မူဆယ်မြို့နယ် TNLA နှင့် အစိုးရတပ်မတော် တိုက်ပွဲ ၂ကြိမ်ဖြစ်ပွား

0

သျှမ်းပြည် မြောက်ပိုင်း မူဆယ်မြို့နယ် နမ့်အွမ်ရွာ အနီး တွင် ယနေ့မနက်ပိုင်း တိုက်ပွဲ ၂ကြိမ် ဖြစ်ပွားခဲ့ကြောင်း စုံစမ်းသိရသည်။

မေ ၂၉ ရက်တွင် TNLA နှင့် အစိုးရ တပ်မတော် တိုက်ပွဲဖြစ်ပွားပြီး အစိုးရ တပ်ကး တစီး လက်နက်မှန်သည့် ပုံ ( Photo by TNLA)

မေလ ၃၁ ရက် ယနေမနက်ပိုင်းက တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) နှင့်အစိုးရတပ်မတော်တို့ကြာတိုက်ပွဲဖြစ်ပွါးခြင်းဖြစ်သည်။

“ ဒီမနက် ၆ နာရီခွဲ မှာ မူဆယ်မြို့ နမ့်အွမ်ရွာ အထက် တောထဲမှာ တကြိမ်၊ နောက် ၇ နာရီခွဲကျော်မှာ နမ့်အွမ်ရွာ အထွက် သကြားစက်ရုံ နားမှာ တကြိမ် ဖြစ်ပွားခဲ့တယ်” ဟု TNLA ပြောရေးဆိုခွင့်ရှိသူ ဗိုလ်မှူးတာ့အိုက်ကျော် က သျှမ်းသံတော်ဆင့် သို့ပြောသည်။

အစိုးရတပ်မတော်မှ TNLA လှုပ်ရှားသည့် တောပိုင်းသို့ဝင်ရောက်လာသဖြင့် ထိတွေ့မှု ဖြစ်ပွားခဲ့ခြင်းဖြစ်ကြောင်း၊ တိုက်ပွဲသည် ၁၀ မိနစ်ခန့်သာ ကြာမြင့်ခဲ့ကြောင်း ဗိုလ်မှူး တာ့အိုက်ကျော် က ပြောသည်။

လက်ရှိ မှာ တိုက်ပွဲများ မဖြစ်ပွားသော်လည်း ကွတ်ခိုင်မြို့နယ် နမ့်ဖတ်ကာ အခြေစိုက် မြန်မာ့တပ်မတော် က နမ့်အွမ်ရွာ ဘက်သို့လက်နက်ကြီးများ ဆက်တိုက်ပစ်ခတ်နေကြောင်း ဗိုလ်မှူး တာ့အိုက်ကျော် က ထပ်လောင်းပြောသည်။

“နမ့်ဖတ်ကာ ဘက်ကနေ တော့ လက်နက်ကြီးတွေ ပစ်နေတုန်းပဲ” ဟု ဗိုလ်မှူး တာ့အိုက်ကျော် က ဆိုသည်။

သျှမ်းပြည် မြောက်ပိုင်း ကွတ်ခိုင် မြို့နယ် နှင့် မူဆယ်မြို့နယ် အတွင်း တိုက်ပွဲများ ဆက်တိုက်ပြန်လည် ဖြစ်ပွားမှုကြောင့် ခရီးသွားပြည်သူများနှင့် ဒေသခံများ စိုးရိမ်မှု ဖြင့် သွားလာနေရကြောင်း သိရသည်။

“ ဒီမနက် သေနတ်သံတော့ ပြန်ကြားတယ်။ သေနတ်သံက သိပ်မကြာဘူး၊ လက်နက်ကြီးသံရောပဲ။ တိုက်ပွဲတွေ ဒီထက်ဆိုးလာမှာတော့ ကြောက်နေရတယ်” ဟု နမ့်အွမ်ဒေသခံတဦး က သျှမ်းသံတော်ဆင့် သို့ပြောသည်။

TNLA နှင့် မြန်မာ တပ်မတော်သည် လက်ရှိကမ္ဘာတဝှမ်းနှင့် အတူ မြန်မာနိုင်ငံတွင် ရင်ဆိုင်နေရသည့် ကူးစက်မြန် အဆုတ်ရောင် ရောဂါ ကိုဗစ်-၁၉ ကာကွယ် တားဆီးရန် အတွက် တိုက်ပွဲများရပ်တန့်ရန် သက်တမ်းတိုးထားသည် ကို ကြေညာထားသည့် တပ်ဖွဲ့များဖြစ်ကြောင်းသိရသည်။

မေ ၂၉ ရက်တွင်လည်း သျှမ်းပြည် မြောက်ပိုင်း ကွတ်ခိုင်-နမ့်ဖတ်ကာ ကြား တွင် TNLA နှင့် မြန်မာတပ်မတော်တို့တိုက်ပွဲဖြစ်ပွားကာ မြန်မာ့တပ်မတော်ဘက်မှ ကားတစီး လက်နက်ထိမှန်ခဲ့ကြောင်း သိရသည်။

Leave a Comments

SHARE