သျှမ်းပြည်မြောက်ပိုင်း သီပေါမြို့နယ် အတွင်း အစိုးရတပ်မတော် နှင့် သျှမ်းပြည်ပြန်လည်ထူထောင်ရေး ကောင်စီ ( RCSS/SSA)တိုက်ပွဲဖြစ်ပွားခဲ့ကြောင်း စုံစမ်းသိရသည်။

ယမန်နေ့ ဇွန်လ ၁၀ ရက် ညနေ ၅ နာရီ ဝန်းကျင်က သီပေါအခြေစိုက် ခြေမြန်တပ်ရင်း ခမရ ၃၂၆ နှင့် တိုက်ပွဲ ဖြစ်ပွားခဲ့ခြင်းဖြစ်ပြီး အဆိုပါတိုက်ပွဲမှ အစိုးရတပ်မတော်အရာရှိ ၂ ဦး ကျဆုံးကာ၊ ၂ ဦး ဒဏ်ရာရရှိခဲ့ကြောင်း စစ်မြေပြင် သတင်းအရ သိရသည်။

“ အစိုးရ တပ်ဘက်ကတော့ အရာရှိ ဗိုလ် ၂ဦး၊ ၂ပွင့်နဲ့ က သေဆုံးတယ်။ ၂ဦးကတော့ ဒဏ်ရာရတယ်” ဟု ဒေသတွင်း အမည်မဖော်လိုသည့် အရာရှိတဦးက ပြောပြသည်။

သို့သာ် ၎င်းနှင့်ပတ်သက်ပြီး အသေးစိတ်ကိုမသိရှိရသေးကြောင်း ဒုဗိုလ်မှူးကြီး စဝ်အုမ်ခေး က ပြောသကဲ့သို့ RCSS/SSA ၏ သတင်း ဝက်ပ်ဆိုဒ် ဖြစ်သည့် Tai Freedom တွင်လည်း ဖော်ပြထားခြင်းမရှိခဲ့ပေ။

အစိုးရ တပ်မတော်က သီပေါမြို့နယ် ပန်ခုတ် ပန်ခမ်းရွာဘက်သွားမည်ဟု အကြောင်းကြားသည့်အပေါ် RCSS/SSA က ကားလမ်းအတိုင်းသာ သွားရန်၊ တောလမ်းဘက်မသွားရန် အကြောင်းပြန်ခဲ့ကြောင်း RCSS/SSA ပြောရေးဆိုခွင့်ရှိသူ ဒုတိယ ဗိုလ်မှူးကြီး စဝ်အုမ်ခေး က သျှမ်းသံတော်ဆင့် ကို ပြောသည်။

“ တောထဲမှာ ကျနော်တို့စစ်ကြောင်းရှိမှာမို့ ထိတွေ့မှုဖြစ်နိုင်တယ်။ အဲတာကို သူတို့က လမ်းအတိုင်းမသွားဘဲ တောထဲကိုသွားတယ်။ အဲ့ဒါကြောင့် ကျနော်တို့ တပ်သားတွေနဲ့ ထိတွေ့မှု ဖြစ်ခဲ့ကြတာပါ” ဟု ဒုဗိုလ်မှူးကြီး စဝ်အုမ်ခေး က ဆိုသည်။

တိုက်ပွဲသည် ညနေ ၅ နာရီ မှ ညနေ ၆ နာရီထိ ကြာခဲ့သည်ဟုဆိုပါသည်။

ဇွန် ၄ ရက်က အရှေ့ပိုင်းတိုင်းစစ်ဌာနချုပ် မှ RCSS/SSA အတွက် ကိုဗစ်-၁၉ ကာကွယ် ထိန်းချုပ် ကုသရေး ထောက်ပံ့ရေး ပစ္စည်းများ ပေး အပ်ခဲ့ ပြီး၊ ကိုဗစ်ကာလ အတွင်း ပစ်ခတ်မှု မဖြစ်ပွားအောင်ထိန်းချုပ်ရန် လည်း ညှိနှိုင်းခဲ့သေးသည်ဟုသိရသည်။

လွန်ခဲ့သည့် ရက်သတ္တပတ်ကလည်း သျှမ်းပြည် အရှေ့ပိုင်း ပုံပါကျင်မြို့နယ်တွင် အစိုးရ တပ်မတော် နှင့် RCSS/SSAတို့ တိုက်ပွဲဖြစ်ပွားခဲ့သေးသည်။

“ အခုဖြစ်တဲ့ တိုက်ပွဲ တွေက အထက်က စီမံချက် ရှိရှိနဲ့ ထိုးစစ်ဆင်တာ မဟုတ်လောက်ဘူး။ အောက်ခြေက အပေါ်ရဲ့ စည်းကမ်းချက်ကို လိုက်နာမှု မရှိတာလားပေါ့။ အထက်ကတောင် သိချင်မှ သိမယ်” ဟု ဒုဗိုလ်မှူးကြီး စဝ်အုမ်ခေး က ပြောသည်။

ယခုရက်ပိုင်း ဖြစ်ပွားသည့် တိုက်ပွဲ နှင့် ပတ်သက်ပြီး RCSS/SSA ဆက်ဆံရေး ရုံးမှ တဆင့် တိုင်းမှူး၊ ဗျူဟာမှူးများနှင့် ဆက်သွယ်ပြီး ညှိနှုှိင်းသွားမည်ဖြစ်ကြောင်း၊ ထို့ပြင် ငြိမ်းချမ်းရေး ဖော်ဆောင်ရေး စောင့်ကြည့်မှု ကော်တီနှင့်လည်း တွေ့ဆုံသည့်အခါ ဆွေးနွေးသွားရန် ရှိကြောင်းလည်း သိရသည်။

“ ကျနော်တို့ အောက်ခြေမှာဖြစ်နေတဲ့ ပြဿနာတွေ မဖြေရှင်းရင်တော့ ပြဿနာ ကြီးလာနိုင်ပါတယ်။ ပြဿနာ မကြီးအောင်တော့ ကျနော်တို့ အဖက်ဖက် ညှိနှိုင်းဖို့ပဲရှိပါတယ်” ဟု ဒုဗိုလ်မှူးကြီး စဝ်အုမ်ခေး က ပြောဆိုလိုက်သည်။