သျှမ်းပြည်မြောက်ပိုင်း နမ့်ခမ်းမြို့ နောင်စန့်ရပ်နေ လူမှုညီညွတ်ရေး အဖွဲ့ (UP) အဖွဲ့ခေါင်းဆောင် ဦးစိုင်းအောင်ဝင်း နှင့် ၎င်း၏သား တို့ သေနတ်ပစ်ခံရပြီး ယခုချိန်အထိ တရားခံ လွှတ်မြောက်နေဆဲဟု စုံစမ်းသိရသည်။

ဖြစ်စဉ်မှာ နိုဝင်ဘာ ၄ရက် ည ၆နာရီ ဝန်းကျင်တွင် အမည်မသိ လက်နက်ကိုင် တစ်ဦးက ဆိုင်ကယ်မောင်းလာပြီး ဆရာ စိုင်းအောင်ဝင်း တို့၏ နေအိမ်ရှေ့တွင် တည့်တည့်တွင် သေနတ်ပစ်ရာ စိုင်းအောင်းဝင်း သေနတ်ဒဏ်ရာ ၂ချက် ရရှိခဲ့ပြီး ၎င်း၏သားလည်း လက်မောင်းနား ကျည်ဆံရှပ်ထိသွားကြောင်း သိရသည်။

“ ၂ ချက်ထိတယ်။ နောက်ကျောနားနဲ့ တင်ပါးဆုံရိုးနား ထိတယ်။ တလုံးကတော့ အူမကြီးကို သွားထိတယ်။ သူသားကတော့ လက်မောင်းနား ရှပ်ပြီး ထိသွားတယ်။ သိပ်တော့ မစိုးရိမ်ရဘူး။ ဘယ်အဖွဲ့လာပစ်တယ်ဆိုတာ မသိရသေးဘူး” UP အဖွဲ့အတွင်းရေမှူး လုံးစိုင်းမောက်ဆိုင် က သျှမ်းသံတော်ဆင့်ကို ပြောသည်။

လက်ရှိ အချိန်ထိ မည်သည့်လက်နက်ကိုင်တပ်ဖွဲ့က လာရောက်ပစ်ခတ်သည်ကို မသိရရှိသေးကြောင်း၊ တရားခံလည်း မမိသေးကြောင်း လုံးစိုင်းမောက်ဆိုင် က ပြောသည်။

ပစ်ခတ်မှုနှင့်ပတ်သက်ပြီး လုံးစိုင်းမောက်ဆိုင် က “ကျနော်တို့ တရားစွဲထားတော့ မရှိသေးဘူး။ ဒါပေမယ့် ဖြစ်ဖြစ်ချင်းမှာတော့ ရဲတွေကတော့ စိုင်းအောင်ဝင်းအိမ် ကို လာပြီးစစ်ဆေးသွားတယ်။ အချက်အလက်တွေကို လာကောက်သွားတယ်” ဟူ လုံးစိုင်းမောက်ဆိုင် ကပြောသည်။

လက်ရှိ ဦးစိုင်းအောင်ဝင်းသည် နမ့်ခမ်းဆေးရုံတွင် ဆေးကုသခံယူနေကြောင်း သိရသည်။
၂၀၁၅ ကလည်း ဦးစိုင်းအောင်ဝင်း ၏နေအိမ်တွင် လက်ပစ်ဗုံး ပစ်ခတ်ခံရဖူးပြီး ထိုစဉ်တွင် ဗုံးစ အနည်းငယ်ထိခိုက်ဒဏ်ရာရရှိခဲ့ကြောင်း သိရသည်။

“ လူတွေ သွားလာလှုပ်ရှားနေချိန်၊ လူမြင်ကွင်းမှာ ပစ်သွားတာကိုကြည့်ချင်းအားဖြင့် နမ့်ခမ်းက တရားဥပဒေ စိုးမိုးမှု မရှိတော့ဘူးဆိုတာပြတာပဲ။ နောက်ပြီး အိမ်ရှေ့ တည့်တည့်လာပစ်တဲ့ CCTVကလည်းရှိတယ်။ ရဲတွေက အခုထိ မဖမ်းမိဘူးဆိုတော့ စဉ်းစားစရာပါပဲ” ဟု နမ့်ခမ်းဒေသခံ စိုင်းအိုက် က သျှမ်းသံတော်ဆင့်ကိုပြောသည်။

နမ့်ခမ်းမြို့တွင် တရားဥပဒေ စိုးမိုးမှုမရှိကြောင်း လုံခြုံမှုကင်းမဲ့နေကြောင်းကာ ဒေသခံပြည်သူများ လည်း စိုးရိမ်မှုများဖြင့် နေထိုင်ရေကြောင်း လည်း စိုင်းအိုက်က ပြောသည်။

နမ့်ခမ်းမြို့နယ်တွင် အစိုးရတပ်မတော်၊ တိုင်းရင်းသားလက်နက်ကိုင်များ၊ ပြည်သူ့စစ်များလှုပ်ရှားသည့်နေရာတခုဖြစ်ပြီး၊ မကြာခဏ ပစ်ခတ်မှုများရှိသည့်နေရာတခုဖြစ်သည်။