ထိုင်းနိုင်ငံ မူလနိထိ ကျစ်တဆိုဖွန်း ဘာဝနာ (citrasupaṇṇa စိတြသုပဏ္ဏ ဘာဝနာ ) ဖေါင်ဒေးရှင်း မှ သျှမ်း ပြည်ပြန်လည်ထူထောင်ရေးကောင်စီ သျှမ်းပြည်တပ်မတော် RCSS/SSA ခေါင်းဆောင် ဗိုလ်ချုပ်ကြီးယွက်စစ် အား စံပြခေါင်းဆောင်ကောင်းဆု ချီးမြှင့်ခဲ့ပါသည်။

ဆုချီးမြှင့်ခြင်းအခမ်းအနားကို မေလ ၄ ရက်နေ့က ထိုင်းနိုင်ငံ ဘန်ကောက်မြို့ ဘန်ခဲန်အုပ်စု ရတ်ချဖတ် ဖရ နခွန်းတက္ကသိုလ်တွင် ကျင်းပခဲ့ရာ တခြားသော ဆုရရှိသည့်ပုဂ္ဂိုလ်များနှင့်အတူ ဗိုလ်ချုပ်ကြီးယွက်စစ်နှင့်ဇနီးက ဆုချီးမြှင့်ခြင်းအခမ်းအနားတက်ရောက်ခဲ့ပါသည်။

RCSS/SSA ၏ အတွင်းရေးမှူး ၃ ဗိုလ်မှူးကြီးစိုင်းငင်းက – ကျနော်တို့ဥက္ကဌကြီး ဒီဆုလက်ခံရရှိတဲ့အပေါ် အထူးဘဲဝမ်းမြောက်မိတယ်။ ကျနော်တို့ သျှမ်းပြည်သား မျိုးဆက်သစ်တွေအတွက် စံပြကောင်း ပုဂ္ဂိုလ်တဦး ဖြစ်ပါတယ်။ ဥက္ကဌကြီးဟာ နောက်လိုက်တပည့်တွေကို ပျိုးထောင်ပေးတဲ့နေရာမှာရော၊ ဒေသတွင်းလူထုဘဝ အေးချမ်းဖွံ့ဖြိုးရေး၊ ဒေသဖွံ့ဖြိုးတိုးတက်ရေးအတွက် အစဉ်ကြိုးပမ်း ပြုလုပ်ပေးတဲ့ခေါင်းဆောင်ကောင်း တဦးဖြစ်ပါတယ်။ – ဟု သျှမ်းသံတော်ဆင့်အားပြောသည်။

မူလနိထိ ကျစ်တဆိုဖွန်း ဘာဝနာ အဖွဲ့အစည်းက ၂၀၁၈ ခုနှစ် ပထမအကြိမ် ကိုယ်ကျင့်တရားကောင်းမွန်သော စံပြကောင်းပုဂ္ဂိုလ်များအားရွေးချယ်ဆုပေးရာတွင် “အဖွဲ့အစည်းဖွံ့ဖြိုးတိုးတက်အောင် စွမ်းဆောင်နိုင်ခြင်း၊ အသက်အရွယ်ရော အရည်အချင်းပါ သင့်တော် ကိုက်ညီမှုရှိခြင်း၊ မိမိလူမှုအသိုင်းအဝိုင်းအတွင်း စံပြထားသင့် သောပုဂ္ဂိုလ်ဖြစ်ခြင်း စသည့်အရည်အချင်းဖြင့်ပြည့်စုံသော RCSS/SSA ခေါင်းဆောင် ဗိုလ်ချုပ်ကြီးယွက်စစ်အား အဖွဲ့အစည်း ဦးဆောင်မှုနှင့် အဖွဲ့အစည်းဖွံ့ဖြိုးတိုးတက်ရေးဆောင်ရွက်နိုင်စွမ်းရှိမှု ရှိသော ပုဂ္ဂိုလ်အဖြစ် သတ်မှတ်ကာ ဆုချီးမြင့်ခြင်းဖြစ်ကြောင်း” ဆုလက်ခံရယူရန်ဖိတ်ကြားလာသည့်စာ တွင်ဖော်ပြထားသည်။

အဆိုပါဖိတ်ကြားစာကို ဧပြီလကတည်းက လက်ခံရရှိခဲ့ကြောင်း RCSS/SSA မှ ပြန်ကြားရေးအရာရှိက ပြောဆိုပါသည်။

အဆိုပါဆုအား ဗိုလ်ချုပ်ကြီးယွက်စစ်အပါအဝင် လာအိုနိုင်ငံ၊ ကမ္ဘောဒီးယားနိုင်ငံတို့ရှိ တခြားသော အဖွဲ့အစည်းအသီးအသီးမှ ထူးချွန်သည့် ခေါင်းဆောင်များ၊ အရှေ့တောင်အာရှနိုင်ငံအသီးသီးရှိ နိုင်ငံတော်နာမည်ကောင်းရရှိရေး စွမ်းဆောင်ခဲ့သော အနုပညာရှင်များ ရုပ်ရှင်သရုပ်ဆောင်များ အားရွေးချယ်ချီးမြှင့်ထားကြောင်းလည်း အဖွဲ့အစည်း၏ ၀က်ပ်ဆိုက်စာမျက်နှာတွင်ဖော်ပြထားသည်။

ဆုချီးမြှင့်သည့် အဖွဲ့အစည်းနာမည်ဖြစ်သော ကျစ်တဆိုဖွန်း ဘာဝနာ အား ပါဠိဘာသာအဘိဓါန်တွင် citrasupaṇṇa စိတြသုပဏ္ဏ ဘာဝနာ ဆန်းကြယ်ကောင်းမြတ်သော အတောင်ရှိသော ငှက်၊ ဂဠုန်ငှက် ၏ ကိုယ်ကျင့်တရား ဟုဖော်ပြထားပါသည်။