သျှမ်းပြည် မြောက်ပိုင်း ကျောက်မဲမြို့နယ် အတွင်း သျှမ်းပြည်ပြန်လည်ထူထောင်ရေးကောင်စီ၊ သျှမ်းတပ်မတော်( RCSS/SSA) နှင့် အစိုးရတပ်မတော်တို့အကြား တိုက်ပွဲ ဆက်လက် ပြင်းထန်နေဆဲ ဖြစ်ကြောင်း စုံစမ်းသိရသည်။

အောက်တိုဘာ ၂ ရက်ကစပြီး အစိုးရတပ်မတော်သည် (RCSS/SSA) လှုပ်ရှားသည့်အပိုင်းသို့ ဝင်ရောက်လှုပ်ရှားပစ်ခတ်ရာမှ ယနေ့တိုင် တိုက်ပွဲ ပြင်းထန်နေရခြင်းဖြစ်ကြောင်း RCSS/SSA ပြောရေးဆိုခွင့်ရှိသူ ဒု ဗိုလ်မှူးကြီး အုမ်ခေး က သျှမ်းသံတော်ဆင့်ကို ပြောသည်။

“ တိုက်ပွဲ ဆက်လက်ပြင်းထန်မလား၊ လျော့သွားမလားဆိုတာ တပ်မတော်ပေါ်မူတည်ပါတယ်။ တပ်မတော်က တောနင်း ရှာဖွေ နေရင် တိုက်ပွဲက ကြာရှည်နိုင်တယ်။ လမ်းမပေါ်ထိ တိုက်ပွဲပြန့်လာနိုင်တယ်။ နောက်ဆုံးမြို့ပေါ် အထိ ပြန့်လာနိုင်တယ်။ ဒါကတော့ စိုးရိမ်စရာဖြစ်တယ်” ဟု ဒု ဗိုလ်မှူးကြီး အုမ်ခေး က ဆိုသည်။

လက်ရှိဖြစ်ပွားနေသည့် တိုက်ပွဲသည် RCSS/SSA မှသျှမ်းပြည်မြောက်ပိုအခြေချလှုပ်ရှားနေသည်ကို တပ်မတော်အနေဖြင့် အလိုမရှိသည့် သဘောနှင့် ရွေးကောက်ပွဲ နီးကပ်လာပြီဖြစ်သဖြင့် တိုက်ပွဲ ဖန်တီး နေခြင်း ဖြစ်နိုင်ကြောင်း ဒု ဗိုလ်မှူးကြီး အုမ်ခေး က သုံးသပ်ပြောဆိုလိုက်သည်။

သို့သော် RCSS/SSA သည် ယခင်ကတတည်းကပင် သျှမ်းပြည်မြောက်ပိုင်းသို့ လှုပ်ရှားနေထိုင်နေ ခဲ့သည်ဖြစ်ရာ ၂၀၁၃ ခုနှစ်က ရွှေလီဘက်တွင် အခြေချလှုပ်ရှားသည့် RCSS/SSA ၏ အမှတ် ၇၀၁ စစ်ဒေသအား အစိုးရတပ်မတော်က အင်အားသုံးဝင်ရောက်ပစ်ခတ်တိုက်ခိုက်ခဲ့ပြီးနောက် တိုက်ပွဲများဆက်တိုက်ဖြစ်လာခဲ့သည်မှာယနေ့တိုင်ဖြစ်ပါသည်။

သျှမ်းပြည် တပ်မတော် ၂ တပ်အား သတ်မှတ်ထားသည့် နယ်မြေတွင်သာခွင့်ပြုကြောင်း၊ နယ်မြေကျော်ခွင့်မပြုကြောင်း ကာကွယ်ရေး ဦးစီးချုပ်မှ စက်တင်ဘာ (၈) ရက်က သျှမ်းပြည်အရှေ့ပိုင်း တိုင်းစစ်ဌာနချုပ်သို့ ရောက်စဉ်က ပြောဆိုခဲ့သည်။

“ လက်ရှိ ဖြစ်နေတဲ့တိုက်ပွဲက အပြတ်ပြောနိုင်တာက RCSS/SSA တပ်ဖွဲ့ကို မြောက်ပိုင်းမှာ မရှိစေချင်လို့ နယ်မြေကျော်လွန်တယ်ဆိုတဲ့အကြောင်းပြချက်နဲ့ တိုက်ပွဲဖန်တီးတာပါ” ဟု ဒု ဗိုလ်မှူးကြီး အုမ်ခေး က ပြောဆိုလိုက်သည်။

RCSS/SSAသည် အပစ်ခတ်ရပ်စဲရေးသဘောတူညီစာချုပ်( NCA) ချုပ်ဆိုထားသည့် အဖွဲ့တဖွဲ့ဖြစ်ပြီး၊ NCA ထဲတွင် အင်အားကြီးမားသည့် တပ်ဖွဲ့ တဖွဲ့ဖြစ်သည်။

လက်ရှိ NCA ဆွေးနွေးပွဲတွင် နယ်မြေ ကိစ္စနှင့် ပတ်သက်ပြီးဆွေးနွေးထားခြင်းမရှိသေးကြောင်း၊ NCA ၏ အခန်း(၃) တွင် လုံခြုံရေး အခန်းကဏ္ဍ တွင်တပ်နေရာချထားရေး ဆိုသည့် ကိစ္စပါဝင်ခဲ့ပြီး လက်ရှိမှာ ဆွေးနွေးမှု မရှိသေးကြောင်း သိရသည်။

ထို့ပြင် RCSS/SSA တပ်ဖွဲ့ NCA လက်မှတ်ရေးထိုးချိန်တွင် RCSS/SSA တပ်စခန်းကို သျှမ်းတောင် တွင်သာ ရှိရမည်ဆိုသည့်အချက် မပါဝင်ကြောင်း ဒုဗိုလ်မှူးကြီး အုမ်ခေး က ပြောသည်။

ထို့ပြင် တပ်မတော် သည် ကိုဗစ်-၁၉ ရောဂါ ကာကွယ် ထိန်းချုပ် ကုသရေး လုပ်ငန်းများကို အရှိန်အဟုန်မြှင့် ဆောင်ရွက်နိုင်ရေး နှင့် ထာဝရ ငြိမ်းချမ်းရေး ဖော်ဆောင်ရာတွင် ထိရောက် အောင်မြင်စွာ ဆောင်ရွက်နိုင်ရေးအတွက် နိုင်ငံတော်မှ အကြမ်းဖက်ဟု သတ်မှတ်ကြေညာထားသော အကြမ်းဖက် အဖွဲ့အစည်းများရှိသည့်နေရာမှ အပ ကျန်နယ်မြေ များတွင် တပ်မတော်အနေဖြင့် စစ်ရေး ဆိုင်ရာလှုပ်ရှားမှုကို အောက်တိုဘာ (၁)ရက်မှ (၃၁)ရက်ထိ ထပ်မံတိုးမြှင့်ရပ်ဆိုင်းပေးသွားမည် ဖြစ်ကြောင်း စက်တင်ဘာ ၂၉ ရက်တွင် ထုတ်ပြန်ကြေညာခဲ့သည်။

သို့သော် အောက်တိုဘာ (၄)ရက် ညနေပိုင်းက တိုက်ပွဲကြောင့် အသက် (၄၅)နှစ် အရွယ် အရပ်သားတဦး လက်နက်ကြီးထိမှန် ကာ ကျောက်မဲဆေးရုံတွင်ဆေးကုသခံယူနေရပြီး၊ ကျောက်မဲမြို့နယ်အတွင်းရှိ ကျေးလက်ရွာသား ဒေသခံ တထောင်နီးပါး စစ်ဘေးတိမ်းရှောင်နေရ ကြောင်း သိရသည်။

ထိုအရပ်သား လက်နက်ကြီးထိမှန်မှုသည် RCSS/SSA မှ ပစ်ခတ်လိုက်သည့် လက်နက်ကြီးကျည် ကြောင့်ဖြစ်ကြေင်း အစိုးရ တပ်မတော် သတင်းမှန်ပြန်ကြားရေး က ယမန်နေ့(အောက်တိုဘာ ၆)ရက်က ထုတ်ပြန်ခဲ့သည်။

အစိုးရ တပ်မတော်သည် RCSS/SSA လှုပ်ရှားသည့်နေရာအတွင်းသို့ စစ်အင်အား ဆက်လက်ဖြည့် နေသဖြင့် တိုက်ပွဲများဆက်လက်ပြင်းထန်လာနိုင်ကြောင်းလည်း ဒု ဗိုလ်မှူးကြီး အုမ်ခေး ပြောသည်။

“ အခု တိုက်ပွဲက ရွေးကောက်ပွဲ ကို ဂယက်နည်းနည်းတော့ရှိမယ်” ဟု ဒု ဗိုလ်မှူးကြီး အုမ်ခေး က ဖြည့်စွက်ပြောသည်။

ကိုဗစ်-၁၉ ကာကွယ်တားဆီးနေချိန်တွင် တိုက်ပွဲများ ဆက်လက်မဖြစ်ပွားစေချင်ကြောင်းနှင့် ပြည်သူလူထု၏ မျက်နှာကို ထောက်ထားပြီး တိုက်ပွဲများရပ်တန့်စေချင်ကြောင်းလည်း စစ်ရှောင်ပြည်သူများက ပြောသည်။

“ ကျနော်အနေနဲ့ကတော့ စစ်ပွဲမဖြစ်စေချင်ဘူး။ တပ်မတော်က ပြည်သူ့အတွက်ဆိုရင် ပြည်သူကိုကြည့်သင့်တယ်။ ပြည်သူစိတ်မချမ်းသာအောင်မလုပ်သင့်ဘူး” ဟု ကျောက်မဲမြို့နယ် ပြည်နယ် မဲဆန္ဒနယ် အမှတ်(၁) လွှတ်တော်ကိုယ်စားလှယ် စိုင်းထွန်းဝင်း က သျှမ်းသံတော်ဆင့်ကို ပြောသည်။

တပ်မတော်သတင်းမှန်ပြန်ကြားရေးမှ ပြောရေးဆိုခွင့်ရှိသူကို လက်ရှိဖြစ်ပွားနေသည့် တိုက်ပွဲအခြေအနေနှင့် ပတ်သက်ပြီး သျှမ်းသံတော်ဆင့် သတင်းဌာန မှ အကြိမ်ကြိမ် ဆက်သွယ်သော်လည်း မရရှိခဲ့ပေ။