စစ်မှန်တဲ့ ဖက်ဒရယ်ပြည်ထောင်စုကို ဖော်ဆောင်နိုင်ရန်အတွက် အိမ်ရှေ့စံ ကနောင်မင်းရဲ့ မျိုးနွယ်ဟာ သျှမ်းပြည်မှာ ဗမာတိုင်းရင်းသားရေးရာ ကိုယ်စားလှယ်လောင်းအနေနဲ့ ဝင်ရောက်ယှဉ်ပြိုင်မှာပါ။

သျှမ်းပြည်ဖွား ဗမာတိုင်းရင်းသားလူမျိုးလည်းဖြစ် မင်းမျိုးမင်းနွယ်လည်းဖြစ်တဲ့ ကိုကိုမျိုး ဟာ လာမယ့် ၂၀၂၀ နိုဝင်ဘာ(၈)ရက်မှာ ကျင်းပမယ့် ပါတီစုံဒီမိုကရေစီ အထွေထွေရွေးကောက်ပွဲ မှာ ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ပါတီ ကိုယ်စား ဗမာတိုင်းရင်းသား ရေးရာ ဝန်ကြီးနေရာမှာ ဝင်ရောက် ယှဉ်ပြိုင်သွားမှာ ဖြစ်ပါတယ်။

၁၉၈၈ ခုနှစ် ပါတီစတင်တည်ထောင်လာတဲ့အချိန်မှ စတင်ပြီး ယနေ့ချိန်ထိ မမှိတ်မသုန် တစိုက်မတ်မတ် ယုံကြည်လာတဲ့ ပင်လုံ ကတိကဝတ် ဖော်ဆောင်ရန် နဲ့ စစ်မှန်တဲ့ ဖက်ဒရယ် ပြည်ထောင်စုဖော်ဆောင်ရန် ကိုယ်တိုင် ယုံကြည်တဲ့အနေနဲ့ SNLD ပါတီကနေဝင်ရောက်ယှဉ်ပြိုင်ရခြင်းဖြစ်ကြောင်း သူက ရှင်းပြပါတယ်။

“ဘိုးဘိုးတို့ ချမှတ်လာခဲ့တဲ့ မူဖြစ်တဲ့အတွက်ကြောင့်မလို့ အစ်ကို့ မိသားစု အနေနဲ့လည်း သမိုင်းပေးတာဝန်ကို ပခုံးပြောင်း လက်လွဲတယ်လို့ ခံယူပါတယ်။ အဲ့ဒီအတွက်ကြောင့်လည်း SNLD မှာ လှုပ်ရှားရခြင်း ဖြစ်ပါတယ်” လို့ ကိုကိုမျိုး ကပြောပါတယ်။

ကိုကိုမျိုးဟာ ရတနာပုံ ထီးနန်းကို တည်ထောင်ခဲ့တဲ့ မန္တလေးမြို့တည် နန်းတည် မင်းတုန်းမင်းတရားကြီး နဲ့ ပြည်ထောင်ဘက်ဖြစ်တဲ့ ညီတော် အိမ်ရှေ့စံကနောင်မင်းသား ရဲ့ တွတ်တော်စပ်သူတဦးလည်း ဖြစ်ပါတယ်။

ဦးမျိုးသန့် နဲ့ ဒေါက်တာ ဒေါ်ဝင်းမြင့်အေးတို့ရဲ့သားဖြစ်တဲ့ ကိုကိုမျိုး ဟာ သျှမ်းပြည် တောင်ကြီးမှာ မွေးဖွားခဲ့သူ တဦးဖြစ်ပါတယ်။ကိုကိုမျိုးရဲ့ မိဘ ဘိုးဘွား ခေတ်ကတည်းက သျှမ်းပြည်ကိုရောက်ရှိနေထိုင်နေခဲ့ကြတာဖြစ်တယ်လို့ လည်းသိရပါတယ်။

အဘိုးဖြစ်သူဟာ ၁၉၅၀ ဝန်းကျင် မှာ သျှမ်းပြည်ရောက်ရှိလာပြီး သျှမ်းစော်ဘွားများခေတ်ကတည်းက ဖက်ဒရယ်မူကို အတူတကွ လက်တွဲဖော်ဆောင်လာခဲ့တဲ့ မိသားစု ဖြစ်ပါတယ်။

“သျှမ်းပြည်က အစ်ကိုတို့ရဲ့ ရေ မြေ လိုပါပဲ ဗမာလူမျိုး တစ်ယောက် ဖြစ်ပေမယ့်လည်း သျှမ်းပြည်မှာ နေတဲ့ ပြည်သူပြည်သားများ အားလုံး ရဲ့ တစ်သားတည်း ခံစားရတဲ့အတွက်ကြောင့်မလို့ SNLD မှာ ပါဝင်ပြီးတော့ ဆောင်ရွက်ရခြင်း ဖြစ်ပါတယ်” လို့ ကိုကိုမျိုး ကပြောပါတယ်။

သူဟာ တောင်ကြီးမြို့ အမှတ်(၄) အခြေခံပညာအထက်တန်းကျောင်းမှာ အထက်တန်းအောင်မြင်ခဲ့ပြီး၊ သြစတြေးလျနိုင်ငံမှာ စီးပွားရေး စီမံခန့်ခွဲမှု အပါအဝင် တခြားဘာသာရပ်တွေကို ၅ နှစ်ခန့်သွားရောက်လေ့လာသင်ယူခဲ့ပါတယ်။

ဒါ့ကြောင့် ကိုကိုမျိုးဟာ မင်းမျိုးမင်းနွယ်တယောက်ဖြစ်ရုံသာမက စွန့်ဦးတီထွင် လူငယ်စီးပွားရေး သမားတဦးအနေနဲ့ စီးပွားရေးကို တစိုက်မတ်မတ် လုပ်ကိုင်သူတဦးဖြစ်ပါတယ်။

စီးပွားရေး သမား တယောက် နိုင်ငံရေးလောကထဲကို ဝင်ရောက်လာခဲ့ရတဲ့အကြောင်းရင်းကတော့ “စဉ်းစားတာက စီးပွားရေး၊ လူမှုရေး၊ နိုင်ငံရေး အားလုံးက နှီးနွယ်နေပါတယ်။ ဒီလို နှီးနွယ်နေတဲ့ အခုချိန်မှာ အစ်ကို ရဲ့ အသက်အရွယ် နဲ့ နေရာ အနေအထားတစ်ခုမှာ ဒီနိုင်ငံရေး တစ်ခုမှာ စတင်ခြေချခြင်း မရှိရင် နည်းနည်း နောက်ကျမယ်လို့ ကိုယ့်ကိုယ်ထင်တယ်” လို့ ကိုကိုမျိုး ကပြောပါတယ်။

စီးပွားရေး တစိုက်မတ်မတ် လုပ်ခြင်းထက် နိုင်ငံရေး ကို ဝင်ရောက်လုပ်ကိုင်လို့ရှိရင် သျှမ်းပြည်အတွက် နဲ့သျှမ်းပြည်လူထုအတွက် ပိုပြီး အကျိုးရှိနိုင်ကြောင်း လည်း ကိုကိုမျိုးက ပြောဆိုလိုက်ပါတယ်။

“ လွှတ်တော် ဒါမှမဟုတ် အစိုးရ အဖွဲ့ဝင် တစ်ယောက်အနေနဲ့ တွန်းခြင်း အားဖြင့် အဲ့ဒီ တွန်းအားပေးခြင်းက ပိုပြီး အကျိုးတက်ရောက်မှု ရှိမယ်လို့ ထင်တဲ့အတွက်ကြောင့်မလို့ နိုင်ငံရေးထဲကို ဝင်ရောက်ရခြင်း ဖြစ်ပါတယ်ခင်ဗျား” ဟု ကိုကိုမျိုး က ဆိုပါတယ်။

ကိုကိုမျိုး လက်ရှိလုပ်ကိုင်နေတဲ့လုပ်ငန်းတွေကတော့ ခရီးသွားဝန်ဆောင်မှုလုပ်ငန်း၊ သျှမ်းပြည်ထွက်ကုန်နဲ့ အညာထွက်ကုန်များ တန်ဖိုးမြင့်ဈေးကွက်တင်ခြင်းလုပ်ငန်း၊ ကျောက်မျက်ရတနာ ရောင်းဝယ်ရေးလုပ်ငန်း တွေ အပြင် မင်းမျိုးမင်းနွယ် က ဆင်းသက်လာသူတဦးဖြစ်တဲ့အလျောက် ရှေးဟောင်းအမွေအနှစ် ထိန်းသိမ်း လုပ်ဆောင်ရန်လည်း စီစဉ်နေသူတဦးဖြစ်ပါတယ်။

ကိုကိုမျိုးဟာ သျှမ်းပြည် နဲ့ ဆက်စပ်ပြီး ခရီးသွား လုပ်ငန်းတွေ၊ သျှမ်းပြည် ဒေသထွက် ထွက်ကုန်တွေကို တန်ဖိုးမြင့် ပစ္စည်းတစ်ခု အနေ နဲ့ ( Launch) တင်ပို့ရောင်းချဖို့ လုပ်ဖို့ရှိကြောင်း လည်း ပြောပါတယ်။

ဒါ့အပြင် သျှမ်းပြည်တွင်းရှိ ရှေးဟောင်းအမွေအနှစ်များ ခရီးသွား လုပ်ငန်းများ စိုက်ပျိုးရေး လုပ်ငန်းများကို ပိုမို အလေးပေး ဆောင်ရွက်သွားရန်ရှိကြောင်းလည်း သူကဆက်လက်ပြောပါတယ်။

“ရွေးချယ်ခံရရင် ဗမာနဲ့ တိုင်းရင်းသားတွေရဲ့ ချစ်ကြည်ရေးကို တတ်နိုင်တဲ့ဘက် လူမှုရေးဘက်ကနေပြီးတော့ ပြန်လည်ပြီး ချစ်ကြည်ရေး တည်ဆောက်မှု ရိုးရာ ယဉ်ကျေးမှုတွေ အဲ့ဒီအပိုင်းလေးတွေ နောက်တစ်ခုက ရှေးဟောင်းအမွေအနှစ် ယဉ်ကျေးမှု အမွေအနှစ်များ ပြန်လည်ဖော်ထုတ် သိန်းထိမ်းရေး ရယ် အဲ့လိုအပိုင်းကနေ စတင်ပြီး လှုပ်ရှားမယ်လို့ ခံယူထားပါတယ်” လို့ ကိုကိုမျိုး က ပြောပါတယ်။

ဆက်လက်ပြီး ၎င်း အနေနဲ့ ရွှေ့ပြောင်းအလုပ်သမား အခွင့်အရေး၊ လူကုန်ကူးမှုတိုက်ဖျက်ရေ၊ အလုပ်အကိုင် အသစ်ဖန်တီးပေးရေးတွေကို ဆောင်ရွက်သွားမှာပါ။

ကိုကိုမျိုးဟာ ဘိုးဘွားစဉ်ဆက် ပေးလာတဲ့ သမိုင်းအမွေကို လက်ဆင့်ကမ်းခံယူပြီး မပြီးစီးသေးတဲ့ ဖက်ဒရယ်အရေးကို ဆက်လက်လုပ်ဆောင်သွားကာ ဗမာနဲ့ တိုင်းရင်းသား ကြားချစ်ကြည်ရေး ကို ကြိုးပမ်း လုပ်ဆောင်ချင်တယ်လို့ ပြောပါတယ်။