ခေတ်မီသော ပါတီတစ်ရပ်အဖြစ် ဆက်လက်ရပ်တည်နိုင်ရန် (e –office) စနစ်ကို ကြိုးစားထူထောင်နေ ဖြစ်ကြောင်း SNLD က ပြောကြားသည်။

ခေတ်နှင့်အညီ ဖြစ်ပေါ်တိုးတက်မှုများကို မျက်ခြေမပြတ်စေဘဲ ပါတီအတွင်း လိုအပ်သလို ပြုပြင် တည်ဆောက်ခဲ့ပြီး ခေတ်မီသည့် ပါတီ တရပ် ဖြစ်ရန် e-office စနစ်ကိုကြိုးစားထူထောင်နေပြီး ပါတီ၏နည်းဗျူဟာအဖြစ် မူဝါဒများကိုလည်း ပညာရှင်များ၏ အကူအညီဖြင့် ရေးဆွဲသတ်မှတ်နိုင်ခဲ့ကာ ပမာဏာအဆင့် စတင်ကျင့်သုံးနေပြီဖြစ်ကြောင်း လည်း ထုတ်ပြန်ချက်တွင်ရေးသားထားသည်။

ရှမ်းတိုင်းရင်းသားများဒီမိုကရေစီအဖွဲ့ချုပ် (SNLD) ပါတီတည်ထောက်ခြင်း (၃၂)နှစ်မြောက် အခမ်းအနာကို ယနေ့(အောက်တိုဘာ ၂၆ ရက်) တွင် Zoom Meeting Application ဖြင့် ပြုလုပ်ခဲ့ပြီး ပါတီ ကိုယ်စားလှယ်လောင်းများ နှင့် ပါတီဝန်းရံသူများ အားလုံးပါဝင် တက်ရောက်ခဲ့ ကြောင်းသိရသည်။

SNLD သည် အမျိုးသားတန်တူးရေး နှင် ကိုယ်ပိုင်ပြဌာန်းခွင့်၊ ကိုယ်ပိုင်အုပ်ချုပ်ခွင့် နှင့် ကိုယ့်ကြမ္မာ ကိုယ်ဖန်တီးခွင့်ရရှိရန် ၁၉၄၇ ခုနစ် တွင် ချုပ်ဆိုခဲ့သည့် ပင်လုံစာချုပ် နှင့် ပင်လုံ ကတိကဝတ်များ၊ ၁၉၆၁ ခုနစ် ပြည်နယ်ပေါင်းစုံ ညီလာခံတွင် ဆုံးဖြတ်အတည်ပြုခဲ့သည့် ပြည်ထောင်စုစစ်မူအပေါ် အခြေခံပြီး စစ်မှန်သော ဖက်ဒရယ်ပြည်ထောင်စု ပေါ်ပေါက်ရေး ရပ်တည် ကြိုးပမ်းခဲ့ကြောင်း SNLD ဥက္ကဌ ဦးခွန်ထွန်းဦး က အဖွင့်မိန့်ခွန်းတွင် ပြောကြားခဲ့သည်။

“ ရည်မှန်းချက် မရောက်မချင်း ဆက်လက်ကြိုးပမ်းတိုက်ပွဲဝင်ဖို့လည်း တိုက်တွန်းလိုပါတယ်။ ဒီနေ့အချိန် မှာတော့ တိုင်းရင်းသားပြည်သူလူထုရဲ့ ဆန္ဒနဲ့ မကိုက်ညီတဲ့ ၂၀၀၈ ဖွဲ့စည်းပုံအခြေခံဥပဒေ ကို အစမှ အဆုံးတိုင် ပြန်လည်ပြုပြင်ရေးဆွဲမယ့် တာဝန်တရပ်တိုးလာတဲ့အပြင် နဂိုရှိရင်းစွဲစစ်အာဏာရှင် တိုက်ဖျက်ရေး၊ လူမျိုးကြီးဝါဒ ပပျောက်ရေး ကိစ္စကိုလည်း ဆက်လက် ဆင်နွှဲနေကြရမှာဖြစ်ပါတယ်” လို့ ဦးခွန်ထွန်းဦး က ပြောကြားလိုက်သည်။

ပါတီတွင် မျိုးဆက်သစ်လူငယ်လူလတ်များကို တာဝန်များ ပိုမိုပေးအပ်လျက် ရှိပြီး အတွေ့ကြုံရှိသော အနာဂတ် ခေါင်းဆောင်များအဖြစ် ပြုစုပျိုးထောင်မှုများကိုလည်း စဉ်ဆက်မပြတ် ဆောက်ရွက်လျက်ရှိ ကြောင်း ထုတ်ပြန်ချက်တွင် ဖော်ပြထားသည်။

“ကျနော်တို့ပါတီ အနေနဲ့လည်း လူငယ်နဲ့ အမျိုးသမီး တွေက ၃၀% ပါရမယ်ဆိုလို့ ကျနော်ပါတီထဲမှာလဲ လူငယ်တွေလဲ အများကြီးဝင်လာခဲ့တယ်။ လူငယ်တွေလဲ အများကြီးစိတ်ဝင်းစာလာခဲ့တယ်။ တောင်ကြီးမြို့ကို ကြည့်မယ်ဆိုရင် ကိုယ်စားလှယ်လောင်းတွေကလည်း လူငယ်တွေဖြစ်ပြီး အမျိုးသမီးလည်း ဖြစ်သေးတယ်” ဟု (SNLD) ပါတီ သျှမ်းတောင် အတွင်းရေးမှူး စိုင်းစွမ်းဝမ်းက ပြောသည်။

၂၀၂၀ နိုဝင်ဘာ ၈ရက် တွင် ကျင်းပမည့် ပါတီစုံ ဒီမိုကရေစီ အထွေထွေ ရွေးကောက်ပွဲတွင် SNLD (ကျားခေါင်း) အနေဖြင့် လွှတ်တော် အမတ်လောင်း (၁၃၂)ဦး ပါဝင်ယှဉ်ပြိုင်သွားမည်ဖြစ်ပြီး၊ထိုထဲတွင် အမျိုးသမီးလွှတ်တော် ကိုယ်စားလှယ်လောင်း (၃၇)ဦး ၊ လူငယ် ၃၂ဦး ပါဝင်ယှဉ်ပြိုင်သွားမည်ဖြစ်ကြောင်း သိရသည်။

ထို့ပြင် SNLD အနေဖြင့် မြို့နယ် (၄၅)မြို့နယ် ဝင်ရောက်ယှဉ်ပြိုင်သွားမည်ဖြစ်ပြီး ၊တိုင်းရင်းသား မဲဆန္ဒနယ်(၃)ဦး၊ အမျိုးသားလွှတ်တော်နေရာ (၁၂)ဦး၊ ပြည်သူ့လွှတ်တော်နေရာ (၃၇)ဦး နှင့် ပြည်နယ် လွှတ်တော်နေရာ ၇၉ ဦး စုစုပေါင်း (၁၃၁)ဦး ဝင်ရောက်ယှဉ်ပြိုင်သွားမည် ဖြစ်ကြောင်းသိရသည်။