ကို လည်း ကျေးရွာအုပ်ချုပ်ရေးမှူး များ ကို အကြောင်းကြားထားပြီးကြောင်း ဒေါ်မြင့်မြင့်ဌေး က ပြောသည်။
“ ကျမတို့က အုပ်ချုပ်ရေးမှူးတွေကို အကြောင်းကြားပြီးသားပါ။ ၆နာရီခွဲမှ အဲ့ကျေးရွာက လူတွေ ဝင်ဖို့လုပ်ထားတာပါ။ အထဲမှာ မဲလာထည့်တဲ့ သူတွေလည်းရှိနေပါတယ်” ဟု ဆရာမ က ထပ်လောင်းပြော ကြားသည်။
ထို့ကြောင့် နိုဝင်ဘာ ၈ ရက်နေ့ထုတ်သည့် သတင်းသည် ကိုဗစ်-၁၉ ကာကွယ်တားဆီးထိန်းချုပ်သည့် အကြောင်းကို မသိရှိသေးသည့်အတွက် မဲရုံမဖွင့်သေးကြောင်းပြောဆိုမှုမှာ မဲဆန္ဒရှင် တချို့ အသံသာဖြစ်ကြောင်း သိရသည်။
၂၀၂၀ ရွေးကောက်ပွဲတွင် သျှမ်းပြည်တောင်ပိုင်း တောင်ကြီးမြို့နယ်တွင် အမျိုးသားဒီမိုကရေစီအဖွဲ့ချုပ်က လွှတ်တော် ၄ ရပ်စလုံးတွင်အနိုင်ရရှိထားပါသည်။