သျှမ်းပြည်မြောက်ပိုင်း ကျောက်မဲမြို့နယ် အတွင်း ယနေ့ (အောက်တိုဘာ ၉ )ရက်တွင် တိုက်ပွဲများ ငြိမ်နေသော်လည်း အစိုးရတပ်မတော်ဘက်မှ တဖက်သတ်ပစ်ခတ်နေကြောင်း စုံစမ်းသိရသည်။
ကျောက်မဲမြို့နယ် အတွင်း အောက်တိုဘာ ၂ ရက်ကစပြီး ယနေ့ အချိန်ထိ အစိုးရတပ်မတော်နှင့် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော်( RCSS/SSA) တို့သည် စစ်ရေးတင်းမာမှုဖြစ်နေသေးကြောင်း RCSS/SSA မှပြောရေးဆိုခွင့်ရှိသူ ဒုဗိုလ်မှူးကြီး အုမ်ခေးက ပြောသည်။
“ ဒီနေ့ တိုက်ပွဲတော့ မဖြစ်ဘူး။ ငြိမ်နေတယ်။ ဒါပေမယ့် တပ်မတော်ဘက်ကတော့ တဖက်သတ် ပစ်ခတ်နေတယ်” ဟု ဒုဗိုလ်မှူးကြီး အုမ်ခေး ကဆိုသည်။
အစိုးရတပ်မတော်သည် ကျောက်မဲမြို့နယ် ပုံဝိုးကျေးရွာအုပ်စု နှင့် နမ့်ဟူးကျေးရွာဘက်သို့ စစ်အင်အား ဘက်ပေါင်းစုံ လှုပ်ရှားနေကြောင်း၊ တဖက်သတ် တိုက်ပွဲဖန်တီးနေကြောင်း လည်း ဒုဗိုလ်မှူးကြီး အုမ်ခေးက ပြောသည်။
“ ဒီနေ့ တိုက်ပွဲဖြစ်တာတော့မရှိဘူး။ တပ်မတော်ဘက်ကတော့ တဖက်သတ်ပစ်ပြီးတော့ တောင်ပေါ် တက်သွားတယ်” ဟု ပုံဝိုးကျေးရွာမှ ဒေသခံ အမျိုးသမီး နန်းနန်း က သျှမ်းသံတော်ဆင့်ကို ပြောသည်။
တပ်မတော်စစ်ရေးသည် ပုံဝိုးကျေးရွာ တလျှောက် လှုပ်ရှားမှုများရှိနေကြောင်း၊ တပ်မတော်စစ်ကြောင်း လှုပ်ရှားနေသရွေ့ ဒေသခံပြည်သူများ၊ စစ်ရှောင်များအတွက် စိုးရိမ်စရာရှိနေသေးကြောင်းလည်း နန်းနန်း က ပြောသည်။
ယနေ့ တိုက်ပွဲငြိမ်သက်သော်လည်း အစိုးရစစ်တပ်က ဘက်ပေါင်းစုံမှ စစ်အင်အားဖြည့်တင်းနေသဖြင့် စစ်ရေးမှာ အချိန်မရွေး ပြင်းထန်လာနိုင်ကြောင်း RCSS/SSA ဘက်ကပြောသည်။
လက်ရှိ ကျောက်မဲမြို့နယ် ပုံဝိုးကျေးရွာ ဘုန်းကြီးကျောင်းတွင် စစ်ရှောင် (၇၀၀)ကျော်၊ တောင်ထိပ် တွင် (၇၀၀)ကျော်၊ နားဆောင်ရွာ တွင် ၁၀၂ ဦး၊ နောင်ကွမ်ရွာတွင် ၁၀၀ ဦး၊ နမ့်ဟန်ခိန်ရွာတွင် ၄၀၀ ကျော် ၊ ကွမ်ဟင်ရွာ တွင် ၄၀၀ ကျော်နှင့် ကောင်းလန်းရွာတွင် (၂၀၀)ဝန်းကျင်ရှိကြောင်း ကျောက်မဲမြို့စစ်ရှောင်ကော်မတီမှ သိရသည်။
၂၀၂၀ ပါတီစုံ ဒီမိုကရေစီ ရွေးကောက်ပွဲ ကျင်းပရန်လည်း ၁ လ နီးပါးသာကျန်နေသည့်အချိန်၊ လွှတ်တော်ကိုယ်စားလှယ်လောင်း အသီးသီး မဲဆွယ်နေသည့် ကာလအတွင်း အစိုးရတပ်မတော် အနေဖြင့် ယခုကဲ့သို့ တိုက်ပွဲဖန်တီးခြင်းသည် ရုပ်ဆိုးကြောင်းလည်း စစ်ရှောင်များက ပြောဆိုလိုက်သည်။
လွန်ခဲ့သည့် ၂၀၁၅ ရွေးကောက်ပွဲ ကာလတွင်လည်း သျှမ်းပြည်တောင်ပိုင်း မိုင်းရှူးမြို့နယ်၊ ကျေးသီးမြို့နယ်၊ မိုင်းနောင်မြို့နယ် အတွင်း ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA)နှင့် အစိုးရတပ်မတော် တိုက်ပွဲပြင်းထန်မှုဖြစ်ပွားကာ ရွေးကောက်ပွဲ ရွှေ့ဆိုင်းခဲ့ရသည့် ဖြစ်စဉ်ရှိခဲ့သည်။
