သျှမ်းပြည်တောင်ပိုင်း မိုင်းပန်မြို့နယ် နားမွန်ကျေးရွာအုပ်စု တွင်း ယနေ့ (အောက်တိုဘာ ၂၇)ရက် နေ့လည် ၁နာရီဝန်းကျင်က ခရိုင်ထွေအုပ်မှ ဦးစီးအရာရှိ ၂ ဦး သေနတ်ပစ်ခတ်ခံရကြောင်း ကနဦး သတင်းအရ စုံစမ်းသိရှိရသည်။

ယနေ့ နေ့လည် ၁နာရီဝန်းကျင်တွင် မိုင်းပန်မြို့နယ် နားမွန်ကျေးရွာ အုပ်စုအတွင်းရှိ တောအုပ်ထဲတွင် ခရိုင်ထွေအုပ် ဦးစီးအရာရှိ ၂ဦး သေနတ်ပစ်ခံရပြီး၊ လက်ရှိမှာလူနာ ၂ဦး ကို လင်းခေး ဆေးရုံသို့ ပို့ဆောင်ထားကြောင်း SNLD မှ မိုင်းပန်မြို့နယ်ပြည်သူ့လွှတ်တော်ကိုယ်စားလှယ်လောင်း စိုင်းကျော်ခိုင် က သျှမ်းသံတော်ဆင့် ကို ပြောသည်။

“သူတို့ပစ်တဲ့ နေရာမှာ ရွာမရှိဘူး။ တောအုပ်ပဲ ဖြစ်ပါတယ်။ အသံ ၂ ချက်ပစ်တယ်လို့တော့ လူနာ တင်လာတဲ့ ကားသမားတွေ ကနေ ဖုန်းဆက်လာပါတယ်။ ခရိုင်ထွေအုပ်ဦးစီး နဲ့ ဒုဦးစီး ၂ ယောက်စလုံး ဘယ်ဘက်ပေါင်မှာ ထိပါတယ်။ လူနာ ၂ ယောက်စလုံး လင်းခေးဆေးရုံကို သွားလိုက်ပါပြီ။” ဟု စိုင်းကျော်ခိုင် ကပြောသည်။

အဆိုပါ ထိခိုက်ဒဏ်ရာ ရရှိသူ ၂ ဦးစလုံးသည် လင်းခေးခရိုင်က အထွေထွေ အုပ်ချုပ်ရေးရုံးမှ ဦးစီးအရာရှိ တဦး နှင့် ဒုဦးစီးအရာရှိဖြစ်ကြောင်း ဦးစိုင်းကျော်ခိုင် ကပြောသည်။

လင်းခေးခရိုင် အုပ်ချုပ်ရေးမှူး နှင့် အဖွဲ့တို့သည် မိုင်းပန်မြို့နယ် အတွင်းရှိ ကျေးရွာများရှိ မဲရုံးများသွားရောက် စစ်ဆေးပြီး အပြန်ခရီးစဉ် တွင် လက်နက်ကိုင်တပ်ဖွဲ့ မှ ချောင်းမြောင်း ပစ်ခတ်ခြင်းဖြစ်ကြောင်း သိရသည်။

ပစ်ခတ်မှုဖြစ်ပွါးရာ မိုင်းပန်မြို့နယ်အတွင်း အစိုးရ တပ်မတော်အပြင် ရဲတပ်ဖွဲ့၊ RCSS/SSA နှင့် ပအိုဝ်း လက်နက်ကိုင်တပ်ဖွဲ့ တို့ လှုပ်ရှားကြောင်း သိရသည်။

လာမည့်အောက်တိုဘာ ၂၈ ရက်နေ့တွင်လည်း ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ပါတီအနေဖြင့်အဆိုပါ နားမွန်ကျေးရွာ အုပ်စု သို့ စည်းရုံးရေး ဆင်းရန် စီစဉ်ထားကြောင်း စိုင်းကျော်ခိုင် က ပြောသည်။

“ ကျနော်တို့ မနက်ဖန် နားမွန်ကျေးရွာ အုပ်စု ကို စည်းရုံးရေး ဆင်းဖို့ RCSS ဆက်ဆံရေးရုံးကို သွားရင်းဒီသတင်း ကြားခဲ့ရတာပါ။ မနက်ဖြန် ကျနော်တို့စည်းရုံးရေး တော့မသွားဖြစ်တော့ပါဘူး။ RCSS က ခွင့်မပြုသေးဘူး။ တားထားပါတယ်။” ဟု ဦးစိုင်းကျော်ခိုင် က သျှမ်းသံတော်ဆင့် ကိုပြောသည်။

သို့သော် အဆိုပါကိစ္စနှင့်ပတ်သက်ပြီး RCSS/SSA ဘက်က အသေးစိပ်မသိရသေးကြောင်း ပြောခွင့်ရ ဒု-ဗိုလ်မှူးကြီးခမ်းစံ က သျှမ်းသံတော်ဆင့်အားပြောပြသည်။