ရွာသားများစစ်ဘေးရှောင်နေစဉ် နေအိမ်များမွှေနှောက်ခံရ

0

သျှမ်းပြည်မြောက်ပိုင်းတွင် ၁၀ ရက်ခန့်အကြာ တိုက်ပွဲဖြစ်ပွါးခဲ့သော ကျောက်မဲမြို့နယ်အတွင်းရှိ နမ့်မဟင်ရွာတွင် ရွာသားများဘုန်းကြီးကျောင်းသို့ စစ်ဘေးတိမ်းရှောင်နေစဉ်  နေအိမ်များ မွှေနှောက် ခံရကြောင်းစုံစမ်းသိရှိရသည်။

နမ့်မဟင်ရွာသားများ၏နေအိမ် မွှေနှောက်ခံရ

အောက်တိုဘာလ ၁၄ ရက်က စစ်ရှောင်ရွာသားများ နေအိမ်ခဏတဖြုတ်ပြန်သွားကြည့်ရာ  ရွာလုံးကျွတ်နေအိမ်များ ထိုသို့ မွှေနှောက်ခံထားရသည်ကိုတွေ့ရကြောင်း စစ်ရှောင်ရွာသူတဉီးကပြန်လည်ပြောပြသည်။

“တိုက်ပွဲငြိမ်နေလို့ကျမတို့ တအိမ်တယောက် ၂ ယောက် လူစုပြီး အိမ်ပြန်သွားကြည့်တယ်။ ဗမာစစ်သားတွေရွာထဲမှာရှိနေတုန်းဘဲ။ ကျမတို့ကျွဲနွား၀က်တွေကိုသူတို့သတ်စားကြတာ ရွာအ၀င်ကတည်းက အရိုးတွေ အသေတွေအကြွင်းအကျန်တွေ တွေ့ရတယ်။ အိမ်ရောက်တော့ မွှေနှောက်ခံထားရတယ်ကျမတို့အိမ်တွေ။ အိမ်တိုင်းနီးပါးဘဲ။ ကျမတို့အကြာကြီးမနေရဲကြဘူး ဘုန်းကြီးကျောင်းကိုအမြန်ပြန်လာကြတယ်”– ဟု စစ်ရှောင်ရွာသူက သျှမ်းသံတော်ဆင့်အားပြောပြသည်။

အစိုးရတပ်မတော်နှင့် RCSS/SSA တို့အကြားတိုက်ပွဲမှာ လက်ရှိငြိမ်နေသော်လည်း ကျေးရွာအတွင်း အစိုးရစစ်ကြောင်းက လှုပ်ရှားစခန်းချနေထိုင်နေဆဲဖြစ်သဖြင့် တောင်ထိပ်ရွာဘုန်းကြီးကျောင်းနှင့် နမ့်မဟင်ရွာဘုန်းကြီးကျောင်းရောက်စစ်ဘေးရှောင်ရွာသားများက နေရပ်မပြန်ရဲကြသေးကြောင်း ရွာသားများကဆိုသည်။

တာလုံရေကာတာတည်ဆောက်ရေးစီမံကိန်းရှိရာ တာလုံရွာအသွားလမ်းတွင်ရှိ စစ်ဒဏ်သင့် နမ့်မဟင်ရွာသည်  အိမ်ထောင်စု ၃၅ စု ၊ လူဉီးရေ ၁၅၀ ကျော်ရှိပါသည်။လက်ရှိတွင် ရွာလုံးကျွတ် ဘုန်းကြီးကျောင်းတွင်စစ်ရှောင်ခိုလှုံနေကြရကြောင်း စစ်ဘေးရှောင်များအား အစားအသောက်အသုံးအဆောင်သွားရောက် ကူညီထောက်ပံ့သော ကျောက်မဲမြို့ခံ အလှူရှင်လူငယ်အဖွဲ့က သျှမ်းသံတော်ဆင့်အားပြောသည်။

နမ့်မဟင်ရွာသားများ၏နေအိမ် မွှေနှောက်ခံရ

အဆိုလူငယ်အဖွဲ့မှ အဖွဲ့၀င်လူငယ် တဉီးက-  “တိုက်ပွဲမရှိတော့လို့ရွာပြန်နေကြဖို့ စစ်တပ်က ရွာသား တွေကို ခေါ်တာ။ အဲတာရွာသားတွေက ရွာပြန်အခြေအနေကြည့်တော့ ကျနော်တို့ပါလိုက်သွား တယ်။ အိမ်တိုင်းလိုလို ပစ္စည်းတွေ အစားအသောက်တွေကိုမွှေနှောက်ထားတာ  ။   ရွာထဲမှာ အရပ်၀တ်တွေနဲ့ ရော ယူနီဖောင်း၀တ်တွေနဲ့ရော ဗမာစစ်သားတွေရှိနေတယ်။ ရွာလမ်းတချို့ထဲဆို သူတို့ပေးမ၀င်ဘူး ရွာသားတွေကို။ မိုင်းဗုံးတွေ ထောင်ထားတယ်။ အဲ့ကြောင့်ရွာသားတွေရော ကျနော်တို့ပါအမြန်ပြန်ထွက် လာတယ်။” – ဟု သျှမ်းသံတော်ဆင့်အားပြောသည်။

တိုက်ပွဲများဖြစ်ပွါးသည့်အဆိုပါ နမ့်မဟင်ရွာ၊ ခန်ခိုင်းရွာ၊ လုံ၀ိုင်၊ နားဖင့်၊ နားအော်၊ နားချမ် ရွာများအတွင်း အစိုးရတပ်မတော် တပ်မ ၂၂၊ ၇၇၊ ၈၈ လက်အောက်ခံတပ်များအပြင် ခမရ ၅၀၁ တပ် စုစုပေါင်း ၁၀ တပ်ရင်းထက်မနည်း လှုပ်ရှားနေကြောင်း စစ်ရှောင်ရွာသား ပြောပြချက်အရသိရသည်။

အစိုးရတပ်မတော်သည် အောက်တိုဘာလကုန်အထိ အပစ်ရပ်ကြောင်းကြေညာပြီးနောက်တရက် အဆိုပါဒေသတွင်လှုပ်ရှားနေသော RCSS/SSA တပ်များအား ပစ်ခတ်တိုက်ခိုက်ခဲ့သည်။ ပစ်ခတ်မှုများကြောင့် ကိုဗစ်ကူးစက်မှုမြင့်မားနေချိန် စစ်ဘေးရှောင်ရွာသား ၃၅၀၀ ကျော်အထိရှိလာပြီး ကျောက်မဲမြို့ရှိ ဘုန်းကြီးကျောင်း ၇ ကျောင်းတွင် စစ်ရှောင်ခိုလှုံနေခဲ့ရသည်။

၀ါကျွတ်ချိန် ရိုးရာအရ လှူချိန်ဒါန်းချိန်ဖြစ်နေသော်လည်း ရွာသားများမှာ သီးနှံမဆွတ်ရသေးဘဲ စစ်ဘေးတိမ်းရှောင်နေရသည်။

Leave a Comments

SHARE