သျှမ်းပြည်မြောက်ပိုင်း နမ္မတူမြို့နယ် မိုင်းယင်ကျေးရွာအုပ်စုအတွင်းရှိ သျှမ်းပြည်တိုးတက်ရေးပါတီ SSPP/SSA တပ်စခန်းတခု ကို တအာင်းပလောင်အမျိုးသားလွတ်မြောက်ရေးတပ်မတော် PSLF/TNLA မှ ၀င်ရောက်တိုက် ခိုက်စဉ် အစိုးရတပ်မတော် မှ စစ်ရေးအသင့်ပြင်စောင့်ဆိုင်းထားကြောင်းသိရသည်။

နမ္မတူမြို့နယ် မိုင်းယင် ကျေးရွာအုပ်စု(ရွာမ) အရှေ့မြောက်ဘက်ရှိ ၀မ့်ဆာအွန် ရှိ သျှမ်းပြည်တိုးတက်ရေး ပါတီ SSPP/SSA ယာယီတပ်စခန်းအား တအာင်း(ပလောင်) TNLA တပ်က ယနေ့ နံနက် ၈ နာရီကျော်က စ၍တက် တိုက်ခဲ့ကြောင်း၊ တိုက်ပွဲငယ်မှ တိုက်ပွဲ ကြီး အသွင်သို့ကူးပြောင်းလာနေကြောင်း၊ နှစ်ဘက်အင်အား ရာဂဏန်း အထိ ဖြည့်တင်းကာ မွန်းလွဲ ၂ ကျော်အထိ ပစ်ခတ်တိုက်ခိုက်နေကြကြောင်း၊ မဟာမိတ်တပ်အချင်းချင်း တိုက် ပွဲဖြစ်ပွားနေ စဉ် အစိုးရတပ်မတော်မှ တိုက်ပွဲမှ ၁ မိုင်ကျော် အကွာတွင် အသင့်ပြင် စောင့်ဆိုင်း နေကြောင်း ဒေသခံများ ပြောပြချက် အရသိရ သည်။

“ပလောင်တပ်က ၀မ့်ဆာလုံမှာ ရှိတယ်။ ကျနော်တို့တပ်က ၀မ့်ဆာအွန်မှာရှိတယ်။ အစိုးရတပ်ကတော့ မိုင်းယင် မြောက်ဘက် ကုန်းမုံ ရွာမှာ ရှိတယ်။ ဒီနေရာတွေက နီးနီးလေးရယ်။ ပလောင်က အင်အား သုံးရာကျော်နဲ့လာ တိုက်တယ်။ ကျနော်တို့ဘက်က တရာကျော်ကျော်ရှိတယ်။ အပြန်အလှန် အင်အားဖြည့်တိုက်ခိုက်နေလို့ တိုက် ပွဲကြီးအသွင်ပြောင်းလာနေတယ် ”- ဟု ဒုတိယ ဗိုလ်မှူးကြီးစိုင်းဆုကပြောသည်။

ပြန်ကြားရေးအရာရှိ တားအိုက်ကျော်ကို သျှမ်းသံတော်ဆင့်မှ ကြိုးစားဆက်သွယ်သော်လည်း ဖုန်းလက်ခံ ဖြေဆိုခြင်းမရှိပေ။

သို့သော် ဒေသအတွင်းလှုပ်ရှားနေသည့် TNLA တပ်မှူးတဦးက – SSPP/SSA အနေဖြင့် ၄င်းတို့လှုပ်ရှားရာလမ်းကြောင်းအား ပိတ်ဆို့ထားသောကြောင့် အထက်အမိန့်အရ တိုက်ခိုက်ချေမှုန်းရခြင်း ဖြစ်သည်ဟု ပြောသည်။

နှစ်ဘက်ဖြစ်ပွားသော တိုက်ပွဲကြောင့် ၀မ့်ဆာအွန်ကျေးရွာ အတွင်းလက်နက်ကြီးကျရာ ရွာသား လုံးစိုင်း ဘယ်ဘက်ရင်အုံ တွင် ကျည်စ ထိမှန်ဒဏ်ရာရရှိကာ လားရှိုးဆေးရုံတွင်ဆေးကုသမှုခံယူနေရကြောင်း၊ ၄င်းအိမ်လည်းပျက်စီးသွားကြောင်း၊ အလားတူ ရွာသူအမျိုးသမီးတဦးလည်းဒဏ်ရာရရှိကာ နမ္မတူဆေးရုံတွင် ဆေးကုသမှုခံယူနေကြောင်း၊ ၀မ့်ဆာအွန် ကျေးရွာ ရွာသူရွာသား တရာကျော်လည်း မိုင်းယင်တို့ ထွက်ပြေးခိုလှုံလာနေကြောင်း၊ မိုင်းယင် အုပ်ချုပ်ရေးမှူး ဦးထွန်းလင်းက ပြောသည်။

တအာင်းတပ် TNLA နှင့် သျှမ်းပြည်တိုးတက်ရေးပါတီ SSPP/SSA တို့သည် အဆိုပါဒေသတွင်စစ်ရေးတင်းမာနေကြသည်မှာ လဝက်ကျော်ကြာပြီဖြစ်ကြောင်းလည်းသိရသည်။

၂၀၁၇ ခု ဒီဇင်ဘာ ၅ ရက် တုန်းကလည်း အဆိုပါဒေသ အတွင်းရှိ SSPP/SSA တပ်အား TNLA ဘက်မှ တကြိမ် တက်တိုက်ခဲ့ပါသေးသည်။ ထိုစဉ်ကလည်း ရွာအတွင်း TNLA ၏ လက်နက်ကြီးကျည်ကျ ရောက် မှုကြောင့် ၀ိန်းနန်ရွာသူ ဒေါ်နန်းအိုင်၏ နေအိမ်ပျက်စီးသွားခဲ့သည်။

SSPP/ SSA နှင့် TNLA တို့သည် ၀ တပ်ဖွဲ့ဦးဆောင်သည့် မြောက်ပိုင်းမဟာမိတ် အဖွဲ့ ရ ဖွဲ့ တွင် ပါ၀င်သည်။
ယခု ဖြစ်ပွားသော တိုက်ပွဲသည် SSPP/ SSA နှင့် နေပြည်တော် ငြိမ်းချမ်းရေးကောင်စီ တွေ့ဆုံမှုကြောင့်ဖြစ်နိုင် သည်ဟုဆိုသော်လည်း TNLA ဘက်မှ ပလောင်ပြည်နယ်ထူထောင်နိုင်ရေး ဆန္ဒပြင်းပြမှုကြောင့် လည်းဖြစ်နိုင် သည်ဟု လားရှိုးမြို့နေ နိုင်ငံရေးလေ့လာ စောင့်ကြည့်သူ ဆရာစိုင်းထွန်း ကပြောသည်။