သျှမ်းပြည် အရှေ့ပိုင်း မိုင်းတုံမြို့ တွင် အသက် (၁၈) နှစ် မပြည့်သေးသည့်ကလေးငယ်များ တိုကင်ဖြင့် မဲလာထည့် ကြောင်း စုံစမ်းသိရသည်။
မိုင်းတုံမြို့နယ် အတွင်းရှိ ဝမ်မိုင်ကျေးရွာ စာသင်ကျောင်း၊ နမ့်ယွန်းကျေးရွာ စာသင်ကျောင်းနှင့် နမ့်ဖိုင်ကျေးရွာ စာသင်ကျောင်း တွင် အသက်မပြည့်သေးသည့် ကလေးငယ် ၈၀ရာခိုင်နှုန်းခန့် တိုကင်ကိုင်ဆောင်ပြီး မဲလာထည့်နေသဖြင့် တရားမျှတမှုမရှိကြောင်း မိုင်းတုံမြို့နယ် ပြည်နယ် မဲဆန္ဒနယ် အမှတ်(၁) လွှတ်တော်ကိုယ်စားလှယ်လောင်း စိုင်းဝင်းမြတ်ဦး က သျှမ်းသံတော်ဆင့်ကို ပြောသည်။
“ သူက တိုကင်နဲ့လာတယ်။ မှတ်ပုံတင်မပါလာဘူး။ ဒါက တန်းတူညီမျှမှုမရှိဘူး။ လာတဲ့သူ အများစု က “ဝ” လူမျိုးတွေပါ။ အသက် (၁၅)နှစ်၊(၁၆)နှစ် ပဲရှိမယ်” ဟု စိုင်းဝင်းမြတ်ဦး က ဆိုသည်။
ထိုတိုကင်ယူလာပြီးမဲလာထည့်သည့် အသက်မပြည့်သေးသည့် ကလေးငယ်များကို နာမည်နှင့် မိဘ အမည် မေးသည့်အခါ၊ မဲစာရင်းနာမည်နှင့် ကိုက်ညီမှု မရှိသည်ကို တေ့ွရှိရကြောင်းလည်း စိုင်းဝင်းမြတ်ဦးက ပြောပြသည်။
“ တိုကင်ကနာမည်နဲ့ သူတို့ပြောတဲ့နာမည် မကိုက်ညီဘူး။နောက်ပြီး အမေ၊အဖေနာမည်တောင် မပြောနိုင်ဘူး။ ဒါက တော်တော်ဆိုးတယ်” ဟု စိုင်းဝင်းမြတ်ဦး က ထပ်လောင်းပြောသည်။
အဆိုပါကိစ္စနှင့် ပတ်သက်ပြီး မိုင်းတုံမြို့နယ် ရွေးကောက်ပွဲ ကော်မရှင် အဖွဲ့ခွဲထံ သွားရောက်တင်ပြထားပြီး၊ကန့်ကွက်ထား ကြောင်း လည်း သိရသည်။
ထို့အပြင် မြို့နယ် ကိုယ်စားလှယ်လောင်းများအနေဖြင့် မဲရုံမှူးကို သွားရောက် သတင်းပို့သည့်အခါ မဲရုံမှူးက တိုကင်ပါလာသည့်သူတိုင်း မဲပေးခွင့်ရှိကြောင်းလည်း တုန့်ပြန်ပြောဆိုသည်။
လက်ရှိအချိန်ထိ မိုင်းတုံမြို့နယ် ရွေးကောက်ပွဲကော်မရှင်ခွဲ ကို တရားဝင်စာဖြင့် လာရောက်တိုင်ကြားထားခြင်း မရှိသေးကြောင်း၊ နှုတ်ဖြင့်သာကန့်ကွက်ထားကြောင်း ရွေးကောက်ပွဲ ကော်မရှင်ခွဲ ဥက္ကဌ ဦးအောင်မြင့်ဦး က သျှမ်းသံတော်ဆင့်ကို ပြောသည်။
“အသက်မပြည့်သေးတဲ့ကလေးတွေ မဲရုံးနာတောင် ပေးမကပ်ဘူး။ ကိုယ်စားလှယ်တွေက ကျနော်တို့ဆီကိုတော့ နှုတ်နဲ့ပဲ လာကန့်ကွက်ထားတာပါ” ဟု ဦးအောင်မြင့်ဦး က ဆိုသည်။
လက်ရှိ ဖြစ်ပျက်သွားသည့်နေရာသည် “ဝ” တပ်ဖွဲ့ နှင့် မိသားစုဝင်များနေထိုင်သည့် နေရာဖြစ်ကြောင်းသိရသည်။
Leave a Comments