သျှမ်းပြည်မြောက်ပိုင်း နမ္မတူမြို့နယ် မိုင်းရင် ကျေးရွာ အုပ်စု တွင် SSPP ယာယီတပ်စခန်းအား TNLA အင်အားသုံးဝင်ရောက်တိုက်ခိုက်သည့်နေ့မှ စ၍ ယနေ့ ရ၊၅၊၂၀၁၈ အထိ စစ်ရေးတင်းမာနေသည်ဟု သိရသည်။

တိုက်ပွဲဖြစ်ပွားသည့် မေလ ၄ ရက်နေ့စ၍ SSPP ဘက် စစ်အင်အားထပ်မံဖြည့်တင်းသကဲ့သို့ TNLA ဘက်မှ လည်း စစ်အင်အား စစ်ကြောင်းသုံးကြောင်း ထပ်မံဖြည့်တင်းနေကြောင်း၊ နှစ်ဘက်ဖြစ်ပွားသော တိုက်ပွဲများကြောင့် ဒေသခံ ၅၀၀ ကျော် နေရပ်မှ စွန့်ခွါနေရကြောင်း ကြားသိရသည်။

“ကျနော်တို့က တိုက်ပွဲမဖြစ်ချင်ဘူး။ ကျနော်တို့တော်တော်သီးခံလာခဲ့တယ်။ အဲဒီ့ဒေသ ထဲမှာ ရှိတဲ့ ကျနော်တို့ တပ်စခန်းကို ဒီဇင်ဘာက တကြိမ်၊ အခု တကြိမ် လာတိုက်တယ်။ သူတို့ဘက်လဲ စစ်အင်အားဖြည့်တယ်ကြား တယ်။ ကျနော်တို့လဲ ထပ်ဖြည့်ထားတယ်။” – ဟု SSPP ပြောခွင့်ရ ဒုတိယ ဗိုလ်မှူးကြီး စိုင်းဆု က ပြောသည်။

မေလ ရ ရက် ယနေ့တွင်မူ တိုက်ပွဲဖြစ်ပွားသည့်သတင်းတော့မကြားရသေးကြောင်း၊ ဘုန်းကြီးကျောင်းသို့ ရောက်ရှိလာသည့် စစ်ဘေးရှောင်များအား ကူညီထောက်ပံ့နိုင်ရေးအတွက် အဓိကလုပ်ဆောင်နေရကြောင်း နမ္မတူမြို့နယ်အတွင်း လူမှုကူညီရေးအဖွဲ့ မှ ဆရာစိုင်းဘဉာဏ်ကပြောသည်။

အဆိုပါတိုက်ပွဲဲနှင့် ပတ်သက်၍ TNLA ပြောခွင့်ရ ဗိုလ်မှူး မိုင်းအိုက်ကျော် က – ’’တိုက်ပွဲဖြစ်သွားတာက အဲဒီ ဘက်က ဒေသခံတွေက ပြော တယ်။ ကျနော်တို့က လိုက်မေး ကြည့်တော့ အောက်ခြေမှာက သတင်းက တက်လာတာတော့မ ရှိသေးဘူး။ တိုက်ပွဲမဖြစ်အောင် ကျနော်တို့အဖွဲ့က ဘယ်လိုလှုပ်ရှား မှုရှိတယ်။ သူတို့အဖွဲ့က ဘယ်လို မျိုးလှုပ်ရှားမှုရှိတယ်။ ဒီအောက် ခြေမှာလည်း တပ်အချင်းချင်း ဆက်သွယ်မှုရှိတယ်။ နှစ်ဖက်ထိ တွေ့မှု၊ မှားယွင်းမှုမဖြစ်အောင် အမြဲမပြတ် ကျနော်တို့ကတော့ ဆက်သွယ်မှုရှိတယ်’’ ဟု 7daydaily.com သတင်းဌာနသို့ ပြောဆိုထားသည်ကိုတွေ့ရှိရသည်။

မေလ ၄ ရက်နေ့ နံနက် ၉ နာရီ မှ မွန်းလွဲပိုင်း ၂ နာရီကျော်အချိန်တွင်တကြိမ်၊ မေလ ၅ ရက်နေ့တွင်တကြိမ် မေလ ၆ ရက်နေ့ မှ ယနေ့ အထိ တိုက်ပွဲ ဖြစ်ပွားမှုမရှိသော်လည်း နှစ်ဘက်စစ်အင်အားအပြိုင်ဖြည့်တင်း နေကြောင်း SSPP ဘက်က ပြော သည်။

မဟာမိတ်တပ်ဖွဲ့ဝင် နှစ်ဖွဲ့ကြားဖြစ်ပွားသော တိုက်ပွဲကြောင့် လူ ၆ ယောက်ထက်မနည်းသေဆုံးကြောင်း၊ SSPP ဘက်တွင် တဦးကျဆုံးပြီး ၂ ဦးဒဏ်ရာရရှိကြောင်း၊ TNLA ဘက်တွက် ၆ ယောက်ထက် မနည်း သေကြေဒဏ်ရာရရှိကြောင်း နီးစပ်သည့် အသိုင်းအဝိုင်းအသီးသီးက ပြောသော်လည်း သီးခြား အတည်ပြုချက် မရရှိပေ။

TNLA နှင့် SSPP တို့သည် ၀ တပ်ဖွဲ့ ဦးဆောင်သည့် မြောက်ပိုင်းမဟာမိတ်အဖွဲ့ ရ ဖွဲ့တွင်ပါ၀င်ပါသည်။